1 Kanaua 'ounai ita kakula'ila vaila kada'aia Keliso ena vaikabasi kula'ilana kabia, beia abiveni vaikabasita lava'ana'ita abivenita etai sia ekamia. Katania 'eva ba vinaulatai kalalo'udai inoku Dilava kabivenia, 2 vaidi'u kabukabu vaikabasina mai akatai ima dekao'au, maivaka ba ai ko'isi 'udai vaikabasina mai mia keinikeini lavuaina, sia ekamue vaikabasi katania 'olatai. 3 Dilava be'ula koanai ita 'eva vaila ekada'ala vaikabasi kula'ilana enai.

4 Ia 'ana'inai Dilava nuata eva'ailalata, vutuvutu ainamana deonovaia, Idume Kabukabuna ita devinaula ka'ona kauta kataua 'eva sia 'ani belalo'udai bedaia. 5 Dilava ena luva nama'ina deikabasia mai Dilava ena siavu vailai be'asi davana vaka deonovaia, 6 inoku Keliso enai de'eko detaule kauta belalo 'udai melala ivaluana bemakamaka 'eva sia bedaia, 'olana ia 'ani imatai Dilava Nakuna au ido'o valaukuna akanai dekokoia 'au 'udai kau vailatai devamalalaia.

7 Vitaitana itani kano kanaua akanai melala doutamo lamu eaku, iani nama'ita evapuluta devinaula kauta eta, kano kanaua 'eva Dilava ena vanama'ina beabia. 8 Beia kano kanaua akanai 'iniauma mai ava 'ini'inita dekubu koanai ia sia mai ena nama'ina ka, Dilava ia 'ani besivadala 'alovai beani palu.

9 E'u lalo'au kaumui e, kanaua lai aluva pasisi venimui koma, beia lai aikabasi dokadoka oi 'eva sia kanaua boina, vanama'ina nama'ina beda'a vaimui vamauli 'abunai. 10 Dilava 'eva sia kau ka enai e'au, emui vinaula oi ovavai mai emui lalo'au ia vanai 'ani oi ovala'asi ena kabukabu kauta oi oduluta vali'u vaka oi oduluta kauta sia bebolabolata. 11 Lai aula vaika oi boumuiai vinaula kanaua'i oi bokula'ila beda'amo to'onai dava oi onuabata venia davana oi boabia. 12 Oi sia bobalea, eta abiveni mai eta vapasisi daitai Dilava eluva'ana'ivai davata deabi kauta boitai oi bo'ao.

13 Dilava eta'u Abela'amo kevanai eluva'ana'i koanai sia kau ka Dilava akanai ekeini 'ounai ia sibona vanai luva'ana'i pasisina evavaia, 14 ediaka, “Lau oni bavanama'inamu umauna, inoku ava'avamu bavadoutamota.” 15 Inoku Abela'amo evi'ima maivapasisina eda'amo Dilava eluva'ana'i davana eabia.

16 Kau ka luva'ana'i pasisina bevavaia koanai, ia akanai kauna vanai luva'ana'i pasisina kanaua bevavaia inoku luva'ana'i pasisina kanaua betata'u ena luva bevamomo'aia ia eta viala bevapuala. 17 Vitaitanai, Dilava eula bevamomo'aia ena luva'ana'i 'eva bemomo'ai ena luva'ana'i davata be'abi kauta kataua kevatai, mai vaka eula kau kataua beikabasi ia ena lalovai vailai lalovaina sia beva edeanala, kanaua 'ounai ia luva'ana'i pasisina evavaia. 18 Dilava 'eva sia ededede 'ounai ena luva luana katania luva'ana'i mai ena luva'ana'i pasisina 'eva sia bevaedeanata, inoku ita da'a'au kauta kasi Dilava kevanai kauta 'eva vakula'ila namavaikanai ekalava 'ini vailatai e'asi davana ekanuabata vaia. 19 Nuabata kanania kabia nuabatana 'eva vitaitana do'o boina eta mauli ai, ekula'ila evalava 'inita bevada'atadodo vutuvutu lo'e kabukabunai laloa ikekeavuna tubu'anai beva da'ata keini beda'amo ekabukabu vaika 'abuna laloanai. 20 Ita daitai Iesu e'ana'ia eda'adodo ua'i kabukabu kauna namanai eao keinikeini, vitaitana Melikisedeki kabukabu vinaulana evavaia boina.