12
Nayitjintu Tjukurrpa Kamparntalpa Watjarnu Tayipirrtu Kuliltjaku
1 Nyangka Mama Kuurrtu wati yini Nayitjinnga witurnu yankula Tayipirrta wangkatjaku. Tjiinya wati palunyalu Mama Kuurrku wangka kulira watjalpayi. Palunyalu mularrpartu mapitjangu Tayipirrta watjarnu, “Yuwa, tjukurrpa ngaanya-muntan kulilku?” Nyangka Tayipirrtu yuwarnmanu. Nyangka Nayitjintu watjarnu, “Tjiinya wati-pula kutjarra nyinarranytja. Nyangka wati kutjulu walykumunu pirni kanyiranytja. Nyangka wati kutjupalu kurluny-kurlunypa kanyiranytja. 2 Nyangka wati walykumunu pirnitjarralu puluka puru tjiipu pirni kanyiranytja. 3 Nyangka wati nyarra yulytja kurluny-kurlunytjarralu tjiipu warlangu kutju payipungu. Palunyalu ngurrakutu katingu kaninytjarra kanyirayirnu purlkarnu. Nyangka palunyaku tjilku pirningka nyinarranytja. Palunyalu wati palunyaku mirrka ngalkulanytja puru palunyaku panikinta tjikiranytja. Puru yampungkatarra ngarripayi. Nyangka wati palunyalu yurntalpirinypa kanyilpayi. 4 Nyangka wati maliki ngurra kutjupanguru pitjangu wati yulytja pirnitjarraku ngurrangka nyinarranytja. Nyangka wati palunyalu kulirnu, ‘Kuka-rnara witaralpi nintilku.’ Nyangka wati palunyalu palunyaku puluka puru tjiipu yungarranya wantirra yanu wati kutjupaku ngurrakutu. Palunyalu warlangu palunyanya mantjiralpi pungu. Palunyalu witaralpi wati malikiku nintirnu.”
5 Nyangka Tayipirrtu kuliralpi mirrparnarringu wati nyarra yulytja pirnitjarraku. Palunyalu watjarnu, “Wiya, wati palunyalu palyamunu palyarnu. Nyangka-tjinguru-ya pungkula mirrirntanama. 6 Tjiinya ngarltumaaltu-ra wati yulytja kurlunytjarraku tjiipu mantjiralpi pungu. Tjinguru-ra ngaparrtjika tjiipu kutjarra-kutjarra nintinma.”
7-8 Nyangka Nayitjintu watjarnu, “Wiya, nyuntulun wati palunyapirinypartu nyinarra. Tjiinya Mama Kuurrtunta ngaapirinypa watjarnu, ‘Tjiinya-rnanta puurrpa nyinatjunu. Nyangka Tjuultunta ngurlura parrawanarayinnyangka ngayulu-rnanta wankarura kanyiranytja. Puru-rnanku kutjupa-kutjupa tirtu nintilpayi. 9 Nyangkan nyaaku ngayuku wangkaku tungun-tungunarringu? Nyaatjanulun palyamunu palyaranytja? Nyuntulun Yurayinya witurnu yankula mirrirritjaku. Puru palunyaku-ran kurri yarltingu kanyira. 10 Yuwa, nyuntulun palyamunu palyarnu. Palunyangka palyamunu tirtu ngarala-wanarayinma nyuntuku yungarrapirtikutarrartu. Tjiinyamarntun Yurayiku kurri mantjirnu yungarrarringu kanyira.’ Palunyapirinypa Mama Kuurrtu watjarnu.”
13 Nyangka Tayipirrtu watjarnu, “Yuwa, mularrpa-rna palyamunu palyarnu Mama Kuurrta mirangka.”
Nyangka Nayitjintu watjarnu, “Yuwa, Mama Kuurrnganku kalyparringu. Nyangkan mirrirrikitjamunu. 14 Nyangkanku nyuntuku katja kurlunynga mirrirriku. Tjiinyamarntun nyuntulu Mama Kuurrku wangka tjalkirr-tjalkirrtu wantingu.” 15 Palunyanguru Nayitjinnga ngurraku yanu.
Tayipirrku Tjilku Katja Wiyarringu
Nyangka Tayipirrku-pulampa katja kurlunypa pikatjarrarringkulalpi walykunytjilpa ngarrirranytja, tjiinyamarntu Mama Kuurrtu-lu pampunnyangka. 16 Nyangka Tayipirrtu Mama Kuurrnga tjapiranytja tjilku-ra pampura wiirrultjaku. Palunyalu mirrka paanypungkulalpi ngalkunytjamaalpa tirtu nyinarranytja. Palunyalu mungarrinyangka yanu palunyaku ngurrangka tjarrparralpi mantangka tirtu wartungaralanytja. 17 Nyangka-ya palunyaku yamatji pirnilu pitjangu purtu watjaranytja pakara mirrka ngalkutjaku. 18 Nyangka tjilku palunyanya pikatjarra ngarrirrayirnu ngurra 6-tjanu ma-wiyarringu. Nyangka-ya Tayipirrku yamatji pirnilu tjakultjunkutjamaaltu ngurlulu wantirranytja. Palunyalu-yanku watjarnu, “Wiya, tjilku palunyanya pikatjarra ngarrirranyangka Tayipirrnga wangkamaalpa tirtu nyinarranytja. Palunyalu-lampa wangka kulira wantirranytja. Kamu-lan watjalku. Tjinguru-lan watjannyangka pakaralpi yungarralunku kutjupa-kutjupanku.”
19 Nyangka-tjananya Tayipirrtu kulirnu tjaalymara-ya wangkarranyangka. Palunyalu nintilurtu kuliranytja tjilku palunyanya wiyarrinyangka. Palunyalu-tjananya tjapirnu, “Wiyarringu-munta?” Nyangka-ya watjarnu, “Yuwa, wiyarringu.”
20 Nyangka Tayipirrnga pakaralpi kapingka tjarrpangu. Palunyalu pakaralpi mangka palyarnu walykumunurnu. Palunyalu warntu kutjupanya tjarrpatjuralpi yanu Mama Kuurrku tiintingka tjarrparralpi nyinarra Mama Kuurrta wangkarranytja. Palunyalu pakara marlaku pitjangu mirrka ngalkulanytja. 21 Nyangka-ya palunyaku yamatji pirnilu watjarnu, “Wiya, purtu-latjunta kulira. Tjiinya tjilku palunyanya wanka ngarrirranyangka nyuntulun yularranytja. Purun mirrka ngalkunytjamaalpa ngarrirranytja. Ngaanyan purrkutjarrarringkulalpi pakarnu mirrka ngalkula.”
22 Nyangka Tayipirrtu watjarnu, “Yuwa, tjilku pikatjarra ngarrirranyangka-rna yularranytja. Puru-rna mirrka ngalkunytjamaaltu wantirranytja. Tjiinyamarntu-rna kuliranytja, ‘Tjinguru-tju Mama Kuurrtu ngarlturringkulalpi tjilku pampulku wiirrulku.’ 23 Nyangka wiyarrinyangka nyaakunyka-rna mirrka wantima? Ngayulu-munta-rna tjilku palunyanya marlakulu wankalku? Wiya. Ngula-rnalu yanku ma-lurrtjurriku. Tjiinya tjilku palunyanya marlaku pitjakitjamunu ngayulakutu.”
Tjalamannga Yirti Ngarringu
24 Nyangka-lu Tayipirrtu palunyaku kurri Paatjipanya walykumunulu watjara pukurlmara kanyiranytja. Nyangka-pula ngurra ngarripayi. Nyangka Paatjipalu nyinarrayirnu tjilku katja kanyirnu. Nyangka Tayipirrtu tjapirnu yini Tjalamannga. Nyangka Mama Kuurrtu tjilku palunyaku pukurlarringkulalpi mukulyanytjulu kanyiranytja.
Yuwa, palunya.