1 Iesu luva kanania eluvaia mulinai, e'a'a dae vutuvutu eikaia inoku emeamea ediaka, “Kama'u e, melalana 'ani edaia nakumu ena nuavi vala'asia, inoku nakumu vaka oni emu nuavi bevala'asia. 2 'Olana oni siavu ovenia kau boutai be'ana'ia vaita, oni ota'u ovenia kauta boutai kataua mauli keinikeini bevenita. 3 Mauli keinikeini 'eva kanania, kau oni beikabasimu, oni mo sibomu 'eva Dilava umaumu, maivaka Iesu Keliso oni osinia kauna beikabasia.

4 “Vinaula oveni'u bavavaia vinaulana 'ani avaolea, inoku emu nuavi kanobata akanai 'ani avala'asia. 5 Kama'u e, kanobata asido'o epulu laloanai lau oni ita kamiavaia nuavina kanaua vali'u vailamuai nuavina e'uai vala'asia.

6 “Kanobatai oveni'u kauta kataua kevatai oni vamu 'ani avaikabasita, ia 'eva oni emu oni ota'u lau oveni'u, inoku ia emu luva dainai dedadai. 7 Vali'u ia 'ani deikabasi oveni'u davata boutai 'eva oni kevamuai de'asi. 8 'Olana o'ou'u luvata ia avaikabasita 'eva deabitadae, inoku deikabasi lau oni kevamuai asi maivaka devamomo'aia oni lau osini'u.

9 “Lau ia daitai ameamea. Lau 'eva sia kanobata kauta daitai ameamea, beia oveni'u kauta kataua daitai ameamea 'olana ia 'eva oni emu. 10 Lau e'u dava boutai 'eva oni emu, oni emu dava boutai 'eva lau e'u, inoku ia etai e'u nuavi ela'asi.

11 “Lau 'eva kanobatai sia bamia dau'a, avavasi oni kevamu, beia ia 'eva kanobatai bemimia do'o. Kama'u Kabukabuna e, oni vamu oveni'u vana siavunai botautaavu ia beka'onamo vitaitana ita kavaka'onamo boina. 12 Lau ia ita lai amia laloanai a'imata kave'i oni vamu oveni'u vana siavunai atautaavu. Sia ka etaule, beia betaule kauna ka'onamo mo etaule, puka kabukabuna luvana bevamomo'aia 'ounai. 13 Lau 'eva vali'u avavasi oni kevamu, beia kanobatai amimia do'o laloanai luva katania aluvavai, ia nuatai e'u lalonama itoina beabia.

14 “Emu luva 'ani ia avaikabasita inoku kanobata 'eva ia evaiviivita, 'olana lau 'eva sia kanobata ena vitaitanai ia vaka sia kanobata ena. 15 E'u meamea 'eva kanobatai sia boabita tau beia diabolo kevanai botautaavu. 16 Lau 'eva sia kanobata ena vitaitanai ia vaka sia kanobata ena. 17 Emu luva umaunai bovakabukabuta, emu luva 'eva luva umauna. 18 Oni lau osini'u asi kanobata kauta viloatai amia vitaitanai lau ia asinita deda'a kanobata kauta viloatai demimia. 19 Ia daitai lau sibo'u avakabukabu'u, ia vaka sibota emu luva umaunai bevakabukabuta.

20 “E'u meamea 'eva sia ia mo sibota daitai, ia eta luvai lau bevamomo'ai'u kauta kataua vaka daitai ameamea. 21 Kama'u e, oni 'eva lau nua'uai mai lau 'eva oni nuamuai, vitaitanai ia boutai 'eva nuata beka'onamo. Ia vaka be'asi ita nuatai kanaua'i kanobata kauta beikabasi oni 'eva lau osini'u. 22 Nuavi oveni'u nuavina 'eva ia avenita, ita nuata eka'onamo vitaitana ia nuata beka'onamo. 23 Lau 'eva ia nuatai inoku oni 'eva lau nua'uai. Inoku ia nuata beka'onamo kave'i kanobata kauta bevaikabasita oni 'eva lau osini'u, lau olalo'au veni'u vitaitanai ia vaka olalo'au venita.

24 “Kama'u e, lau a'ula 'ani oveni'u kauta kataua lau a'i 'eva ia vaka ua'i lau ita, inoku ua'i ia e'u nuavi oveni'u nuavina kanaua beikala 'olana kanobata asido'o ovavaia laloanai oni lau olalo'au veni'u 'ounai. 25 Kama'u komolo kaumu e, kanobata kauta 'eva oni sia deikabasimu, beia lau 'eva oni aikabasimu mai muli'uai dedada'a kauta katania deikabasi oni 'eva lau osini'u. 26 Lau 'eva oni vamu ia avaikabasita maivaka bavaikabasita basibasi, 'olana emu lalo'au kele'e'uai lalo'auna 'eva ia kevatai vaka bemimia, inoku lau vaka ia nuatai bamimia.”