4
Dilava Vutuvutuai
Dekukudivo Venia.
Dekukudivo Venia.
1 Dava katania mulitai, akailao vutuvutuai 'eva nutuala ka iluvuna elava vaila'uai aikaia. Inoku lele 'ani eluva veni'u makava kanaua lelena aika 'eva itani bisi ka 'uluna boina eluva ediaka, “Ele'au mai nia'i, inoku katania mulitai 'eva dava 'ani bepulu davata bavaikamu.” 2 Komolonai Idume Kabukabuna evada'a'u, inoku ua'i vaila'uai 'eva lovia imia'auna 'abuna ka vutuvutuai aikaia mai kau ka 'eva akanai emia. 3 Inoku ua'i emia'au kauna 'eva ikana e'ailala vaika itani bika'a nama'ita vaika vata daiamoni e'ailala mai lubi e'aola boina. Boualo lovia imia'auna 'abuna kanaua enoiakaiu, ikana 'eva e'ailala vaika itani bika'a nama'ina vaika vana 'emeladi boina. 4 Lovia imia'auna 'abuna kanaua 'eva lovia imia'auta 'abuta luanavui vani vaka demiaia kaiukaiu, inoku kau 'aida'aidata luanavui vani lovia imia'auta 'abuta kataua akatai demia'au, tubu'a deva'ita devadodo mai 'olatai 'eva lovia i'olata davata kolo ai ivavaita devadodota. 5 Lovia imia'auna 'abunai e'amalea, e'uluia mai aika eaku kao easi. Lovia imia'auna 'abuna vailanai 'eva lamepa kalakoika deani maivulevuleta. Katania 'eva Dilava idumena kalakoika. 6 Maivaka lovia imia'auna 'abuna vailanai ua'i 'eva dava ka ikana itani 'atu eanevaovo kalasi boina, eaneva vaika itani bika'a nama'ina vaika vana kilisitala boina.
Bo'adai 'eva mauli davata vani lovia imia'auna 'abuna delavaia kaiukaiu, inoku ia vailata ai mai mulita ai 'eva maka ai ekaiutaavu. 7 Mauli davana makavana 'eva itani laioni boina, ivaluana 'eva itani bolomakau boina, ivakoina 'eva maivailana itani kau vailata boina, ivavanina 'eva itani bo'ibata elolovo boina. 8 Mauli davata vani kataua 'eva ka ka vanita kalakoi inoku vanita kataua laloata mai mulita 'eva maka ai ekaiutaavu. Boni mai lani ia lata sia de'ani, ia dediaka,
“Kabukabu, kabukabu,
kabukabu 'eva Lovia namana
Siavu bounai Dilavana,
Ia 'eva emia, emimia,
mai be'asi kauna.”
9 Mauli davata katania detata'u lovia imia'auna 'abuna akanai emia'au kauna mai emia keini keini kauna kevanai nuavi, 'olaaku mai vanama'ina luvata deveveni koanai, 10 'aida'aidata kauta luanavui vani detata'u lovia imia'auna 'abuna akanai emia'au kauna vailanai dekuidula, inoku emia keini keini Dilavana dekukudivo venia. Eta lovia i'olata davata dekapota lao lovia imia'auna 'abuna vailanai, inoku dediaka,
11 “Emai Lovia namana
mai emai Dilava e,
oni 'eva maiemu komolo,
nuavi, 'olaaku mai siavu boabita,
oni dava boutai ovavaita dainai,
mai emu ula ai dava boutai
depulu inoku demauli.”