1 Palisea kauna ka vana Nikodemo, ia 'eva Iuda kauta eta kau namana ka. 2 Boni ka ia eda'a Iesu kevana inoku e'ouia ediaka, “Vaikabasi kaumu e, lai aikabasi oni 'eva Dilava kevanai oasi. Olana sia kau ka 'eva vatabulovo koata oni ovavai katana bemavavaita diba bema Dilava eva sia ia ita.”

3 Iesu ia ena luva evamuea ediaka, “Lau oni luva umauna a'oumu, kau ka sia bepulu 'udai koanai ia 'eva Dilava ena lovia vanuana sia beikala kovo.” 4 Nikodemo elavuai ediaka, “Kau 'ani namana koanai ia aboina bepulu 'udai koma? Momo'ai dokadoka melala ivaluana ia sinana bo'anai sia bedodo 'udai mune'e sia bepupulu.”

5 Iesu ia ena luva evamuea ediaka, “Lau oni luva umauna a'oumu, kau 'eva veiai mai Idume Kabukabunai sia bepulu 'udai koanai ia 'eva Dilava ena lovia vanuanai sia bedodo kovo. 6 Kauani etata'u kauani evapulua, beia Idume Kabukabuna etata'u idume evapulua. 7 Bopulu 'udai luvana aluvala 'eva sia botabulovo vaia. 8 Lani e'unu 'eva eula venia 'abuna eda'ala, ia oni 'eva 'uluna mo o'ika, beia a'i e'asi 'o a eda'ala 'eva sia oikabasi. Idume Kabukabunai depulu kauta boutai vaka kataua boita.”

9 Nikodemo ia elavuaia 'udai ediaka, “Dava katania aboina bepupulu?” 10 Iesu ia e'ouia ediaka, “Oni 'eva Isalaela ena vaikabasi kauna namana ka, ia dava 'ounai dava katania sia oikabasita? 11 Lau oni luva umauna a'oumu, lai aikabasi davatai lai aluva vaita, inoku lai aika davatai lai a'oulai, beia emai luva lai aluva vaita davata oi sia ka oi oabita dae. 12 Lau atata'u kanobata davatai aluva venimui ia sia oi ovamomo'aita, bema vutuvutu davatai ba'oumui 'eva aboina oi bovamomo'aita? 13 Lau Kau Nakuna sibo'u mo vutuvutuai a'ovu asi beia sia kau ka vutuvutuai ele'au kovo. 14 Kano'akunai Mose kau'asi va'ava'ana eisia 'au vitaitanai lau Kau Nakuna vaka beisi'u 'au. 15 Inoku deabiveni'u kauta boutai 'eva mauli keinikeini beabia.

16 “'Olana Dilava kanobata elalo'au venia vaika 'ounai Nakuna ka'onamo mo eveni, beabivenia kauta boutai 'eva sia bebaba, beia mauli keinikeini beabia. 17 Dilava nakuna esinia kanobatai 'eva sia kanobata mekau bevenia, beia ia enai kanobata bevamaulia. 18 Ia deabivenia kauta boutai 'eva mekau sia bevuala, beia sia deabivenia kauta boutai 'eva 'ani mekau devuaia, 'olana Dilava Nakuna ka'onamo mo vanai sia deabivenia 'ounai. 19 Valuva 'eva kanania boina. 'Ailala 'ani easi kanobata laloanai, inoku kau vabuto'o ulana de'ula beia 'ailala sia deula venia, 'olana eta koakoa 'eva desi'avana. 20 Si'avana devavai kauta boutai 'ailala devaiviivia inoku sia de'asi 'ailala laloanai 'olana ia eta koakoa si'avata vaika asi'i demavala'asita une makauna. 21 Beia momo'ai vinaulatai demauli kauta 'eva de'asi 'ailala laloanai, 'olana Dilava lelena daitai dedadai 'eva eta koakoai bevala'asi kau be'ika.”

22 Kanania mulinai, Iesu ibanona kauta ita dela'asi deda'a Iudea kanona, ua'i ia ita kena demia inoku kau evaidi'uta kabukabu. 23 Vaidi'u kabukabu kauna Ioane vaka Salima avekenai Aenonai evaidi'u kabukabu, 'olana ua'i 'eva vei namana inoku kau dedada'a 'eva evaidi'uta kabukabu. 24 Kanaua 'eva Ioane vabuto'o lumanai asido'o de'alavua koanai.

25 Inoku Ioane ibanona kauta vaida 'eva Iuda kauna ka ita eta koakoa Dilava vailanai bevamakamakata 'udai idi'una deviala vaia. 26 Kanaua 'ounai ia deasi Ioane kevanai inoku de'ouia dediaka, “Vaikabasi kaumu e, Iolidana nutuna avekenai kau kanaua ita oi omia, valina okava kauna 'eva vali'u ia kau evaidi'uta kabukabu, inoku kau boutai 'eva ia kevana deda'ala.” 27 Ioane eta luva evamuea ediaka, “Kau 'eva Dilava beveveni davana mo bedavalia. 28 Oi sibomui vaka 'ani oi ovamomo'ai'u 'eva lau adiaka, ‘lau 'eva sia Keliso, beia lau 'eva esini'u 'ana'i vakaia ia.’ 29 Kamoane makamaka ateatena kanaua 'eva ia eadavala kauna ena, inoku kamoane makamaka kauna ena kau ia kevanai elalava 'eva lelena e'ika koanai elalonama si'asi'a. Lalonamana kanania 'eva lau e'u, inoku vali'u nua'u lalonama 'ani evonu. 30 Ia 'eva namana be'ao, beia lau 'eva kiki'u ba'ao.”

31 “Akai easi kauna 'eva kau boutai akatai, kanobatai epulu kauna 'eva kanobata ena, inoku kanobata davata mo eluva vaita. Vutuvutuai easi kauna 'eva kau boutai akatai. 32 Ia eika mai e'ika davata valita ekakava, beia sia kau ka ia ena luva eabita dae. 33 Beia ena luva eabi dae kauna 'eva evamomo'aia Dilava 'eva momo'ai Dilavana. 34 Dilava esinia kauna 'eva Dilava ena luva eluvavai, 'olana Dilava etata'u Idume Kabukabuna ia nuanai evavonua. 35 Kamana eta'u nakuna elalo'au venia inoku dava boutai ia imanai 'ani eudata. 36 Nakuna evamomo'aia kauna 'eva mauli keinikeini 'ani eabia, beia nakuna lelena daitai sia edadai kauna 'eva mauli sia beikala kovo, inoku Dilava ena badu ia akanai bemimia.”