Paulo Ena Malele
LOMA
Kauta Kevatai
Puka Laloana Ilelena Luvana
Paulo eta'u puka kanania eleleia 'olana ena ula 'eva beda'a abiveni kauta doutamo vaida Loma vanuana namanai kauta beikata. Ena ula 'eva beda'a ita kena bemimia vakaia beda'a Sipeini (15.23, 24). Puka kanania laloanai Paulo eta'u Keliso Valina nama'ina eluvaia asi kave'i, mai Iesu mulinai deda'a kauta kataua eta mauli abekoma.
Makavana 'eva vanama'ina luvana abiveni kauta doutamo Lomai demia kauta kevatai eluvavaia. Epua mulinai puka anina luvana umauna kanania eluvaia kave'i koma, “vali nama'ina laloanai komolo Dilava enai easi davana ela'asi, abiveniai ekamakavaia beda'amo to'ona.” (1.17) Maivaka Paulo ediaka, kau kataua Iuda kauta 'o pulu edea kauta boutai 'eva si'avana kauta. Kanaua 'ounai Dilava eta'u ia elalota vaika, e'aeta 'udai Iesu Keliso beabivenia kauta 'eva Dilava betata'u ia bevamaulita.
Puka elena 5 — 8 laloanai Paulo eta'u Dilava ena anina mai Idume Kabukabuna abiveni kauta eta mauli laloanai davana lovana eakuia. Elena 9 — 11 'eva Paulo sibona ena mekau namana ka lovana eakuia, kanaua 'ounai Iuda kauta kataua Dilava edilata ia ena kau ai be'ao kauta doutamo Iesu deda'a mulili venia. Maivaka pulu edea kauta 'eva deasi Iesu ibanona kautai deao, beia Iuda kauta 'eva asi'i. 'A Paulo ena abiveni 'eva muliai Iuda kauta be'asi Iesu ena kauai be'ao. Puka kanania to'onai 'eva Paulo eta'u koakoa mai vinaula abiveni kauta beda'avai kauta lovata eaku.
Puka Iduvuna Namata
a. Lova aku mai luvaluva namata. (1.1 - 17)
b. Kau vamauli beabia 'eva dava namana. (1.18 — 3.20)
c. Dilava ena vamauli dalana. (3.21 — 4.25)
d. Mauli makamakana Keliso enai. (5.1 — 8.39)
e. Isalaela kauta Dilava ena lalovai laloanai. (9.1 — 11.36)
f. Abiveni maulina. (12.1 — 15.13)
g. Luva to'ota mai vanama'ina luvata. (15.14 — 16.27)
1
Paulo Ena Veauneke Vinaulana
Valina Eluvavaia.
Valina Eluvavaia.
1 Lau Paulo e'u malele kanania. Iesu Keliso ena da'ala iabina kau'u, ena veauneke kaunai ba'ao 'ounai Dilava edila'u e'ae'u ena vali nama'ina bailolo vaia.
2 Vali nama'ina kanania 'eva Dilava eta'u 'ani siako eluva'ana'i vaia ena enolea kauta nututai deluvavaia Puka Kabukabunai deleleia vitaitanai, 3 ia Nakuna valina, eta Lovia namana Iesu Keliso, kauai epulu Davida kekenai easi, 4 ia idumena kabukabunai 'eva ba ai evako'isia inoku evamomo'aia maisiavuna ia 'eva Dilava Nakuna. 5 Iesu Keliso dainai mai ia vanai vidulu namana mai veauneke koana 'ani lai abia, kanaua 'eva pulu edea kauta viloatai kau boutai lai ba'aeta beabiveni mai ia lelena be'ika. 6 Dilava eta'u e'aeta kauta viloatai oi vaka ua'i Iesu Keliso enai.
7 Loma ai oi omimia Dilava elalo'au venimui e'aemui ena kauai eva-aomui kaumui boumuiai, Kamata Dilava mai Lovia namana Iesu Keliso kevatai vilalo koana maivaka nua'elu oi boabia.
Paulo Eula Beda'a Loma.
8 E'u luva lava'ana'ina kanania: Iesu Keliso vanai e'u Dilava avanama'inala oi boumuiai daimuiai, 'olana oi emui abiveni valina kanobata bounai 'ani deika. 9 Dilava mainua'u bounai da'alana a'abi kanaua Nakuna valina nama'ina ailolo vaia Dilavana eikabasi e'u meamea ai lau oi alalovaimui, 10 melala bounai e'u meamea ai Dilava anoia ena ulai dala'u bemaluvua melala ka bamavasi bamaikamui. 11 'Olana lau e'u ula namana baikamui, idume ena ainama bavenimui inoku bevakula'ilamui. 12 Ua 'eva lau oi viloamuiai bamimia laoanai lau mai oi ita sibota ekavidulu viveni, eta abiveniai ka ka ekaduluta.
13 Bo'akala'u e, lau a'ula oi boikabasi, melala doutamo aula bavasi kele'emui, idume vuavuana badavali itani pulu edea kauta vaida eta mauli deveni aikata boina, beia dava vaida deta'u de'alavu'u easimo vali'u. 14 Lau 'eva vali nama'ina ikavanai tava baveveni kau boutai kevatai, 'Elene kauta mai 'ailala asi'i kauta maivaka nuata de'avaea kauta mai aoneka kauta kevatai. 15 Kanaua 'ounai lau aula vaika oi Loma ai oi omimia kaumui vailamuiai vaka vali nama'ina bailolo vaia.
16 Lau vali nama'ina sia amalalai vaia, 'olana ia 'eva Dilava ena siavu, abiveni kauta boutai bevamaulita, lava'ana'ina 'eva Iuda kauta, muliai 'eva puluedea kauta. 17 'Olana vali nama'ina enai komolo Dilava kevanai easi davana ela'asi, abiveniai emakavala beda'amo to'ona, puka kabukabunai deleleia boina, “Komolo kauna 'eva abiveniai bemauli.”
Dilava Ena Badu Kau Etai.
18 Kau eta da'amulili mai vavai si'asi'a 'outai Dilava ena badu vutuvutuai evala'asia, eta koakoa si'avatai luva umauna dekaokaia kauta etai. 19 Dilava ikabasina ia etai 'eva makanaimo, 'olana Dilava eta'u evaikata. 20 Makavanai kanobata epulu easimo vali'u Dilava enai sia ka'ika davata kataua 'eva ena miakeinikeini siavuna mai idume maulina 'eva ia evavai davata laloatai dela'asi kave'i deikata deikabasita, kanaua 'ounai kau be'ouavuavu 'eva dalana asi'i.
21 Dilava deikabasia beia sia deabia dae maivaka sia devanama'inala ia 'eva Dilava, 'ounai nuata de'avaea mai nuata lalovaita si'avatai vabuto'o eta'u nuata e'alavua. 22 Ia sibota delalovaia deaoneka, beia ia 'eva bo'o kautai deao. 23 Miakeinikeini Dilavana ikukudivo venia 'eva debolabolala, ia kau va'ava'ata sia bemiakeinikeini kauta, manumanu, sisi, delalau davata, mai va'ava'a imatai devavai davata dekukudivo venita.
Kau Vinaula Si'avata Vaika
Edeata Edeata Devavai.
Edeata Edeata Devavai.
24 Kanaua 'ounai Dilava eta'u nuata si'avana eula venia 'abunai evikanita, inoku sibota eta koakoa si'avata vaika pedata vinaulata ka ka kevatai bevavai. 25 Dilava ena luva umauna 'eva ia deta'u dede davanai devaoa, beia Dilava dava evavai davata dekukudivo venita da'alata deabi. Beia evavaita kauna ia sibonamo ekavanama'inala beda'amo to'ona asi'i. Amen.
26 Dilava eta'u evikanita deda'a eta koakoa si'avata vaika laloatai. Eta 'a'ate deta'u 'a'ate dekulata kanaua sia bemakoma davana 'eva devavaia. 27 Dala vitaitanai momoluane vaka 'a'ate ita kamoanena sia deula, ia momoluane 'eva momoluane deula venita vaika. Momoluane sibota banota kevatai koa si'avata vaika devavai. Kanaua tavana 'eva eta koakoa si'avata daitai sibota mekauna dekoaia.
28 Ia nuatai 'eva Dilava ilalovai 'ininai sia deula venia, Dilava eta'u eta bo'o lalovaitai evikanita, sia demavavai vinaulata 'eva devavai. 29 Vinaula si'avata vaika edeata edeata nuatai devonu, koakoa si'avata vaika, 'oualavu mai lalovai si'avata vaika, mama, akuaku, viaku, dede mai nua vanana vinaulatai devonu. De'oukeinikeini, 30 mai ka ka vata devavai si'asi'a luvaluvai, Dilava devaiviivia, deaivala 'avaea, de'apa, maivaka deabitaisi, lalovai si'avata vaika 'abu vaidai delalovaita bevavai. Kamata mai sinata leleta sia deika. 31 Ia 'eva eta lalovailalovai asi'i, eta luva'ana'i sia deabi 'ini, mai kau etai 'eva nama'ina 'o vilalo sia devaikata. 32 Dilava ena talavatu deikabasia 'eva kau 'abu kanaua boinai demimia kauta 'eva bebaba. Beia si'avana kataua 'eva devavai basibasi inoku kau vaida devavai koanai devakula'ilata.