1 Pe iyamulan hape, Yesu isingondriti Ndran makaiye Kaliliyy iya haroh, (pe ngalan handra, ara Tiperiyus.) 2 Pwen hu ndramat soyo-soyon iya huro ndruwan, paratesah, hu nime hu ndraikiya kaipisa pwoke mepo kinmbusiy pwen iya kili hu ndramat humwa. 3 Pwen Yesu ingas iya parangondron sih pe impwan iya sura ndramiran hu. 4 Pe Lang Para Kasoulani lang para Pasopa tahu Yutah, ara kinsa pakeh.

5 Pe Yesu maran itandras pe inime hu ndramat soyo-soyon iya, huropo husa kili yiy, pwen ipwai iya kili Pilip ipa, “Andre tukasou ndrinanohun kiro aleheh para hu ndramat aripo hukayan?” 6 Yiy isok para kinohonou Pilip opu, hapeko kinpahasani tesah andre kimbusiy.

7 Pwen Pilip isomwi yiy ipa, “Kapa tukasowani ndrinanohun kiya singayai silwa*Kene ndramat hamou para hayou sahin malpou para kene ndramat kiho walah androlwoh, ara kinlahi hamou-hamou tahu kiyan pwi!”

8 Pwen ndramiran hamou ngalan Antruw, nali Simon Pita mendreheh, ipwai ipa, 9 “Wihou hamou iripo iye, ara ndrinanohun mayimbut, pe ni malmou mendreheh imira kili yiy. Hapeko andre kilahi hu ndramat soyon aro tapeh?” 10 Pe Yesu ipa, “Akapwai kiya kili hu ndramat para hukampwan.” Pe hape ariya, ara ndromndriu soyon iya iro aliy, pe hu ndramat kamai, ara humpwan huro ara, ara tehe mayipou (5,000). 11 Pwen Yesu iwiri ndrinanohun, irawuloh, pe itainganiy iya kili hu ndramat mepo huro pwan, pe hupo, ara iya namiliwa hu kopu. Pe imbusi tehen aliy o iya ni yi.

12 Pe huyan pe hu humosuhu, pwen ipwai iya kili ndramiran hu ipa, “Akambultani ndritikehu, pe mbuna akapwalnganiy.” 13 Pwen hu mbultani ndritike hu, ara iya ndrop mandropwa songui pe luhat iyau ndrinanohun mayimah mepo humbusiy iyau palei, pe iyau ndritike hu mepo hu kanyan pwen ara.

14 Pe iya mulan hu ndramat hu nime hu ndraikiya kaipisa pwoke mepo Yesu kinmbusiy, pwen huropa, “Ndrokonan masih, iye ara Poropet mepo Ngindrai ipa andre kisa kol pwan.” 15 Pe Yesu kinpahasaniy tehe hu pakasa para karakekeyani yiy para kirayah king tahu, pwen yiy mbukenan itali hu pe iyau iya ngondron sih.

16 Pe kol iropiyah, pwen ndramiran hu ara hulai huya ndran makaiye. 17 Pwen huya his iya nondriya ndroi hakou para hu kasingondriti ndran makaiye pe hukaya Kapernawum. Pe iro mwonen ara, ara kol kinlokuh, pe Yesu kinna rayah kinna kili hu mapu. 18 Pwen pe nohai pwokeyan imum pe nowei ara iro talon. 19 Pe hu popahau huya ndrohongan tehe kilomita yimingah ndre anongah, pwen hu nime Yesu, ara iro tokai ndrita ndran, iropo isa kili hu, pwen pe hunoh mimiri hu. 20 Hapeko ipwai iya kili hu ipa, “Wawu mbuna akanoh! Aripo yo kopu.” 21 Pwen hupwes para hu kawiri yiy kiya nondriya ndroi, pe indrou pwi ko, ndroi iya rayah iya poholeng mepo hu pakaya aliy.

22 Pwen iya lang sih i, hu ndramat soyon huro haroh para ndran makaiye, ara hu yirowei tehe ndroi hakou opu iro, pe Yesu, ara kinhis ndroi kinna polo ndramiran hu pwi, hapeko ndramiran hu kopu huyau. 23 Pe hu ndroi hayah para Tiperiyus, ara hu kansa pakeh kili kol mepo Yapan irawuloh iya ndrinanohun pe huyan huro aliy. 24 Pe iro mwonen hu ndramat soyon ara hu yirowei tehe Yesu pe ndramiran hu konto ariya pwi, pwen hu his huya hu ndroi pe huya Kapernawum para hu kaya ten Yesu.

25 Pe iro mwonen huya kahi yiy huya haroh para ndran makaiye, pwen husok yiy hupa, “Ndramat para hinonou, wou asa iye kahaleh?”

26 Pwen Yesu isomwi hu ipa, “Upwai ndrokonan isa kili wawu, wawu toraten yo, ara wawu kannime hu ndraikiya kaipisa pwoke pe wawu sa, ara pwi, hapeko wawu kanyan ndrinanohun pe wawu pep, pwen wawu sa. 27 Pe wawu mbuna akapo mbulen kiya anandrinai mepo andre kiya mwomwan, hapeko kiya anandrinai para taleh mepo andre kinto-kinto. Pe anandrinai ara, ara Noru Ndramat andre kihang wawu. Pe Norun, ara Ngindrai Tamarou kiniyki kinima songot para kipa hiyan kiyatan.”

28 Pwen husok yiy hupa, “Andre yowu kambusi tesah kiya mbulen mepo Ngindrai inamiliy?”

29 Pe Yesu isomwi hu ipa, “Mbulya Ngindrai, ara aro, para lohonga wawu kipwotisingi yiy mepo kinpwandrisa yiy kinsa.”

30 Pwen husok yiy hupa, “Sehe ndraikiya kaipisa pwoke andre ambusiy, pwen andre yowu kanimei pe andre lohonga yowu kipwotisingi wou kiya aliy? Pe andre ambusi tesah? 31 Pe tumbu yowu hu, ara huyan manna iro kol ndrohoyin, tehe pwayan kinpwai ipa: ‘Ihang hu ndrinanohun para kol paingan yang pe huyan.’†Rakuhuye 16:4, Nehemaya 9:15 Waliy 78:24,25 ”

32 Pwen Yesu ipwai iya kili hu ipa, “Yo upwai ndrokonan isa kili wawu tehe Mose, ara kiniyki ndrinanohun para kol paingan yang, ara pwi, hapeko Tomo, ara yiy mepo iyki ndrinanohun ndrokonan para kol paingan yang. 33 Pe ndrinanohun ta Ngindrai, ara yiy mepo iyau kol paingan yang isa pwan pe iyki taleh isa kili hu ndramat para kol pwan.”

34 Pwen hupa, “Namandran, ahang yowu ndrinanohun ara, lang masih.”

35 Pe Yesu ipwai ipa, “Yo ara ndrinanohun para taleh. Pe yiy mepo kisa kili yo, ara andre kinmundrui pwi, pe yiy mepo kipwotisingi lohongan kisa kili yo, ara andre koyun kinsapak pwi. 36 Pe tehe kunpwai kinsa kili wawu, wawu kannime yo, hapeko lohonga wawu kinpwotisingi yo mapu ko. 37 Hu ndramat masih mepo Tomo iykiy isa kili yo, ara andre hu kansa kili yo, pe andre kunrasse hu kanyau pwi. 38 Yo uyau kol paingan yang usa pwan, ara para kunmbusi namiliwo pwokeyan pwi, hapeko para kumbusi namiliwai pwokeyan ata yiy mepo ipwandrisa yo usa. 39 Pe iye, ara namiliwai pwokeyan ta yiy mepo ipwandrisa yo usa, tehe andre kuntali hamou tahu ndramat masih mepo kiniykiy hu pwen kansa kili yo, ara pwi, hapeko andre kuhingini hu katine kiro mwonen lang iya hapwen masih. 40 Pe namiliwai pwokeyan ta Tomo, ara hu masih mepo hu kanime Norun, pe hu kapwotisingi lohonga hu kiya kili yiy, ara andre hu kawiri taleh kinto-kinto. Pe andre kuhingini hu katine kiro mwonen lang nakiyahapwen.”

41 Pwen hu ndramira Yutah huhilingi nongnan mepo ipwai, pwen huro pangulungun soyon, paratesah ipa, “Yo, ara ndrinanohun mepo iyau kol paingan yang pe isa pwan.” 42 Pwen hupa, “Iye ara Yesu mepo noru Yosep kamai ara, mepo taman pe tinan tupahasani hilu? Pe paratapeh pe mahapo itapa, ‘Yo uyau kol paingan yang usa pwan’?”

43 Pwen Yesu isomwi hu ipa, “Wawu mbuna kapanguluwaniy mwalinga wawu. 44 Kinlahi ndramat hamou kinsa kili yo pwi, kipoo Tomo mepo ipwandrisa yo, ara kiluwi lohongan kisa kili yo. Pwen andre kuhingini yiy kitine kiro lang kiyahapwen. 45 Pwayan kinpwai pwen ita puk tahu poropet ipa: ‘Ngindrai andre kihinuwani hu.’‡Yisayah 54:13 Pe hu mepo huwiri hinonou pe huhilingi nongan iyau kili Tomo, ara andre hu kasa kili yo. 46 Pe hamou kinnime Tomo pwi, yiy mepo ata Ngindrai opu, ara yiy opu inime Tomo. 47 Pe upwai ndrokonan isa kili wawu, yiy mepo kipwotisingi lohongan, ara andre kiwiri taleh kinto-kinto. 48 Pe yo, ara ndrinanohun para taleh. 49 Pe tumbu wawuhu, ara huyan manna iro kol ndrohoyin, hapeko hu kanmat. 50 Hapeko iye, ara ndrinanohun mepo iyau kol paingan yang pe isa pwan, pe yiy mepo kiyan ndrinanohun iye, ara andre kinmat pwi. 51 Yo ara ndrinanohun para taleh, pe yo ara uyau kol paingan yang pe usa kol pwan. Pwen kapa hamou kiyan ndrinanohun iye, ara andre kiro mwalen lang masih. Pe ndrinanohun ara, ara nombuwe mepo andre kuikiy tehe taleh kiya kili hu ndramat para kol pwan.”

52 Pwen hu Yutah hurakokowai mwalinga hu hupa, “Tehen tapeh pe ndramat aro ipa andre kiyki sangin kisa kili worou pe tukayan?”

53 Pwen Yesu ipwai iya kili hu ipa, “Upwai ndrokonan isa kili wawu, kapa wawu kaniyan sangi Noru Ndramat, pe kanyin ndreyen pwi, pwen andre wawu konto mwalen pwi.

54 Hu mepo hu kayan sangi pe hu kaimwi ndreye, ara andre hu kawiri taleh kinto-kinto. Pe andre kuhingini hu katine kiro mwonen lang kihipwen. 55 Pe sangi, ara anandrinai ndrokonan, pe ndreye, ara ndran ndrokonan. 56 Pwen yiy mepo kiyan sangi pe kiyin ndreye, ara iripo sura yo, pe yo uta sura yiy. 57 Pwen tehe Tomo mepo ita mwalen ipwandrisa yo, pwen urupo mwalen ara iya pwoke ata Tomo kopu, pwen yiy mepo kiwiri yo tehe anandrinan, ara andre kiro mwalen, paratesah, iyau kili yo kopu. 58 Pwen iye, ara ndrinanohun mepo iyau kol paingan yang isa. Pe hu tumbu wawuhu, ara huyan manna pe humat, hapeko yiy mepo kiyan ndrinanohun iye, ara andre kiro mwalen kinto-kinto.” 59 Pe Yesu ipwai toro, ara iro mwonen iro hinuwani hu ndramat huro nondriya yumwa mbultere ta hu Yuta iro kol Kapernawum.

60 Pe iro mwonen huhilingi nongnan aro, pwen ndramiran hu soyon hupa, “Hinonou aro, ara ingandrah, hiyeh ilahiy para kiwiriy pe lohongan kileu kaliy?”

61 Yesu kinyirowei tehe ndramiran hu, ara huro panguluwani nongan aro, pwen ipwai iya kili hu ipa, “Nongan iye iratti lohonga wawu, ndre? 62 Pe kapa wawu kanime Noru Ndramat kimui kiya hape mepo mamu iro aliy isa, pwen tehen tapeh? 63 Mwoiwan Haiyan iyki taleh, pe pwoke ta ndramat, ara mwaihei opu. Pe hu nongan mepo kunpwai kinsa kili wawu, ara mamwoiwan pe mataleh. 64 Hapeko hayah tawawu, ara akanpwotisingi lohonga wawu pwi.” Yesu, ara kinpahasaniy pwen mamu kinna tehe ndramat mepo kinpwotisingi lohongan pwi pe andre kiratuni yiy. 65 Pe Yesu iro wong manau ipa, “Tunan aro ko, kunpwai kinsa kili wawu, tehe kinlahi hamou kisa kili yo pwi kipoo Tomo kisomwi yiy.”

66 Pwen iro mwonen ara, ndramiran hu soyon iya, ara hutali yiy pe hu konho ndruwan pwi.

67 Pwen Yesu isok ndramiran hu songui pe lumou ipa, “Kiya, wawu namiliy para nakatali yo pe wawu nakayau i?”

68 Pwen Simon Pita isomwi yiy ipa, “Yapan, andre yowu kaya kili hiyeh yi? Hu nongan para taleh mepo andre kinto-kinto, ara ita kili wou opu. 69 Yowu pwotisingi lohonga yowu, pe yowu pahasaniy tehe wou, ara Haiyan Hamou opu ta Ngindrai.”

70 Pwen Yesu isomwi hu ipa, “Yo kuntakinima wawu songui pe lumou, hapeko hamou tawawu, ara payit hamou!” 71 Pe Yesu ipwai, ara iyata Yutas, mepo noru Simon Yiskariyot kamai, pe yiy ara hamou tahu ndramiran songui pe lumou mepo kamulan andre kiratuni yiy.