1 Upwai ndrokonan isa kili wawu, tehe ndramat mepo kinhosong karam namandran pe kiya nondriya kowa sipsip pwi, hapeko ikohis iya nondriyan iyau sai hasai yi, ara yiy ndramat para pahana pe ndramat para tandroindroi. 2 Hapeko ndramat mepo isong karam namandran pe isa, ara yiy ndramat para pwokereya sipsip. 3 Pe ndramat para memere ara itipe karam iyatan, pe hu sipsip hu hilingi mbulukoyun. Pe ngara kipohowe ngala hu sipsip hamou-hamou, pe kiluwani hu kaya ngawan. 4 Pe iro mwonen iwiri hu sipsip tan masih huya huro ngawan, pwen ngara kiye mu kili hu, pe hu sipsip tan ngara hu koho ndruwan, paratesah, hu pahasani mbulukoyun. 5 Hapeko andre hu konho ndruwa ndramat hamou mawen pwi, andre hu kawop tan, paratesah, yihu kowu mbulukoyu ndramat para mawen*ndramat hamou mawen stranger, TP: arapela lain, ara. 6 Yesu iwong nongan pwandritiye iye, hapeko lohongahu Paresi kinileu kinna nongnan iro wong iya kili hu iya aliy, ara pwi.

7 Pwen Yesu ipwai paiwe ipa, “Yo upwai ndrokonan isa kili wawu tehe Yo kopu, ara karam namandran tahu sipsip. 8 Yihu pohon para sios masih mepo huho mu kili yo, ara hu ndramat para pahana pe hu ndramat para tandroindroi. Hapeko yihu sipsip ara, ara hu konho hilingi hu pwi. 9 Yo mbukeno, ara karam pe ndramat hamou kisayau kili yo, ara andre Ngindrai kisopwat yiy. Pe andre kisa nondriyan, pe kiya ngawan, pe andre kipo anandrinai. 10 Pe ndramat para pahana, ara isa para kipahana, pe kitingundru hu, pe kipwalngani hu. Hapeko yo usa para kuiki taleh, pe taleh ara andre kipep masih.

11 Yo ara ndramat hiyan para pwokereya sipsip. Ndramat hiyan para pwokereya sipsip, ara ngara kiyki mwoiwan para kisopwat hu sipsip tan. 12 Pe ndramat mepo hu sou yiy para kipwokere sipsip opu, ara yiy mbukena hu sipsip pwi. Pwen pe iro mwonen inime mwiy puyap isa, andre kitali hu sipsip konto pe yiy kiwop. Pe mwiy puyap andre kiraluluwi hu sipsip, pe hu kamasumbuwe topwei. 13 Ndramat ara iwop, paratesah, isa pombulen, ara para kipo kenen opu, pe lohongan para kipwokere sipsip, ara pwi.

14 Pe yo ara ndramat hiyan para pwokereya sipsip, pe upahasani hu sipsip to. Pe hu sipsip to, ara hu pahasani yo yi— 15 tehe Tomo ara ipahasani yo, pe yo ara upahasani Tomo, pe andre kuiki mwoiwo kiya kili hu sipsip to. 16 Pe hu sipsip to hayah, ara hu konto nondriya kou para pwokereya sipsip iye pwi. Pe andre kuwiri hu sipsip ara yi, hu kasa, pe andre hu kahilingi mbulukoyu pe hu karayah hapat, pe hu koro pahandra pwokere ta ndramat para pwokereya sipsip hamou opu. 17 Pwen tunan aro ko, pe Tomo ara ndriyan imbuluhi yo, paratesah, mwoiwo andre kitali yo—pe andre kusa mwalen paiwe. 18 Pe hamou andre kinwiri mwoiwo kiya mawen kili yo pwi, hapeko iya namiliwo mbukeno, andre kutali mwoiwo. Pwoke nopwaran iripo kili yo para kutali mwoiwo, pe pwoke nopwaran iripo para andre kuwiriy kimui yi. Tomo mbukenan ipwandrandrahani yo para kumbusi tehen toro.”

19 Pwen hu nongan aro, imbusi hu Yutah hu masilpat paiwe yi. 20 Pe hu soyon tahu, ara hupa, “Payit ara ita ndritan, pe ngou kinwiri yiy. Paratapeh pe wawu tora hilingi yiy?”

21 Hapeko hayah tahu, ara hupa, “Kapa payit kiro ndrita ndramat hamou, ara andre kinwong hu nongan toro pwi. Pe payit ilahiy para kimbusi mara ndramat kileu?”

22 Pwen lang para Kasoulani†kasoulani (pwesai namandran)Celebration, TP: bikpla hamamas Yon para yumwa totohun namandran iro Yerusalem ara irayah, pe irayah, ara iro mwonen lenge nowou. 23 Pwen Yesu, ara iya pe ihorokai nondriya kowa yumwa totohun namandran sahin, hu pohowei ata Solomon. 24 Pwen hu Yutah husawule pe hurahakowan pe hupa, “Sehe lang imwonen pe andre apwaingani wou asa ngawan kili yowu? Kapa wou Kristus pwen awong ngawan kisa kili yowu.”

25 Pwen Yesu isomwi hu ipa, “Yo kunpwai kinsa kili wawu, hapeko wawu kanpwotisingi lohonga wawu pwi. Hu ndraikiya pwoke masih kunmbusiy, ara umbusiy iya ngala Tomo, pe melit masih aro, ara ipwaingani yo hiyeh. 26 Hapeko wawu ara kanpwotisingi lohonga wawu pwi, paratesah, wawu ara hu sipsip ato pwi. 27 Yihu sipsip to, ara hu ngara kahilingi mbulukoyu pe hu pahasani yo, pe hu ngara koho ndruwo. 28 Pe uiki taleh mepo andre kinto-kinto iya kili hu, pe andre hu kanmat pwi. Pe kinlahi hamou kilohi hu kaya mawen nimo, ara pwi. 29 Pe Tomo mepo iyki hu husa kili yo, ara ihohin iya kili hu melit masih,‡Hu ndramat soyon hu pahas iya nongan hupa, Tesah Tomo kiniykiy kinsa kili yo, ara ihohin iya melit masih. pe kinlahi hamou kilohi hu kasa mawen nima Tomo, ara pwi yi. 30 Pwen yo pe Tomo, ara youlu hamou opu.”

31 Pwen hu pohon para Yutah hu hilingi nongnan aro paiwe yi, pe hu wiri pat para kasolpwa yiy. 32 Hapeko Yesu ipwai iya kili hu ipa, “Yo, ara kunpwaingani hu ndraikiya pwoke namandran soyon, iyau kili Tomo pe wawu kannimei. Pe iho nondriya hu ndraikiya pwoke aro, sehe hu ndraikiya pwoke aro wawu solpwa yo iya pat iya aliy?

33 Pwen hu Yutah hu somwi yiy hupa, “Yowu pakasolpwa wou kiya pat, ara kinna hu ndraikiya pwoke anmbusiy ara pwi, hapeko apwasimiri ngala Ngindrai, pe apawiri nokun, paratesah, wou, ara ndramat o mwaihei opu, pe aparapihiye wou tehe Ngindrai.”

34 Pwen Yesu isomwi hu ipa, “Pwayan kinpwai pwen ita nongan para pwahanou tawawu ipa toro, ‘Yo kunpwai, tehe wawu, ara tehe hu ngindrai, ndre pwi?’ 35 Pe kapa kipohowe hu ‘tehe hu ngindrai’ iyau kili hu kopu, pe nongna Ngindrai isa. Pe nongan ita puk ata Ngindrai, ara andre kanndrihisaniy pwi. 36 Pe yiy mepo Tomo kinrakiniman tehe yi atan mbukenan, pe ipwandrisa yi kinsa kol pwan, ara tehen tapeh? Pwen paratapeh pe wawu pakaratuni yo tehe upwasisiman, paratesah, upa, ‘Yo ara noru Ngindrai.’? 37 Pe kapa kunmbulyani mbulya Tomo pwi, pwen lohonga wawu mbuna kipwotisingi yo. 38 Pe kapa yo kumbusi mbulyan, pwen wawu kanpwotisingi lohonga wawu kinsa kili yo pwi, pwen akapwotisingi lohonga wawu kiya hu ndraikiya pwoke. Pwen andre akapahasaniy, tehe Tomo, ara iripo kili yo, pe yo uta kili Tomo.” 39 Pe hu nohonou paiwe para hu pakambultuwe tahatini yiy, hapeko imapaiwe ko pe itali hu.

40 Pwen Yesu isingondriti ndran Yortan imui iya hape aleheh mepo hu lang mamu kinna Yohanes kinsumuluwani hu ndramat huro aliy, pwen iya iro ariya. 41 Pe hu ndramat soyon husa kili yiy, pe huro pa, “Yohanes, ara kinoho pwaingani handra ndraikiya kaipisa pwoke pwi, hapeko melit masih Yohanes ipwai iyata ndramat aro, ara ndrokonan.” 42 Pe hu ndramat soyon para kol ara, ara hu pwotisingi lohonga hu iya kili Yesu.