Paulo Ena Malele
EPESO
Kauta Kevatai
Puka Laloana Ilelena Luvana
Puka kanania 'olana 'eva kanania boina. Dilava ena ula 'eva dava boutai vutuvutuai mai kanobatai Keliso laloanai bevaka'onamo. Keliso 'eva dava kataua boita 'olata kaunai be'ao (1.10). Maivaka Dilava ena ula 'eva sibona ena kau bevelita molau, inoku eta mauli boutai 'eva Keliso ita bevaka'onamo, inoku nuata 'eva beka'onamo.
Puka kanania elena lava'ana'ina 'eva Paulo eta'u nuana nama'inai eluva kulu'ila, kau bevaikabasita kave'i Iesu beabivenia, inoku bevaka'onamo itani abiveni kauta itona ka'onama. 'Olana Iesu ena vinaula nama'ina akanai 'eva Dilava kau evamaulita, inoku Idume Kabukabuna bevenita, kanaua 'eva sibona betata'u ena kau eta vinaula nama'ita bevavaita ena luva vitaitanai (1.4). Elena ivaluana 'eva Paulo ediaka, kau Keliso ita devaka'onamo 'eva nuata beka'onamo Dilava ena dala dainai bedadai.
Puka kanania laloanai 'eva Paulo luva ivavitaitata doutamo eveni kau bevaikabasita kave'i, eta vaka'onamo Keliso ita kanaua 'eva kau itona ka'onamoai be'ao, itani kauni ka'onamo boina (4.16), 'o itani luma boina (2.19 - 21). Puka kanania eka vakua kave'i 'eva Dilava ena ula ena kau eta dava nama'ita bevavaita 'eva eka ikabasita kave'i.
Puka Iduvuna Namata
a. Lova aku (1.1 - 2)
b. Keliso mai Dilava ena lo'e kauta. (1.3 — 3.21)
c. Mauli makamakana Keliso laloanai. (4.1 — 6.20)
d. Luva to'ota. (6.21 - 24)
1
Vanama'ina Luvana.
1 Lau Paulo, Dilava ena ulaai Keliso Iesu ena veauneke kau'u, malele kanania oi kabukabu kaumui Epeso ai Keliso Iesu oi oabivenia kaumui alele venimui. 2 Kamata Dilava mai eta Lovia namana Iesu Keliso eta iulaveni mai nua'elu 'eva akamuiai bemimia.
Keliso Dainai Dilava
Ainama Nama'ita Bevenita.
Ainama Nama'ita Bevenita.
3 Dilava eta Lovia namana Iesu Keliso kamana eka vanama'inala, Keliso laloanai idume ena vanama'ina boutai ai evanama'inata vutuvutu kanobatanai. 4 Dilava asido'o kanobata evavaia koanai, ia ita 'ani Keliso laloanai edilata ia ena, lalo'auai ia vailanai ekakabukabu mai sia eka va'eva. 5 Ia siako 'ani elalovaia makava Iesu Keliso dainai ita ia ena ivanani melotai ekao, lalovai kanaua 'eva ia ena ula mai ena lalonama. 6 Kanaua 'ounai Dilava ekavanama'inala ena iulaveni nuavina laloanai evenita, iulaveni kanaua 'eva Nakuna elalo'au venia melona evenita 'avaea.
7 Keliso eba lalanai eta si'avana e'ou kao mai mauli kabia. Dilava ena iulaveni kanaua 'eva nama vaikana kevatai, 8 ena aoneka mai ikabasi itoinai evenita davana 'eva namavaikana. 9 Dilava ena ula lalovaina vuniana evala'asi ita kevatai mailalonamana ita, lalovai kanaua 'eva 'ani eva'olua Keliso laloanai bevavaia. 10 Inoku Dilava ena lalovai melalana bedaia koanai, Dilava vutuvutu mai kanobata davata boutai maivaka Keliso laloanai bevaka'onamota inoku be'olavaita.
11 Dilava ena ula vitaitanai dava boutai evavai, lalovai elalovaia makava vitaitanai Keliso laloanai ita vaka edilata ena kau umautai ekaao. 12 Kanaua 'ounai lai Iuda Keliso laloanai lai anuabata makava kaumai, Dilava ena nuavi lai bavanama'inala.
13 Inoku luva momo'aina ivamaulimui valina nama'ina 'uluna oi oika koanai, oi vaka Dilava eabimui ena kau. Keliso oi oabivenia 'ounai Dilava eabimui ia ena 'eva ivamomo'aina koanaai luva 'ana'i Idumena Kabukabuna evenimui. 14 Idume Kabukabuna ita etai 'eva Dilava ena luva 'ana'i ivamomo'aina mai eluva 'ana'i vai davata ekaabi beda'amo Dilava ena kau boutai bevamaulita. Dilava ena nuavi kavanama'inala.
Paulo Epeso Kauta
Daitai Emeamea.
Daitai Emeamea.
15 Kanaua 'ounai, lau emui abiveni Lovia namana Iesu kevanai mai emui lalo'au Dilava ena kabukabu kauta boutai kevatai 'eva 'uluta 'ani aika, 16 oi daimuiai vanama'ina luvata 'eva Dilava avenia basibasi. E'u meamea laloatai oi alalovaimui, 17 Eta Lovia namana Iesu Keliso ena Dilava mai Kamana nuavina anoia aoneka mai ikabasi Idumena bevenimui, inoku oi 'eva ia oi boikabasia kave'i. 18 Maivaka ameamea nuamui beva'ailala, inoku ia e'aemui 'ounai nuabata oi boikabasia, mai ena kabukabu kaumui 'eva nuavi vanama'inata namavaikata oi bo'abi. 19 Inoku mune'e ena siavu 'eva namavaikana mai edeanana vaika ita kabiveni kauta eka ikabasia. Siavu kanaua 'eva ena kula'ila bounai ai evinaula vaia vitaitana boina, 20 Dilava ena siavu kanaua 'eva Keliso laloanai evinaula vaia inoku ba kauta viloatai evako'isia mai vutuvutu kanobatanai imana idibana ai evamiala, 21 Ia 'eva 'ani vutuvutu davata namata boutai akatai, 'ola kauta, siavu kauta, kula'ila kauta, lovia kauta boutai akatai, mai ia vana 'eva va namata boutai akatai, sia vali'u kanobatana kanania'imo ia vailai be'asi kanobatanai vaka. 22 Mai Dilava dava boutai Keliso aena palapalana venunai ene'eta divo mai eabia isi ia 'eva lo'e kauta boutai 'olatai be'ao. 23 Dilava ena lo'e kauta 'eva Keliso kauanina mai Keliso sibona evavonua, ia 'abu boutai ai dava boutai evavonuta.