Paulo Ena Malele Ivaluana
TIMOTEO (2)
Kevanai
Puka Laloana Ilelena Luvana
Timoteo 'eva Paulo ebanoia vali nama'ina vinaulana devavaia kauna. Kanaua 'ounai Paulo puka kanania eleleia eda'a kevana, dala nama'ita lovata eaku mai e'ouia dala kataua'i bedada'a melala boutai. Ia Timoteo e'ouia beabiveni kula'ila mai Iesu Keliso valina nama'ina belolo vaia melala bounai. Dilava ena luva beda'avaia kave'i. Kau beva ana-anala 'o mekau bevenia kauta daitai sia bevuakao vuakao. Inoku ia 'eva bekula'ila, Dilava vinaula evenia davana bevavaia kave'i.
Ia 'eva dede luvata edeata edeata leleta sia be'ika, mai eta lalovai sia demediana kauta kevatai beda'atau, luva kataua boita detata'u kau devavaita si'asi'a. Ia 'eva Paulo ena mia dalana belalovai 'inia kave'i inoku ia kanaua bemia koma, 'olana abiveniai dekula'ila kauta eta mia dalana 'eva kanaua, nua'eluai bemimia mai bo'akalata nuata bevanama'inata mai eta mekau bevuvua.
Puka Iduvuna Namata
a. Lova aku. (1.1 - 2)
b. Vanama'ina luvana mai vasiasi luvana. (1.3 — 2.13)
c. Vaidiba luvana. (2.14 — 4.5)
d. Paulo ena ula luvana. (4.6 - 18)
e. Luva to'ota. (4.19 - 22)
1
Vanama'ina Luvana.
1 Lau Paulo, Dilava ena ula 'ounai Keliso Iesu ena veauneke kau'uai ao Keliso Iesu laloanai mauli eluva'ana'i vaia maulina valina bakakava,
2 Timoteo, naku'u ma'adi, alele venimu. Ameamea Kamata Dilava mai Keliso Iesu ita eta Lovia namana eta iulaveni koana, vilalo, mai nua'elu kevamuai bemimia.
Paulo Timoteo Nuana
Evakula'ilala.
Evakula'ilala.
3 Dilava vanama'ina luvana avenia, maivaka melala boutai e'u meameai oni sia abolabolamu boni mai lani laloatai. Dilavana kanaua nua'u komolona umaunai ia da'alana a'abi vitaitana 'ava'ava'u ia da'alana deabi boina. 4 E'u da'a laloanai okani melalana alalovaia, e'u ula itoina 'eva bamaikamu, inoku bamaikamu koanai lalo'u 'ani benama vaika. 5 Emu abiveni dokadoka alalovai 'inia, abiveni kanaua 'eva 'ana'inai oni kubumu ateatena Loi mai sinamu Iunisi demauli vaia abivenina, vali'u avamomo'aimu oni nuamuai vaka abiveni kanaua emimia. 6 Kanaua 'ounai lau oni avalalomu une, ima'u akamuai akao'au ameamea laloanai idume ena ainama kanana Dilava idume enai evenimu ainamana bovavulea vinaulana bovavaia kula'ila. 7 'Olana Dilava 'eva sia makau idumena evenita, ia siavu, lalo'au mai nua pasisi idumena evenita.
8 Kanaua 'ounai eta Lovia namana valina ikavanai sia bomalalai mai Keliso dainai lau avabuto'o malalaina vaka sia bomalalai vaia. Dilava kula'ila evenita vitaitanai ana-ana laloatai ekamia vali nama'ina dainai. 9 Ia eta'u ita evamaulita maivaka e'aeta ena kabukabu kautai ekao. Kanaua 'eva sia dava ka kavavaia 'ounai, ia ena lalovai namana mai ena iulaveni koana 'ounai. Ena iulaveni koana kanania 'eva 'ana'inai kanobata asido'o epulu laloanai Keliso Iesu dainai evenita. 10 Ia vali'u 'eva 'ani evaila kave'i Keliso Iesu ivamaulita kauna easi laloanai. Ia eta'u ba siavuna evaolea, mai mauli keinikeini sia be'ole maulina dalana vali medianai evala'asia.
11 Vali mediana kanania 'ounai Dilava eta'u edila'u, bailolo, veauneke kau'uai ba'ao maivaka vaikabasi kau'uai ba'ao. 12 Kanaua 'ounai lau 'eva kanania ana-ana koma, beia sia amalalai, 'olana lau aikabasi dai abiveni kauna vaka aikabasia kave'i lau ia kevanai ane'eiadivo vinaulana be'imala kave'i beda'a mo ena mue 'udai melalanai.
13 Lau avaikabasimu luvata umauta dalatai bodada'a maiabivenimu maivaka mailalo'aumu Keliso Iesu laloanai. 14 Dava nama'ina evenimu oni emu ikakao venunai davana Idume Kabukabuna ita nuatai emimia idumena kanaua ena viduluai bo'imala kave'i.
15 'Ani oikabasi banota Asia kanonai demia kauta boutai deasi deda'a'u mulili devikani'u, viloatai 'eva Bukelo mai Elemokene.
16 Lovia namana betata'u ena vilaloai Onesipolo mai ena luma kauta boutai bevanama'inata, 'olana ia melala doutamo nua'u evakula'ilala maivaka delio'u avabuto'o malalaina sia emalalai vaia. 17 Ia ua'i Lomai ela'asi koanai, lau ekavu'u eda'amo edavali'u. 18 Ameamea Lovia namana ia bedulua ia 'eva Lovia namana ena vilalo bedavalia melala kanaua'i. Maivaka oni 'ani oikabasi kave'i ia a edulu'u koma ua'i Epesoai.