Vali Nama'ina
MALEKO
Eleleia Kauna
Puka Laloana Ilelena Luvana
Vali nama'ina kanania Maleko eleleia, ena luva makavata laloatai kanania eluva koma, “Iesu Keliso Dilava Nakuna Valina Nama'ina.” Puka kanania laloanai 'eva ekaikabasi Iesu 'eva maiena siavu dava boutai bevavai. Kau evamaleleta melalatai, ka'uba si'avata vaika elo'ota asi melalatai, mai kau eta si'avana e'ou kao melalatai ena siavu 'eva ekaikala. Iesu sibona e'aeia Kau Nakuna, ia easi sibona evenia kau boutai betavata 'udai si'avana enai beluvuta ovo 'ounai.
Maleko sibona ena ula luvata 'eva doutamo sia eluvata, beia komolonai Iesu ena vinaula valina eluvaia. Lava'ana'ina Maleko eta'u Ioane vadi'u kabukabu kauna lovana eaku, mai Iesu aeidi'u kabukabu koma mai Satani ia evakovoa kauna lovana eakuia. Inoku Iesu eta'u kau mekau doutamo devuata kauta elalota, inoku evamaulita mai evamaleleta. Makavana 'eva mulinai deda'a kauta Iesu dava evavai ovota sia deovo, beiamo 'uluta asi'i ia ita dea'a ka'ona eda'amo deikabasia kave'i. Ia de'ovenia kauta kataua eta badu 'eva namanamo eao eda'a. Puka kanania to'onai 'eva Iesu ena ba mai ena ko'isi 'udai lovata eaku.
Puka Iduvuna Namata
a. Vali imakavana. (1.1 - 13)
b. Iesu ena vinaula kau kevatai Kalilea laloanai. (1.14 - 9.50)
c. Kalilea eda'amo Ielusalema. (10.1 - 52)
d. Masi to'ona Ielusalema enai mai laloanai. (11.1 — 15.47)
e. Iesu ena ko'isi 'udai. (16.1 - 8)
f. Lovia namana ena la'asi mai ena ele'au vutuvutu. (16.9 - 20)
1
Vaidi'u Kabukabu Kauna
Ioane Eilolo.
Ioane Eilolo.
(Mt 3.1-12; Lk 3.1-18; Io 1.19-28)
1 Dilava Nakuna Iesu Keliso valina nama'ina lava ana'ina 'eva kanania. 2 Enolea kauna Isaia eleleia ediaka,
“Dilava ediaka, ‘ E'u veauneke kauna asinia 'ana'i evavasi,
emu dala beva'olua kave'i.’
Mal 3.1
3 Lele ka kano'akunai e'ae'ae ediaka,
‘Lovia namana ena dala ova'olua.
Ena da'a dalana ovakomoloa.’ ”
Isa 40.3
4 Kanaua 'ounai Vaidi'u kabukabu kauna Ioane kano'akunai evailaasi, evaidi'u kabukabu mai eilolo ediaka, “Emui si'avanai olalo 'udai, oi boidi'u kabukabu, Dilava emui si'avana be'ou kao.” 5 Kau doutamo Iudea kanonai mai Ielusalemai deda'a Vaidi'u kabukabu kauna Ioane lelena deika, eta si'avana de'ou dae, mai Iolidana nutunai evaidi'uta kabukabu.
6 Ioane evadodoa tubu'ana 'eva Kamela vuina. Kukuana 'apana 'eva Bolomakau avana, ena iani 'eva 'oasi'o mai metunu veina. 7 Kau vailatai kanania eilolo koma. “Kau ka lau muli'uai be'asi kauna 'eva lau e'u siavu bekeinia. Lau 'eva sia anama'ina vaika batoludivo ena tamaka valonata baluluvu. 8 Lau 'eva oi veiai avaidi'umui kabukabu, beia ia 'eva Idume Kabukabunai bevaidi'umui kabukabu.”
Iesu Eidi'u Kabukabu
Mai Satani Ekovoia.
Mai Satani Ekovoia.
(Mt 3.13; 4.11; Lk 3.21-22; 4.1-13)
9 Melala kanaua'i Iesu 'eva Kalilea kanona ka Nasaletai easi. Ioane eta'u evaidi'uia kabukabu Iolidana nutunai. 10 Iesu veiai ele'au koanai, vutuvutu eviluvu eikaia mai Idume Kabukabuna e'ovu easi ia akanai ikana vitaitana boiomalo boina. 11 Maivaka lele ka vutuvutuai easi, ediaka, “Oni 'eva Lau Naku'u, e'u lalo'au. Lau oni alalonama venimu vaika.”
12 Komolonai Idume Kabukabuna Iesu evada'ala deda'a kano'akunai. 13 Iesu ua'i emia melala vaninavui, Satani ia evakovoa, 'asi davata ita demia, beia anelu deasi inoku deduluia.
Iesu Va'eka Kauta Vani E'aeta.
(Mt 4.12-22; Lk 4.14-15; 5.1-11)
14 Vaidi'u kabukabu kauna Ioane vabuto'o lumanai de'alavua mulinai, Iesu 'eva eda'a Kalileaai Dilava valina nama'ina eilolo vaia. 15 Ediaka, “Luva 'ana'i bonina 'ani ele'au, Dilava ena lovia vanuana 'ani ekevai, emui si'avanai olalo 'udai, Vali Nama'ina ovamomo'aia.”
16 Iesu Kalilea 'ovu nabuanai eda'a laloanai, Simona mai kadina Andelea ita eikata, vuo 'ovuai denaia, 'olana laluana 'eva va'eka kauta. 17 Iesu e'outa ediaka, “Muli'uai omai, lau batata'u oi kau iva'ekata bavaikabasimui.” 18 Alimo eta vuo devikanita mulinai deda'a.
19 Ia eda'a ilulao Sebedaio nakuna Iakobo mai kadina Ioane ita eikata asiai eta vuo delaume. 20 Inoku Iesu komolonai laluana e'aeta, kamata Sebedaio mai vinaula melota asiai devikanita ia mulinai deda'a.
Iesu Kau Ka Nuanai ka'uba Si'avana Vaika Elo'oia Asi.
(Lk 4.31-37)
21 Iesu mai ibanona kauta ita deda'a Kapelanauma vanuanai. Melala Kabukabunai Iesu 'eva Iuda kauta eta lo'e laloanai eda'adodo inoku evaikabasi. 22 Kau kataua ena vaikabasi 'uluta deika koanai detabulovo si'asi'a, 'olana ena vaikabasi 'eva maisiavuta, mai sia talavatu de'olavaia kauta boita.
23 Kau ka nuanai ka'uba si'avana emia kauna edodo lo'e laloanai inoku evaoi ediaka, 24 “Iesu Nasaleta kaumu e! O'ula dava kevamaiai? Oni lai bovasi'avanamai 'ounai oasi, una? Aikabasi oni 'eva dai, oni 'eva Kabukabu kaumu Dilava edilamu.” 25 Iesu ka'uba si'avana e'ovenia ediaka, “Lele vunu, kau kanana nuanai la'asi!” 26 Ka'uba si'avana kau kanaua eva'ululu si'ala, evilavila si'asi'a inoku kau kanaua nuanai ela'asi. 27 Kau ua'i boutai detabulovo si'asi'a, ka ka sibota devilavuai viveni dediaka, “Kanania 'eva dava? Vaikabasimo makamakata vaida mai siavuta. Ka'uba si'avata vaika e'outa koanai lelena de'ika.” 28 Kanaua 'ounai Iesu valina alimo Kalilea kanona itoina laloanai dekavaia odaoda.
Iesu Kau Dounamo
Evanama'inata.
Evanama'inata.
(Mt 8.14-17; Lk 4.38-41)
29 Iesu ibanona kauta Ioane mai Iakobo ita lo'e devikania komolotai deda'a Simona mai Andelea eta lumai. 30 Simona lavana ateatena 'eva e'olele, kauna desiavu ena lumai eno. Iesu easi koanai, ena 'olele luvana de'ouia. 31 Iesu eda'a ia kevana, imanai eabi eduluia evelia kole. Kauna siavuta deole, ateate eko'isi inoku eta iani evavai.
32 Melala eulu lavilavinai 'olele kauta mai kau nuatai ka'uba si'avata vaika demia kauta devada'ata deda'a Iesu kevana. 33 Vanua kauta boutai deasi luma kanaua vailanai dedo'u. 34 'Olele edeata edeata kauta doutamo Iesu evanama'inata, maivaka ka'uba si'avata vaika doutamo elo'ota asi, beia ka'uba si'avata vaika 'eva Iesu deikabasia 'ounai e'alavuta sia beluluva.
Iesu Kalileai Eilolo.
(Lk 4.42-44)
35 'Avu'avuni vabulanai, sia elani kave'i koanai Iesu eko'isi luma evikania, eda'a 'abu 'akuna kai, ua'i emeamea. 36 Beia Simona banona ita dela'asi ikavuna deda'a. 37 Inoku dedavalia koanai de'ouia dediaka, “Kau boutai 'eva oni dekavumu.” 38 Beia Iesu eta luva evamuea ediaka, “Ita kada'a vanua kevatai kataua, laloatai vaka bailolo, vinaula kanania dainai asi.” 39 Iesu 'eva Kalilea laloana itoinai eda'aia, Iuda kauta eta lo'e laloatai eilolo mai ka'uba si'avata vaika kau nuatai kataua elo'olo'ota asi.
Iesu Loki Kauna Evanama'inala.
(Mt 8.1-4; Lk 5.12-16)
40 Loki kauna ka easi Iesu vailanai ekuidula, enoia ediaka, “Bema bo'ula koanai, bomavanama'ina'u.” 41 Iesu eikaia elaloia, 'ounai imana eisia lao eabia kovo, e'ouia ediaka, “'O. Lau a'ula bonama'ina. Kaumu enama'ina!” 42 Alimo loki kau kanaua evikania, kauna enama'ina. 43 Iesu kau kanaua esinia koanai e'ouia kao ediaka, 44 “Lele'u o'ika, kau ka vailanai sia boluva kovo. Komolomuai boda'a Kabukabu kauna kevanai, kaumu beikala. Mose ena talavatu vitaitana, onama'ina 'ounai ainama Dilava bovenia oni emu nama'ina ivamomo'aina.” 45 Beia kau kanaua eda'a 'abu bounai ena nama'ina valina ekavaia odaoda. Ena valikava kanaua 'ounai Iesu 'eva vanua laloatai sia eda'adodo. Ia 'abu 'avaeatai mo emia, 'abu edeata edeata kauta 'eva deda'a kevana.