19
Kol Papilon iya mwomwan pe hu ndramat hupwes
1 Pe iyamulan, uhilingi nguluwa hapesah namandran tehe mbulukoyu hu ndramat soyo-soyon iya, hupowaliy iyau kol paingan yang huro pa,
“Haleluyah!
Sopwat para kiwiri hu ndramat kamui, pe kahari ngalan pe pwoke ara ata Ngindrai torou!
2 Hu kultuw para tamwanye tan ara ndrokonan pe imwonen,
pe kiniyki kora pihin para ndrokotina pilah,
mepo ipwalngani kol pwan iya hu pilah tan,
paratesah, ndreye hu ndramat para poya mbulya Ngindrai, ara ita ndritan.”
3 Pe huwayeh paiwe yi hupa,
“Haleluyah!
Kosumwonon itunam iya paingan ara andre kinto pe kinto.”
4 Pwen hu pohon lungui pe haamou, iyapolo hu kan mahaamou mwalen, ara hu tukuruhu huya pwan pe hu totohun iya kili Ngindrai mepo itampwan ndrohonoku pwanpwan ta king, pe hupa, “Ndrokonan, Haleluyah!”
5 Pwen mbulukoyu hamou iyau ndrohonoku pwanpwan ta king ipa,
“Kahari Ngindrai torou,
wawu masih para poya mbulyan,
wawu mepo tora pahandra nohowai tan,
pe wawu mangala wawu, pe wawu ngala wawu pwi!”
6 Pwen uhilingi nguluwa hapesah namandran tehe mbulukoyu hu ndramat soyo-soyon iya, pe ngasan namandran tehe hu ndran huro tah, pe tehe hu palan huro talon, pe hu wayeh hupa,
“Haleluyah!
Paratesah, Yapan Ngindrai torou, ara itamu tehe King.
7 Tukapwes pe tukapwes namandran,
pe kahari ngalan!
Paratesah, lenge kowase Noru Sipsip kinsa para nakiyesou.
Pe pihin tan, ara kinmwanye yiy ita mwoimwoi.
8 Ngindrai kiniyki koyau lahayan, ma nganan pe howen
para kisuluye yiy kiya aliy.”
(Koyau lahayan ara iwong iya hu kultuw imwonen ta hu ndramat haiyan ta Ngindrai.)
9 Pwen angelou ipwai isa kili yo ipa, “Aratuluwiy toro: ‘Lomwes kiya kili hu mepo kanpwanos hu para kaya anandrinai para kowase yesou ta Noru Sipsip!’ ” Pe iposura nongnan ipa, “Hu nongan aro ara hu nongan ndrokonan ta Ngindrai.”
10 Pwen iro mwonen uhilingiy, ara utukuruhu uya pwan ndrikan pe utotohun iya kili yiy. Hapeko ipwai isa kili yo ipa, “Mbuna ambusiy tehen tora! Yo ara hamou para poya mbulen tehe wou opu, iyapolo nali hu mepo hupwotisingi titiye ta Yesu. Atotohun kiya kili Ngindrai! Paratesah, titiye ta Yesu, ara ngara kirakelehani hu ndramat para hu kawong tehe hu poropet.”
Ndramat ngara ngaplani hos iro ndrita hos pallen
11 Pe unime kol paingan yang ara ite, pe hos hamou pallen ara isoho mbulmoro. Pe ndramat para ngaplaniy, ara ngalan, Ndramat Ipwotisingi Lohongan Ndrisiyon iya mbulyan, pe Yiy Ndrokonan. Pe ngara kitamwanye hu ndramat kimwonen, pe ngara kipopahun. 12 Maran ara iro yat tehe mwan iroholulun, pe kasapai soyon ta king ara huro ndrita payan. Pe kanratuluwi ngalan handra iro kili yiy mepo hamou kinpahasaniy pwi, hapeko yiy mbukenan ipahasaniy. 13 Pe kansuluye yiy kinna koyau hamou mepo kantaimaniy kinna ndrai, pe ngalan, ara Nongna Ngindrai. 14 Pe hu ndram para pahun para kol paingan yang ara huho ndruwan, pe huro ngaplani hu hos pallen, pe hu suluye hu iya koyau lahayan, pe pallen pe kas aliy pwi. 15 Pe semen hapai maran para pahun, ara iyau pohon mepo andre kiramwaitini hu kol namandran masih. “Pe yiy andre kimbultuwe nes hayen tan pe kiro king tahu.” Pe ingas toro iya ndrohonoku haliya wain para ndrina lokuh ta Ngindrai Pwokeyan. 16 Pe kantatuluwiy ngalan iro koyau tan pe iro ndrita mbupan, ara toro:
KING TA HU KING MASIH PE YAPAN TA HU YAPAN MASIH.
17 Pwen unime angelou hamou iro tine nondriya mwandrai, pe iwayeh sahin namandran iya, iya kili hu norukan masih para wohowoh yang ipa, “Akasa, akambultere wawu para anandrinai namandran ta Ngindrai, 18 pwen pe andre wawu kaini sangi hu king, sangi hu ndramat huhohin ta hu ndram, sangi hu ndramat pwokeyan, sangi hu hos pe hu mepo ngara kangaplani hu, sangi hu ndramat masih, pe hu ndramat hutora mwoimwoi pe hukonto mwoimwoi pwi, pe hu mangalahu pe hu mepo ngalahu pwi.”
19 Pwen unime kan puyap pe hu king para kol pwan iyapolo hu ndram ta hu para pahun, ara humbultere hu huya harong para hu kapopahun kiya kili ndramat para ngaplani hos iro ndrita hos, iyapolo hu ndram tan para pahun. 20 Ndramat para ngaplani hos pallen imbultuwe tahatini kan puyap ara, iyapolo hu poropet para pwandrandraman, mepo hu ngara kawiri nokun pe hu kapwaingani hu ndraikiya kaipisa pwoke tan. Pwen hu kaipisa pwoke aro, ara iluwani hu ndramat para hu kanwiri kinima kan puyap ara, pe kantotohun kiya kili kerewek tan. Pe hilu malmou kene, ara piyani hilu mamwalen hilya mwan mepo pat sakai para aliy ara ngandrahan. 21 Pe hu masih ara tingundru hu iya semela pahun maran iya mepo isa ngawan poho yiy mepo iro ngaplani hos. Pe hu norukan para wohowoh masih, ara huini sangihu pe isihihu.