Keliso Ena Luva
IVALA'ASINA
Ioane Kevanai
Puka Laloana Ilelena Luvana
Puka kanania 'eva melala kanaua'i abiveni kauta Lovia namana Iesu Keliso deabivenia dianai devaana-ana sia'ata laloanai eleleia. Puka kanania 'olana 'eva ana-ana kanaua laloanai ia bevakula'ilata inoku eta abiveni sia bevikanita. Puka kanania laloanai luva ivavitaitata doutamo, dava muliai bepupulu 'o 'ani depulu davata luvata eluva. Ivavitaitata kataua eta vinaula umauta 'eva katania. Iesu Keliso 'eva Lovia namana, inoku ia imanai Dilava betata'u ena 'ou kauta boutai bekaokaita, mai Satani vaka kanaua bekaokaia koma. Inoku Iesu vinaula katania boutai bevaoleta 'eva Dilava betata'u delava 'ini kauta kataua mai eta abiveni sia deva'ekoasi kauta akatai nama'ita bevenita. Ia 'eva Dilava ita bemimia, mekau mai ana-ana 'eva beasi'i, 'olana Dilava 'eva dava boutai bevaedeanata bemakamaka.
Puka Iduvuna Namata
a. Lova aku. (1.1 - 8)
b. Enolea iluvuna mai lo'e kabukabuta 7 eta malele. (1.9 — 3.22)
c. Puka i'ouna mai i'alavuna 7. (4.1 — 8.1)
d. Bisi 7. (8.2 — 11.19)
e. Dragona mai aivala sisita lua. (12.1 — 13.18)
f. Ikata edeata edeata. (14.1 — 15.8)
g. Dilava ena badu voduta 7. (16.1 - 21)
h. Babulonia e'eko. (17.1 — 20.10)
i. Lavuai namana to'ona. (20.11 - 15)
j. Vutuvutu, kanobata, mai Ielusalema makamakana. (21.1 — 22.5)
k. Luva to'ota. (22.6 - 21)
1
Puka Valina Ikavana Luvana.
1 Kanania 'eva Iesu Keliso evala'asia luvana, kanaua 'ounai ena da'alaabi kauta bevaikata davata 'eva alimo bepupulu. Iesu ena anelu esinia eda'a ena da'alaabi kauna Ioane evaikabasia, 2 Ioane eta'u Dilava ena luva mai Iesu Keliso enai depulu davata boutai eikata kataua 'eva e'outa dae.
3 Enolea luvata katania bevakuta kauna 'eva benama'ina, maivaka lelena de'ika kauta mai dava ilelena 'eva deabia nuatai de'ule kauta kataua 'eva denama'ina, 'olana melalana 'ani ekevai.
Ioane Malele Eleleia Eda'a
Dilava Ena Lo'e Kabukabuta
Kalakoika Kevatai.
Dilava Ena Lo'e Kabukabuta
Kalakoika Kevatai.
4 Lau Ioane, Dilava ena lo'e kabukabuta kalakoika 'Asia kanonai alele venimui. Ia enai oi iulaveni mai nua'elu 'ani bevenimui Dilavana 'eva vali'u emimia, mai 'ana'inai emia, mai ia vaka 'eva 'ani beasi, mai ena mia'au 'abuna vailanai idume kalakoika etai, 5 mai Iesu Keliso enai, ia 'eva abiveni ivamomo'aina kauna, ba kauta viloatai ia makava ba ai eko'isi 'udai, mai kanobata loviata 'olata eta lovia 'olana.
Elalo'au venita inoku ia lalana ai ita eta si'avana ai 'ani eva'avaeata, 6 mai ita 'ani lovia vanuana mai kabukabu kautai evaaota ena Dilava mai Kamana da'alata eka abi. Iesu Keliso kevanai nuavi mai siavu bemia keini keini! Amen.
7 Oikaia, Iesu 'eva oli ita e'asi,
mai kau boutai makata
'eva ia beikala,
duluna dekoia kauta vaka
ia beikala, mai ia dainai kanobata
kauta boutai 'eva bekakani.
Momo'ai dokadoka kanania
'eva bepupulu, Amen.
8 Lovia namana Dilava eluluva ediaka,
“Lau 'eva 'Alepa mai 'Omeka,
Makavana mai To'ona.
Lau 'eva vali'u amimia,
makavanai vaka amia
maivaka vailai ba'asi,
siavu boutai Dilavana.”
Ioane Keliso Eikaia.
9 Lau Ioane, oi bo'akalamui mai banomui anaana laloanai mai lovia vanuana laloanai mai manau ai vapasisi kanaua 'eva ita eta Iesu dainai, Dilava ena luva mai Iesu valina avala'asia 'ounai Patamo motumotunai de'ule'u amimia. 10 Lovia namana ena melala ai lau 'eva Idume ai akukudivo, inoku lele ka namana muli'uai aika itani bisi ka 'uluna boina, 11 ia ediaka, “Oikata davata 'eva puka ai leleta inoku bosinita beda'a Dilava ena lo'e kabukabuta kalakoika vanuata katania kevata, Epeso, Semulana, Pelekamo, Tuatila, Sadi, Piladelepia, mai Laodikea.”
12 A'ilo'u 'udai lele eluva veni'u kanaua baikala akoma. Inoku a'ilo koanai kolo lamepata ivalavata'au davatai kalakoika aikata, 13 inoku lamepa ivalava'auta davata viloatai 'eva kau ka “itani Kau nakuna boina,” tubu'a lakavaikana evadodoa e'ovu eda'a aena palapalata edavalita inoku kolo 'apana ai pedena edo'oia keini. 14 'Olana mai vuina 'eva dedeva'i ovo itani dapulu boina, vitaitana oli deva'ina boina, mai makana 'eva itani 'alova evuvule boina. 15 Aena 'eva itani kopa 'alova laloanai e'ita e'amale 'amale boina, mai lelena 'eva itani ka'uda namata depouta'au 'uluta boina. 16 Imana idibanai visiu kalakoika eabita, kuali lepona makana aveke aveke de'ano lepona nutunai ela'asi. Ia vailana 'eva itani ado'alavuni melala ekakala 'ailalana boina.
17 Ia aikaia koanai, a'eko aena 'olanai apakadivo itani aba boina. Inoku ia imana idibana kau'uai ekao'au inoku eluva ediaka, “Sia bomakau, lau 'eva makavana mai to'ona. 18 Lau 'eva mauli kau'u, lau 'eva aba, beia vali'u lau 'eva bamauli keini keini! Inoku lau 'eva ba mai mitava kita abita. 19 Kanaua 'ounai, dava 'ani oikata 'eva leleta 'au, vali'u depupulu davata mai muliai bepupulu davata. 20 Visiu kalakoika ima'u idibanai mai kolo lamepata ivalava'auta davata kalakoika oikata. Katania 'eva luva vunita inoku anita 'eva kanania boina. Visiu kalakoika 'eva Dilava ena lo'e kabukabuta kalakoika aneluta, mai kolo lamepata ivalava'auta davata kalakoika 'eva Dilava ena lo'e kabukabuta kalakoika.”