Paulo Ena Malele
PILIPO
Kauta Kevatai
Puka Laloana Ilelena Luvana
Pilipo 'eva vanua namana ka Makedonia ai (Veauneke 16), Paulo eta'u vali nama'ina eilolo vaia 'abuna. Kanaua mulinai, eda'a 'abu ka 'eva vabuto'o lumai dekapoia dodo, inoku vali eika 'eva kau vaida deta'u Pilipo kauta eta abiveni devaedeanala. Beiamo puka kanania laloanai adedua kataua sia eka davali. Paulo ena abiveni 'eva Iesu enai e'uleia dokadoka, kanaua 'ounai ia 'eva nuana nama'ina. Paulo ena mauli laloanai 'eva eanana, eulalu mai kauani davata eulavenita.
Kanaua 'ounai puka kanania ilelenai 'eva Paulo ena ula nama'ina luvana nama'ina beveveni 'olana Pilipo kauta eta vidulu ia kevanai 'eva namavaikana 'ounai. Mai dava ka 'eva, Paulo ena ula namana 'eva eta abiveni bekula'ila 'udai belava 'ini, 'olana asi'i demalalovaia Paulo 'eva vali'u vabuto'o lumana laloanai inoku asi'i demavilalo 'udai. Paulo ia e'outa, vidulu kanaua Dilava kevanai dedavalia 'eva mauli makamakana inoku kanaua 'eva Keliso enai dedavalia. Paulo ena ula namana 'eva Pilipo kauta Keliso ena koakoa mai ena vinaula beabita bemauli vaita. Keliso sibona nuana evamanaua, inoku vinaula kanaua Dilava ia evenia davana bevaolea kave'i.
Puka Iduvuna Namata
a. Lova aku. (1.1 - 11)
b. Paulo sibona ena mauli pasisina. (1.12 - 26)
c. Mauli Keliso enai davana. (1.27 — 2.18)
d. Timoteo mai Epapolodito ita eta luva. (2.19 - 30)
e. 'Ou kauta mai si'avana luvata. (3.1 — 4.9)
f. Paulo mai ena kau Pilipo kauta. (4.10 - 20)
g. Luva to'ota. (4.21 - 23)
1
Vanama'ina Luvata Paulo
Ena Lelelele Pilipo Etai
1 Paulo mai Timoteo, lai Keliso Iesu ena da'ala iabina kaumai, oi Dilava ena kabukabu kaumui boumuiai, ikakao kauta mai diakono kauta Pilipo ai oi omimia Keliso Iesu oi oabiveni kaumui 'eva malele kanania lai alele venimui. 2 Lai ameamea Dilava ita kamata mai Lovia namana Keliso Iesu 'eva iulaveni mai nua'elu ai bevanama'inamui.
Paulo Pilipo Kauta
Daitai Emeamea
3 Lau alalovaimui melalata boutai koanai e'u Dilava avanama'inala. 4 E'u meamea boutai laloatai 'eva oi boumuiai daimuiai melala boutai mailalonama'u ita ameamea, 5 'olana emui vidulu vinaulana vali nama'ina vinaulanai melala makavanai easimo vali'u, 6 kanaua'i aikabasi dokadoka, Dilava 'ani vinaula nama'ina kanaua nuamuiai emakavala kauna vinaula kanaua bevavaia beda'amo Iesu Keliso ena mue 'udai melalanai bevaolea kave'i. 7 Dala kanania'i e'u lalovai lalovai boumuiai kevamuiai 'eva ekomolo, lau nua'uai oi alalovaimui kao, 'olana vali'u lau avabuto'o 'o vali nama'ina 'eva momo'aina kanaua bavaikata une mai vali nama'ina ivamomo'aina, oi boumuiai 'eva Dilava ena iulaveni laloanai lau ita oi ovikole viveni. 8 Lau Iesu Keliso nuanai boumuiai a alalo'au venimui koma mai e'u ula bamaikamui 'eva Dilava eikabasi.
9 Inoku e'u meamea 'eva kanania. Emui lalo'au 'eva bekubu basibasi ikabasiai mai nuakomoloai, 10 kanaua 'ounai oi 'eva dava nama'ita umauta oi bodilata, nuamui bemakamaka mai va'evai sia oi bodododo beda'amo Keliso ena mue 'udai melalanai. 11 Iesu Keliso enai vinaula komolo ai de'asi vuavuatai bevavonumui, 'olana katania betata'u 'eva nuavi mai vanama'ina doutamo Dilava bevenia.
Paulo Vabuto'o Lumanai Emia
Vali Nama'ina Idulunai Eao.
12 Bo'akala'u e, lau a'ula oi boikabasi, dava keva'uai epulu davana kanaua 'eva vali nama'ina ikavanai eao. 13 Kanaua 'ounai lovia 'olana Kaisala ena luma itoina i'imana kauta mai kau boutai deikabasi lau 'eva Keliso dainai avabuto'o. 14 Lau 'eva avabuto'o dainai, bo'akalata doutamo Lovia namana enai nuata devakula'ilata mai sia demakau Dilava luvana maikula'ilata deluvavaia.
15 Luva umauna 'eva vaida Keliso valina mama ai mai vialai lau dai'uai deilolo vaia, beia vaida 'eva nuata nama'itai deilolo vaia. 16 Vaida katania 'eva lalo'auai deilolo vaia, deikabasi Dilava eveni'u vinaulana 'eva vali nama'ina momo'aina umauna bavaikata dainai. 17 Vaida kataua 'eva Keliso valina sia nuata nama'itai deilolo vaia, ia eta ula 'eva vata beabisi, mai eta lalovai 'eva vabuto'oai amimia laloanai e'u anaana bemavanamala. 18 Dala davai, va'evanai 'o momo'ainai de'iuvai 'iuvai, beia luvana asi'i, dava namana 'eva Keliso valina 'ani deilolo vaia. Lau alalonama 'olana kanaua. 'O, lau 'eva balalonama basibasi.
19 'Olana lau aikabasi emui meameai maivaka Iesu Keliso Idumena ena vidulu ai, dava keva'uai epulu davana betata'u bevala'asi'u. 20 E'u ula namana mai e'u nuabata 'eva kanania e'u vinaula laloatai sia bamalalai, beia bakula'ila vaika, kanaua 'ounai melala boutai vitaitanai vali'u Keliso 'eva kauani'u ai babia isi, mauli'uai 'o ba ai. 21 'Olana Keliso 'eva e'u mauli laloanai inoku mauli'uai 'o bai ai 'eva nama'ina badavalia. 22 Bema lau kauani maulinai bamauli, kanania anina 'eva lau vuavua vinaulata nama'ita doutamo bavavai, lau sia aikabasi davana 'eva babia. 23 Lau 'eva 'abu lua viloatai amimia, aula vaika mauli kanania bavikania inoku Keliso kevana bada'ala, kanaua keva'uai 'eva benama'ina. 24 Beia mauli'u ai amimia 'eva dava namana umauna emui nama'ina dainai badulumui. 25 Lau avamomo'aia 'eva kanania, lau 'eva mauli'uai bamimia inoku oi boumuiai badulumui, ekavaka'onamo emui lalonama abiveninai mai ivakubunai. 26 Kanaua 'ounai lau bamue 'udai ba'asi kevamuiai koanai, Keliso Iesu laloanai emui apa 'eva namana be'ao lau dai'uai.
27 Dava namana 'eva kanania, Keliso ena vali nama'ina dainai sibomui koakoa nama'itai ovada'amui kave'i. Inoku bavavasi baikamui 'o sia bavavasi itani valimui mo bamaika, lau a'ula baikabasi oi 'eva lalovai ka'onamoai oi olava 'ini mai vali nama'ina iabiveninai oi okuali. 28 Emui 'ou kauta sia oi bomakau venita, oi bokula'ila. Kanaua 'eva ia eta ba koana, beia oi kevamuiai 'eva mauli koana Dilava kevanai e'asi. 29 Keliso dainai eainama venimui 'eva sia ia iabiveninai mo, beia ia dainai vaka oi boanana. 30 Oi mai lau 'eva kavaka'onamo bavunu vitaitana kanania laloanai, kanaua 'eva 'ana'inai oi oika'u abavunu vitaitana, vali'u vaka oi o'ika lau abavunu do'o mo.

© 2024 GBT