22
Puurrpa Tjutjayinya
1 Nyangka-ya tjilku tjirrarnka yini Tjutjayinya tjunu puurrarringkula-tjanampa nyinarratjaku. Nyangka puurrpa rawa nyinarrayirnu yirna-yirnarringkulalpi mirrirringu. 2 Tjiinya Tjutjayilu walykumunu pirni palyaranytja. Nyangka Mama Kuurrnga-ra pukurlarringu. Tjiinya Mama Kuurrku wangka wangarnarralu kulira palyaranytja palunyaku tjamu Tayipirrku yarawanalu.
Mama Kuurrku Wangka-ya Ngurrirnu
3-7 Nyangka puurrpa Tjutjayilu wati yini Tjayipannga witurnu tjurrtju purlkanyakutu yankutjaku. Palunyalu-lu watjarnu, “Mapitja lurrtjurriwa Yilkayila, tjiinya tjurrtjuku puurrpa purlkanyala. Palunyalu watjala tjimarri nyarra yarnangu pirnilu-ya katirra yungkupayinya mantjira waarka palyalpayi pirniku yungkutjaku. Nyangka-yayi warta yapu pirni payipungkulalpi tjurrtju purlkanya marlakulu palyala walykumunula. Tjiinyamarntu tjurrtju palunyanya ngarnmanytjanu ngaralayirnu palyamunurringu ngarala.”
8 Nyangka Tjayipantu mularrpartu mapitjangu Yilkayinya watjarnu. Nyangka kuliralpi yuwarnmanu. Palunyalu watjarnu, “Ngaanya nyawa, ruula purlkanya-rna nyangu tjurrtjungka ngarrirranyangka.” Nyangka ruula palunyanya Tjayipanku yungu. Nyangka mantjiralpi nyakula-wanarnu wiyarnu. 9-10 Palunyalu marlaku yanu puurrpa watjarnu, “Yuwa, wati nyarra Yilkayilu ruula purlkanya nyangu tjurrtjungka ngarrirranyangka. Palunyatjanulu-rni katingu ngaanya yungu. Nyangka-muntan kuliku?” Nyangka puurrtu yuwarnmankunyangka Tjayipantu tjukurrpa ruulangkatja nyakula watjarayirnu wiyarnu.
11-13 Nyangka puurrtu kuliralpi kata paarnarrarnu. Palunyalu wati 5-pa yarltirralpi watjarnu, “Mama Kuurrnga-tjinguru-lampa mirrparnarringu. Tjiinyamarntu-ya tjamupirtilu Mama Kuurrku wangka kulira wantirranytja. Palunyalu-ya watatjarringu nyinarra-wanarayintja. Nyangka-lan ngayunyalpi ngurrpa nyinarranytja wangka ruula ngaangka walkatjunu wantitjaku. Nyaapirinypa-lan palyalku? Yarra-ya Mama Kuurrnga tjapila.”
14-15 Nyangka-ya wati 5-lu yanu nyangu minyma nyarra Mama Kuurrku wangka kulira tjakultjunkupayinya. Nyangka-tjananya palunyaku yiwarlangka tjarrpatjunu. Palunyalu-tjananya watjarnu, “Yuwa, nintilu-rna kulira tjiinya puurrpa Tjutjayilu-tjananyanta witurnu. Nyangka Mama Kuurrtu ngaapirinypa watjarnu, 16 ‘Yuwa Tjutjayi, mularrpa-rna palyamunu purlkanya yutilku ngurra ngaaku puru yarnangu pirni ngurra ngaangka nyinapayiku. Tjiinya ruula palangka kutjulpirtu walkatjunu wantitja, palunyapirinypa. 17 Tjiinya-rniya ngayunya wantirralpi kutjupa-kutjupa yapu wartatarrartu kutjupayarla pupakatirra marninypungkulanytja. Nyangka-rna nyakulalpi mirrparnarringu. Palunyalu-rna lirri waru tirtu nyinarra. 18-19 Yuwa Tjutjayi, nyuntulun kulirnu wangka ruulangkatjanya. Palunyalu-rnin yulatjarralu tjapiranytja. Nyangka-rnanta kulirnu. 20 Palunyalu-rna kuwarripa wantingu. Nyangkan nyinarrayilku ngula-ngula mirrirriku. Nyangkalta-rna palyamunu purlkanya marla yutilku.’ Yuwa, Mama Kuurrtu palunyapirinypa watjarnu.”
Nyangka-ya wati palunyanya marlaku yanu puurrpa Tjutjayila watjarnu.