21
Yesu pe ndraikiya pwoke para poya ni
1 Iyamulan, Yesu iyarayah iya kili ndramiran hu iya Ndran Makaiye Kaliliy*Kaliliy Iya nongna kol ta hu Krik ara ipa, “Tiperiyus”, pe ngalan handra i, ara Kaliliyy. Pe Yesu iyarayah iya kili hu, ara toro: 2 Simon Pita, Tomas (ngalan handra mepo Titimus), pe Nataniyel para kol Kana para kol namandran hape Kaliliy, pe noru Sepeti malmou iyapolo hilu ndramiran malmou i, hu masih, ara huro harong. 3 Pwen Simon Pita ipwai iya kili hu ipa, “Yo nakuya po ni.” Pe hupa, “Yowu andre kasa sura wou.” Pwen huyau huya his ndroi, hapeko ping ara, ara hu kanpo hapesah pwi.
4 Pe mandroulang opu, Yesu, ara iro tine poholeng, hapeko ndramiran hu, ara hu kanyirowei tehe yiy, ara Yesu pwi.
5 Pwen iyoh iya kili hu ipa, “Wawu kowase, wawu po ni ndre pwi?” Pe husomwiy hupa, “Pwi yoh.”
6 Pe ipa, “Akapiyani kahu tawawu kiya pwen te mot para sese ndroi, pwen andre akapo hayah.” Pe iro mwonen hu piyaniy, ara hu kanlahiy para hu kaluwi kahu tahu pwi, paratesah, ni, ara soyo-soyon iya.
7 Pwen ndramira Yesu mepo ndriyan ngara kimbuluhiy yiy ara, ara ipwai iya kili Pita ipa, “Yiy ara Yapan!” Pe iro mwonen Simon Pita ihilingiy tehe ipa, “Yiy ara Yapan,” pwen iwasi ndrohan iya ndrokolon, (paratesah, italiy), pwen ikohis iya ndran. 8 Pe yihu ndramira Yesu hayah i, ara hu suwe ndroi huho ndruwan, iyapolo ni ipep huro kahu, paratesah, hu kanto mawen poholeng pwi, ndrohongan iro poholeng iya, ara tehe mita androsongui. (90 9 Pwen iro mwonen husa poholeng, hu nimei tehe sombule mwan iro neu pe ni iro aliy, pe ndrina nohun hayah i.
10 Pwen Yesu ipwai iya kili hu ipa, “Akawiri ni hayah mepo wawu kanpo, ara kisa.”
11 Pe Simon Pita ihis iya ndroi pe iluwi kahu iya poholeng. Pe kahu, ara ipep iya hu ni namandran, ndromwoyahu, ara sangat, yimingui pe timou (153), pe ni ipep masih, hapeko kahu, ara kinmut pwi. 12 Pwen Yesu ipwai iya kili hu ipa, “Kiya, akasawiri anandrinai para ndroulang.” Pe ndramiran hamou kinsok tehe yiy, ara hiyeh pwi, paratesah, hu kanpahasaniy tehe yiy ara Yapan. 13 Pwen Yesu isa, iwiri ndrina nohun pe iykiy iya kili hu, pe imbusiy tehen aliy i, iya ni. 14 Pe aro, ara maporotisap ara, Yesu iyarayah iya kili ndramiran hu tandrohongan isa tine kimat.
Yesu iyki Pita iya nokun
15 Pe iro mwonen hu namnam ihipwen, pwen Yesu ipwai iya kili Simon Pita ipa, “Simon noru Yohanes, ndriyam imbuluhi yo ndrokonan iya hu melit masih aro, ndre pwi?” Pe ipa, “Ehe Yapan, apahasaniy tehe ndriyo ara imbuluhi wou.” Pwen Yesu ipa, “Ahang anandrinai kiya kili hu noru sipsip to.”
16 Pe Yesu ipwai paiwe yi ipa, “Simon noru Yohanes, ndriyam imbuluhi yo tisingiy, ndre pwi?” Pe Pita ipa, “Ehe Yapan, wou apahasaniy tehe ndriyo imbuluhi wou.” Pwen Yesu ipa, “Apokere hu noru sipsip to.”
17 Pwen maporotisap i Yesu ipwai iya kili yiy ipa, “Noru Yohanes, ndriyam imbuluhi yo, ndre pwi?” Pe ipa, “Yapan, apahasani melit masih, pe apahasaniy tehe ndriyo, ara imbuluhi wou.” Pwen Yesu ipa, “Ahang anandrinai kiya kili hu noru sipsip to. 18 Upwai ndrokonan isa kili wou, iro mwonen wou mawihou, ara wou mbukenam ngara asuluye wou, pe aya hape aleheh anamiliy para naya aliy, hapeko kiro mwonen aya parangoloh, ara nimam andre kiyah pe hamou andre kisuluye wou, pe kiluwani wou aya hape aleheh mbuwalim para naya aliy.” 19 Yesu ipa toro para kipwandrohonge kiya kimat mepo Pita andre kiya nondriyan pe kihiri ngala Ngindrai kiyau aliy. Pwen ipwai iya kili yiy ipa, “Aho ndruwo!”
20 Pwen Pita irapaiwani yiy pe inime ndramira Yesu mepo Yesu ndriyan ngara kimbuluhi yiy, ara iho ndruwa hu. (Yiy mepo iyeroh pakeh wiyinere Yesu iro mwonen anandrinahu iyapolo Yesu ihipwen, pe ipa, “Yapan, hiyeh andre kiratuni wou?”) 21 Pe iro mwonen Pita inime yiy, isok ipa, “Yapan, pe yiy tapeh?”
22 Yesu isomwi yiy ipa, “Kapa kunamili yiy para kiro manau mwalen kipoo kumui kusa, pwen, ara handra melit tam pwi. Oho ndruwo ko.” 23 Pwen tunan aro ko, nongan ingau iya kili hu mepo hu pwotisingi lohongahu tehe ndramira Yesu iye, ara andre kinimat pwi. Hapeko Yesu kinpa tehe andre kimat pwi, ara pwi, ipa, “Kapa kunamiliy para andre kiro mwalen kipoo kumui kusa, pwen, ara handra melit tam pwi.”
24 Pwen yiy mepo Yesu ndriyan imbuluhi yiy, ara itiyani hu melit aro kene, pe iratuluwi hu huya pwan. Pe yowu pahasaniy tehe titiye tan, ara ndrokonan.
25 Pe Yesu, ara imbusi hu melit hayah soyon i. Kapa melit masih ara karatuluwi hu kaya pwan, pwen upa ndre kol pwan masih, ara kinlahi noku hu puk mepo andre karatuluwi hu, ara pwi.