Malele Ivakoina
IOANE (3)
Eleleia Kauna
Puka Laloana Ilelena Luvana
Malele kanania 'eva ‘kau namana’ eleleia eda'a kau ka vana Kaio kanaua kevana. Ia 'eva Kaio evanama'inala 'olana Kaio melala boutai abiveni kauta eduluta. Ia Kaio e'ouia kau ka ua'i, vana Diotelepe, ia 'eva apa kauna kanaua kele'enai be'imala kave'i.
Puka Iduvuna Namata
a. Lova aku. (1-4)
b. Kaio evanama'inala. (5-8)
c. Diotelepe beikala. (9-10)
d. Demetelio belalovaia. (11-12)
e. Luva to'ona. (13-15)
1
Vanama'ina Luvana.
1 Lau, Ioane Dilava ena lo'e i'ana'iavaina kau'u, malele alelea evavasi e'u kau Kaio ma'adi kevamu, lau 'eva alalo'au venimu umauna.
2 E'u kau ma'adi e, lau aikabasi idumemu ena mauli 'eva enama'ina, inoku ameamea dava boutai 'eva benama'ina oni kevamuai mai maikula'ilamu bomia kave'i vitaitana idumeai okula'ila boina. 3 Bo'akalata vaida deasi oni Dilava ena luva umauna oabia dae mai dalanai oda'a valina de'ou'u koanai alalonama si'asi'a. 4 Lau naku'u Dilava ena luva umauna dalanai dedada'a valita a'ika 'eva e'u lalonama enama vaika mai lalonama kanaua 'eva e'u lalonama bounai ekeinia.
Kaio Koakoa Nama'ina Evavaia.
5 E'u kau ma'adi e, bo'akalata kataua sia oikabasita kave'i kauta vaida oduluta 'eva enama'ina, kanaua 'eva emu abiveniai vinaula nama'ina ovavaia. 6 Koakoa nama'ina ovavaia 'ounai, ia deta'u emu lalo'au valina dekava Dilava ena lo'e kauta nia'i katania kevatai. Dilava nuana ivanama'inana dalanai boduluta kave'i eta kalima beda'ala laloanai. 7 'Olana kau kataua 'eva Keliso ena vinaula dainai eta kalima demakavala dedada'a, beia sia deabiveni kauta kevatai 'eva sia dava ka dedavalia. 8 Kanaua 'ounai ita vaka ia ekaduluta, kanaua ekavavaia laloanai, ita 'eva Dilava ena luva umauna vinaulana 'ani ia ita kavavaia.
Diotelepe Koakoa Si'avana
Vaika Evavaia.
Vaika Evavaia.
9 Lau vinaula kanania'i luva vaida malele ka ai aleleta devasi Dilava ena lo'e kauta kataua kevata, beia Diotelepe, ia 'eva eula vaika Dilava ena lo'e kauta eta 'ana'iavai kaunai be'ao, lai lelemai sia eabia dae. 10 Kanaua 'ounai lau bavavasi koanai, Diotelepe kanana'i dava evavaia davana lovana bakua, kevamaiai eluva si'asi'a mai ededede. Beia sia kanaua mo ia etata'u bo'akalata devavasi 'eva sia eabita dae, maivaka deula bo'akalata kataua beabita dae 'eva e'outa kao mai Dilava ena lo'eai evala'asita.
Demetelio Vinaula
Nama'ina Evavaia.
Nama'ina Evavaia.
11 E'u kau ma'adi e, koakoa si'avata vaika kataua boita sia bovavai, ia koakoa nama'ita bovavai. Koakoa nama'ita evavai kauna 'eva Dilava ena. Ia koakoa si'avata vaika evavai kauna kanaua 'eva Dilava sia eikabasia kovo.
12 Kau boutai Demetelio ena koakoa nama'ita luvata deluva mai Dilava ena luva umauna etata'u ia ena koakoa nama'ita kataua evamomo'aita. Lai vaka ia ena koakoa nama'ita valita lai akakava, oni oikabasi lai emai luva 'eva momo'aita.
Vanama'ina Luvana To'ona.
13 Ba'oumu luvata 'eva doutamo, beia malele ka'onamoai balelele 'eva sia a'ula. 14 E'u nuabata 'eva melala sia bedau'a 'eva bavasi baikamu inoku laluana ekavivaila ekaluvaluva.
15 Ameamea nua'elu akamuai bemimia. Eta kau nia'i kauta eta vanama'ina luvata desisini kevamu. Eta kau na'i kauta emai vanama'ina luvata ka ka bovenita.