6
Dilava Ena Vinaula Kauta 'Eva
Adedua Laoatai Bevapasisi.
Adedua Laoatai Bevapasisi.
1 Lai Dilava ita avinaula ka'ona kaumai lai anoimui, Dilava ena iulaveni koana oi oabia davana sia oi bovasi'avanala. 2 Olana Dilava eluva ediaka,
“E'u ula melalana umaunai
lelemui aika,
maivaka vamauli melalana umaunai adulumui.”
Isa 49.8
Lau oi a'oumui Dilava ena ula melalana kanaua 'eva vali'u, vamauli melalana kanaua vaka vali'u.
3 Kau ka nuana sia lai avavaia si'asi'a, kau emai vinaula si'asi'a asi'i bemadavalia ounai. 4 Ia vailatai lai sibomai lai avamomo'aimai lai Dilava ena vinaula kaumai dala edeata edeata boutai laloatai, kataua 'o bavunu, anaana, mai adedua laloatai lai avapasisi, 5 de'odimai, devavabuto'omai mai matotai delavamaiavu, lai avinaula vunu, sia lai amuinai kavei maivaka vikolo eakumai, 6 emai loveai, emai ikabasiai, vapasisiai mai koakoa nama'itai, Idume Kabukabuna kula'ilanai mai kau ilalo'autai kau lai avaikata lai Dilava ena tamu ivuana kaumai. 7 Luva umauna lai a'ouadae, mai Dilava ena siavuai lai avinaula. Komolo vinaulata 'eva emai kuali davata imamai aveketa aveketai lai a'abi.
8 Vaida vamai deabisi vaida vamai devavai si'asi'a, devabo'omai maivaka dema akumai, beia lai Dilava ena vinaula kaumaiai lai a'ao. Kau dede kaumaiai devaaomai, beia lai 'eva luva umauna lai aluvavaia. 9 Kau sia deikabasimai, beia Dilava eikabasimai. Kau delalovaia lai 'ani aba, beia maulimai lai amimia. De'odi si'amai, beia sia lai aba vaika. 10 Nuamai deanana beia melala boutai lai alalonama. Ulalu kaumai boina beia kau doutamo lai avaloviata. Kevamai dava asi'i boina, beia dava boutai 'eva lai emaiai demimia.
11 Emai kau Kolinto ai kaumui e, dava boutai vailamuiai lai a'oudae, emai lalovai boutai kevamuiai avala'asi. 12 Lai 'eva oi alalomui beia oi 'eva lai sia olalomai. 13 Lau oi aluva venimui itani naku'u boita, lai avavai kevamuiai vitaitatai oi bomavavai kevamaiai, emui lalovai boutai kevamaiai oi bovala'asi.
Ita 'Eva Mauli Dilavana Ena
Lo'e Kabukabuna.
Lo'e Kabukabuna.
14 Sia deabiveni kauta ita sia oi bovaka'onamo. Komolo mai si'avana aboina bevaka'onamo koma? 'Ailala mai vabuto'o 'eva sia bemia ka'onamo. 15 Keliso mai Diabolo nuata lalovaita aboina bevaka'onamo koma? Abiveni kauna mai sia eabiveni kauna laluana eta lalovai 'eva ka'onamoai sia bemimia. 16 Dilava ena lo'e kabukabuna mai kau va'ava'ata lalua 'eva aboina bevaka'onamo koma? Ita 'eva mauli Dilavana ena lo'e kabukabuna. Dilava sibona kanania eluva koma,
“Lau 'eva ia ita lai bamia ka'ona,
maivaka sia bavikanita.
Lau 'eva ia eta Dilavai ba'ao,
ia 'eva lau e'u kauai be'ao.”
Lev 26.12
17 Kanaua 'ounai Dilava eluva ediaka,
“Oi 'eva ia ovikanita
kevatai oda'atau.
'Obu vinaulata sia oi bovavai.
Inoku lau oi babimuidae.
Isa 52.11, Esk 20.34, 41
18 Lau 'eva oi kamamuiai ba'ao,
oi 'eva lau naku'u momoluaneta mai 'a'ateta ai oibo'ao.
Kula'ila boutai Loviana namana,
nia lau e'u luva.”
2Sam 7.14