Yankuik kuali tlajtoli tlen okijkuilo
San Lucas
1
Lucas okitlajkuilili in Teófilo
Nokni Teófilo, miekeh yokiyejyekojkeh de yokijkuilojkeh nochi tlen opanolok itech tejvah. Okijkuilojkeh ijkó kemi otechmatiltijkeh nekateh tlen desde achto yejvah okittakeh tlen opanolok iva satepa okitematiltijkeh itlajtol in Dios. Ne noijki kuali yonitlatlajtlanki ika yolik nochi nin tlen opanolok desde ijkuak opejki. Por eso, tejwatzi Teófilo, ne onikyejyeko moneki nimitzijkuililis ijkó kemi opanolok. Para ijkó kuali xikyekmati in melajkayotl tlen yomitzmachtijkeh.
Se ilvikaktlatitlanili okijto nesis in Juan tlen tlabautisaro
Ijkuak Herodes okatka wei tlanavati de Judea, itech yejonmeh tonaltih okatka se tiopixki itoka Zacarías, tlen opovia invan tiopixkeh de Abías. Itonana Zacarías omotokayotiaya Elisabet, iva ye noijki valajtok de Aarón. Zacarías ivan Elisabet okatkah tlakamelajkeh inavak Dios, iva okinvelkakiah in tlanavatiltih iva tlen toTeko okijto ma se kichiva, iva amika ovelia okintlajtlakoltiaya de itla. Pero amo okipiayah inkone, porke Elisabet amo ovelia okinpiaya, iva nochtin omeh yokokoxkatikeh.
Se tonali, Zacarías otekipanojtoka de tiopixki kan templo porke in tiopixkeh tlen invah kichivah in tekitl okintokaro tekipanoskeh inavak Dios yejón samana. In tiopixkeh okipiayah kostumbre omotlaniah para kittaskeh akin kitokaros tlapopochvis, iva ijkuakó yen Zacarías okitokaro kalakis tlapopochvis kan itemplo in toTeko. 10 Mientras Zacarías otlapopochvijtoka tlatlaijtik, nochtin gentejtih omodiostzajtzilijtokah kiavak. 11 Ijkuakó se iilvikaktlatitlanil in toTeko okimonextili in Zacarías. Yejón ilvikaktlatitlanili omoketoka ik iyekmapa in artal kan tlapopochviah. 12 Zacarías sa ovaltlatlachixki iva omomavti ijkuak okittak in ilvikaktlatitlanili. 13 Pero in ilvikaktlatitlanili okilvi:
—Zacarías, amo ximomavti, porke Dios yokikakki modiostzajtzilis, iva motonana Elisabet kipias se ikone, tlen tiktokayotis Juan. 14 Sa tlawel tipakis, iva miekeh noijki pakiskeh ijkuak ye nesis. 15 Porke yetos wei inavak Dios. Amo konis vino iva nion amo konis itla oksé tlen teiwinti, iva tentos de Tioijyotzintli desde antes de nesis. 16 Ye kichivas ke miekeh gentejtih de Israel ma mokuapakah inavak toTeko tlen inDios. 17 Ye achto vitz antes de vitz in toTeko, iva kipias itonal iva velitilistli ijkó kemi okipixki in tiotenejmachti Elías. Ye ijkuak tetlapovis kichivas ke in tetajmeh invan inpilvah ma moyekvikakah, iva tlen ixpetoktih ma kitlakitakah in Dios. Iva ijkó, ye kinyektlalis in gentejtih para velis kiseliskeh in toTeko.
18 Zacarías okitlajtlani in ilvikaktlatitlanili:
—¿Kenik nikmatis kox yi neli? Porke ne ivan notonana yotikokoxkatikeh.
19 In ilvikaktlatitlanili okinankili:
—Ne niGabriel, niktekipanova in Dios. Ye onechvaltitlanki ma nimitzilviki nin kuali tlajtoli. 20 Pero komo amo otikneltokak tlen onimitzilvi, axka tinoontis iva mach ok velis titlajtos asta ijkuak nesis mokone. Iva nochi nin tlen nimitzilvia, ijkó mochivas ijkuak ajsis tonali.
21 In gentejtih okichixtokah in Zacarías kan kiavak, iva omotlajtlaniayah tlanik ompa mowejkajtok iva amo valkisa de kan templo. 22 Iva ijkuak ovalkiski, ayakmo ovelik okintlapovi. Ijkuakó okimomakakeh kuenta ke Dios okititi se tetzavistlachialistli. Zacarías sa omamasovaya porke onoontik.
23 Ijkuak otlanki in tiempo de okichi itekiv in Zacarías itech in templo, oyá para ikalijtik. 24 Kana keski tonali satepa, Elisabet yokipiaya ikonetzi ijtik, iva amo okiska de ikalijtik kemi makuili metztli. Elisabet okiyejyekovaya: 25 “¡Sa tlawel kuali tlen Dios yokichi nova! Yonechpalevi para ayakmo ma nechpinavikah por amo veli nikinpia nokonevah.”
Se ilvikaktlatitlanili okijto nesis in Jesús
26 Ijkuak Elisabet yokipiaya chikuase metztli de yokipixtoka ikonetzi ijtik, Dios okivaltitlanki iilvikaktlatitlanil Gabriel itech se altepetl itoka Nazaret tlen kajki itech tlali de Galilea. 27 In ilvikaktlatitlanili okimonextili se ichpochtli itoka María, tlen yokatka para monamiktis ivan se tlakatl itoka José, tlen valajtok de David tlen oyá wei tlanavati. 28 In ilvikaktlatitlanili okalakki kan okatka in María iva okilvi:
—Xipaki tejwatzi María. Dios mitzita ika kuali. In toTeko mova kajki, iva yomitztiochi okachi ke nochtin sivameh.
29 Ijkuak María okikakki in ilvikaktlatitlanili, sa otlatlachixki iva ayakmo okima tlán kijtos, iva okimolvi tlán kijtosneki yejón tlajpalolistli. 30 Ijkuakó in ilvikaktlatitlanili okilvi:
—María, amo ximavi, porke Dios kipia pakilistli mova. 31 Axka yi tikpias se konetl moijtik, iva tiktlakatilis se chokotzi, iva tiktokayotis Jesús. 32 Yejón chokotzi weititos, iva kinotzaskeh iKone in Dios tlen Weijkatlalitok, iva Dios kitlalis ma yeto wei tlanavati kemi tlen yi wejkavitl ikojkol tlen itoka David. 33 Ye nochipa yetos tekiva itech país de Israel, iva itekivajkayo amo keman tlamis.
34 María okitlajtlani in ilvikaktlatitlanili:
—¿Kenik nikpias nokone? Ne ayamo nikpia nototata.
35 In ilvikaktlatitlanili okinankili:
—In Tioijyotzintli vitz motech, iva ivelitilis in Dios tlen Weijkatlalitok mitzmokemis kemi se mixtli. Por eso, in chokotzi tlen nesis motemaktis inavak Dios iva kinotzaskeh iKone in Dios. 36 Moprima Elisabet noijki kipias se ikone maski yokokoxkatik. Miekeh okijtovayah amo veli kinpia ikonevah, pero axka yi kipia chikuase metztli de yi kipia ikonetzi ijtik. 37 Para Dios amitla onka tlen amo ma veli ma kichiva.
38 Ijkuakó María okijto:
—Ne niitekipano in toTeko. Ma mochiva nova ijkó kemi yotikijto.
Ijkuakó in ilvikaktlatitlanili oyajki.
María okitlajpaloto Elisabet
39 Itech yejonmeh tonaltih, María oyá totoka itech se altepetl tlen okatka kan tepemeh de Judea. 40 Ijkuak ompa oajsito, okalakki kan ikalijtik in Zacarías iva okitlajpalo in Elisabet. 41 Iva ijkuak Elisabet okikakki okitlajpalo in María, in konetl omolini chikavak ijtik Elisabet. Iva Elisabet otenki de Tioijyotzintli, 42 iva okijto chikavak:
—Dios yomitztiochi okachi ke oksekimeh sivameh, iva yokitiochi mokone tlen tikpixtok moijtik. 43 ¿Kemi akin ne, para ma viki ma nechtlajpaloki imama in noTeko? 44 Porke san nima ijkuak onikakki otechtlajpalo, nokone omolini chikavak noijtik ika pakilistli. 45 Xipaki porke otikneltokak, porke mochivas nochi tlen toTeko yomitzilvi.
46 Ijkuakó María okijto:
Nikweijkachiva toTeko ika nochi noyolo,
47 iva sa tlawel nipaki inavak toYejwatzi noTemakixti.
48 Porke maski niprowe niitekipanojtzi in toYejwatzi, Ye onechilnamiki.
Iva desde axka nochtin tlaltikpaktlakah kijtoskeh nik in toYejwatzi onechtiochi sa tlawel.
49 Porke toYejwatzi tlen kipia nochi velitilistli, okinchi wejwei tlamantih por ne.
Itokatzi yi neli chipaktzi.
50 Nochipa kinmiknomatis nochtin tlen kitlakitah.
51 Kinchiva wejwei tlamantih ika ivelitilis.
Okinmijtlakoli tlen okiyejyekovayah kichivaskeh tlen moweinekih.
52 Tlen wejwei tlanavatijkeh okinkixtili intekivajkayo, iva okinweijkatlali tlen amo ipanitalistih.
53 Tlen otiojsiviah okinmakak nochi tlen kuali,
iva tlen tominejkeh okintitlanki mapijpilkativih.
54 Okipalevi in país de Israel tlen itlakeval.
Amo okilka de kinmiknomatis
55 ijkó kemi okinmilvijka tlen yi wejkavitl tokojkolvah,
Abraham ivan nochtin ipilvah, ke kinmiknomatis para semijkak.
56 María omoka ivan Elisabet kemi eyi metztli, iva satepa omokuapki para ikalijtik.
Oneski in Juan tlen tlabautisaro
57 Oajsik tonali, Elisabet okitlakatili se chokotzi. 58 Nochtin ivesinojvah ivan tlen itla kinmita opakeh miek, porke okittakeh ke Dios okichi tlen kuali por ye. 59 Ochikometik oyajkeh okisirkunsidarotoh in chokotzi, iva okinekiah kitokayotiskeh Zacarías kemi ipapa itoka. 60 Pero Elisabet okijto:
—Amo. Tiktokayotiskeh Juan.
61 Iva okilvijkeh:
—¿Tleka? Nion se de tlen itla tikinmita amika ijkó itoka.
62 Ijkuakó sa ika inmah okitlajtlanijkeh in teta, para kimatiskeh kenik kineki kitokayotis ikone. 63 In teta okitlajtlanki se tlapetzintli para itech kijkuilos, iva ijkí okijkuilo: “Yetos itoka Juan.” Iva nochtin sa otlatlachixkeh. 64 Iva san nima ijkuakó Zacarías oksemi ovelik otlajto, iva ope kiweijkachiva in Dios. 65 Nochtin ivesinojvah sa otlatlachixkeh. Iva itech nochi in tepeyo de Judea oxitinki in tlajtoli de tlan opanolok. 66 Nochtin tlen okimatkeh, omotlajtlaniayah:
—¿Tlán itekiv yetos yejón chokotzi ijkuak moskaltis?
Nochtin okimatiah ke ivelitilis in toTeko okatka iva.
Zacarías okiweijkachi in toYejwatzi ika se tiotlakuikali
67 Zacarías, ipapa in Juan, otenki de Tioijyotzintli iva okijto seki tlajtoli tlen ovala de Dios. Ijkí okijto:
68 Ma tikweijkachivakah in toTeko, Dios de Israel,
porke ovala otechmakixtiko tejvah tlen tiiaxkavah.
69 Otechmakak se toTemakixti tlen chikavak,
tlen valajtok de David tlen itlakeval.
70 Ijkó kemi yi wejkavitl Dios okijto intech in tiotenejmachtijkeh,
71 nik techmakixtis de inmak tlen techtlavelitah iva de nochtin tlen techkualankaitah.
72 Okijto nik techiknomatis ijkó kemi okinmilvijka tlen yi wejkavitl tokojkolvah,
iva amo kilkavas in chipavak moyekkavalistli tlen invah okichi.
73 Yen nin tlen Dios okitemakak itlajtol inavak tlen yi wejkavitl tokojkol Abraham:
74 nik techmakixtis de inmak tlen techtlavelitah,
para velis tiktekipanoskeh amo ika mavilistli.
75 Okilvi ma tiekah tiyolchipavakeh iva titlakamelajkeh inavak itech nochi tonemilis.
76 Iva te, tinokone, mitznotzaskeh itiotenejmachti in toYejwatzi tlen Weijkatlalitok,
porke te titlayakanas para tikyektlalilis iojviv in toTeko.
77 Para tikinmatiltis ipilvah tlen de Israel kenik velis momakixtiskeh,
para ijkó toYejwatzi kintlapojpolvis de intlajtlakol.
78 ToYejwatzi sa panova techiknomati,
iva desde ilvikak otechvaltitlanili se Temakixti kemi oyeskia otechvaltitlanili se yankuik tonali.
79 Ye kintlavilis tlen kateh kan tlayova iva kan onka mikilistli.
Yetos kemi se tlanextli tlen techyakanas itech ojtli kan se yetos ika kuali.
80 In chokotzi Juan omoskaltijtiaya iva Dios okimakaya chikavalistli itech ianima, iva ochantito kan tlavaki asta ijkuak oajsik tonali ijkuak okinmotiti in gentejtih de Israel.