3
Iesu 'Eva Mose Ekeinia
1 Kanaua 'ounai bo'akala'u kabukabumui e, oi lai ita Dilava e'aeta ka'ona kaumui, Iesu oi bolalovaia kave'i, ia 'eva Dilava ena veauneke kauna maivaka kabukabu kauna namana eta abiveniai valina kakakava kauna. 2 Mose Dilava ena luma laloanai evinaula kave'i vitaitanai Iesu 'eva esinia Dilavana ena vinaula evavaia kave'i mainuana bounai. 3 Luma evavaia kauna 'olana deaku vaika vakaia luma kanaua, vitaitana Iesu 'eva nuavi namana beabia vakaia Mose. 4 Luma boutai mai ivavaita kauta, beia Dilava 'eva dava boutai evavaita. 5 Mose 'eva Dilava ena luma bounai laloanai da'alabi kaunai eao evinaula kave'i mainuana bounai, ia 'eva vailai Dilava dava be'oulai davata luvata eluva. 6 Beia Keliso 'eva Dilava Nakuna, ia Dilava ena luma e'ola vaia mainuana bounai. Ita melala bounai eka abiveni maikula'ilata eka nuabata venia mailalonamata koanai ita 'eva Dilava ena kau.
Dilava Ena Kau Eta Laani 'Abuna.
7 Kanaua 'ounai Idume Kabukabu kanania eluva koma,
“Vali'u melala kanania'i
Dilava lelena oi bo'ika koanai,
8 nuamui sia oi bovapasisita
itani melala kanaua kano'akunai
Dilava dekovoia laloanai
devakaunama boina.
9 Ua'i 'ava'avamui vikau vani navui
laloatai e'u vinaula deikata
beia dekovo'u mai devakovo'u.
10 Kanaua 'ounai ulu kanaua
abadu venia aluva adiaka,
‘Nuata 'eva dau'ai vaika
'ounai e'u dala sia deikabasia.’
11 Inoku abadu aluva'ana'i
pasisi adiaka,
‘Ia 'eva e'u laani 'abunai
sia beda'adodo.’ ”
Sal 95.7-11
12 Bo'akala'u e, oi bo'imamui kave'i sia ka sibona nuana beabi si'ala sia ena abiveni ai beda'a ovo mauli Dilavana beda'ala mulili. 13 Puka kabukabuna eluvavaia ediaka ‘vali'u melala kanania’ 'eva ita eta melala, kanaua 'ounai melala boutai banomui ita nuamui oi bovakula'ilata, si'avana betata'u belebamui nuamui asi'i emavapasisita makauna. 14 Eta abiveni kamakavala davana eka abi 'inia beda'amo to'onai 'eva ita Keliso itana kavinaula ka'ona kautai ekao.
15 Puka kabukabuna kanania eluva koma,
“Vali'u melala kanania'i
Dilava lelena oi bo'ika koanai
nuamui sia oi bovapasisita
melala kanaua'i 'ava'avamui
devakaunama boina.”
Sal 95.7, 8
16 Kau davata Dilava lelena de'ika beia devakaunama? Mose Aikupito ai evala'asita kauta kataua boutai. 17 Dilava dai ebadu venita vikau vani navui laloatai? Kau kataua si'avana devavai kano'akunai de'eko deba palu kauta. 18 Dai kevatai Dilava eluva 'ana'i pasisi venita ena laani 'abunai sia beda'adodo eko? Ua 'eva dai e'outa? Dilava lelena sia deda'avaia kauta kataua. 19 Kanaua 'ounai ita 'ani kaikabasi ia eta abiveni asi'i 'ounai laani 'abunai sia deda'a dodo.