37
Yiitjikultu Nyangu Tarrka Pirni Ngarrirranyangka
Nyangka-rna mirarnu Mama Kuurrnga-rni ngamutja ngaralanyangka. Nyangka-rni Mama Kuurrku Kuurtilu katura tiwa katirrayirnu karru-karru purlkanyangka walatjunu. Nyangka-rna nyangu tarrka pirni karru-karrungka ngarrirra-wanarayintja. Nyangka-rni Mama Kuurrtu parrakatirra nintitjuranytja. Nyangka-rna nyakulanytja tarrka piki kutjulpingkatja pirninya watingarrirra-wanarayintja. Nyangka-rni Mama Kuurrtu tjapirnu, “Yiitjikul, tarrka ngaanya-munta-ya marlaku wankarriku?”
Nyangka-rna watjarnu, “Wiya Puurr, ngurrpa-rna. Nyuntunyakutjun ninti.”
Nyangka-rni watjarnu tarrka pirningka-rna ngaapirinypa watjaltjaku, “Tarrka pirni, kulilku-munta-yan Mama Kuurrtu-tjananyanta watjaranyangka? Ngayulu-tjananyarnanta ngaalypa tjarrpatjunku nyangka-yan marlaku wankarriku. Tjiinya-tjananyarnanta yilytjanpa, pulyku puru minyarra tjunku. Palunyalu-tjananyarnanta puuralpi ngaalypa tjarrpatjunku. Nyangka-yan marlaku wankarriku. Palunyalu-yan nintilu kulilku tjiinya-rna Mama Kuurrnga Puurrpa purlkanya nyinarranyangka.”
Nyangka-rna mularrpartu palunyapirinypa watjaranytjalu kulirnu tirrkilmaranyangka. Nyangka tarrka palunyanya-ya yurri-yurrirralpi lurrtju-lurrtjurringkulanytja. Nyangka-rna nyangu tarrka pirninyartu-ya pulykutjarrarringkulalpi yilytjantjarrarringu. Nyangka-tjananya minyarralu yangatjunu. Parturtu-ya ngaalypa wiya tirtu ngarrirranytja.
Nyangka-rni Mama Kuurrtu watjarnu pirriya ngaapirinypa watjaltjaku, “Yuwa, Mama Kuurrtunta watjarnu ngalyakukurraaltjaku kakarraranguru, yurlparirranguru, yapurranguru, puru kayilinguru. Ngalyakukurraaralpi-tjananya puula nyarra mirri-ya ngarrirranyangka ngaalypa wiya. Nyangka-yayi ngaalytjarrarringkulalpi marlaku wankarringkulalpi nyinama.”
10 Nyangka-rna mularrpartu palunyapirinypa watjarnu. Nyangka pirriya ngalyakukurraaralpi puurnu-tjananya nyarra mirri-ya ngarrinytjanya. Nyangka-ya ngaalytjarrarringkulalpi wankarringu. Palunyalu-ya pakaralpi yarnangu minga-minga ngarala-wanarayintja.
11 Nyangka-rni Mama Kuurrtu watjarnu, “Yiitjikul, Yitjurayilku tjamupirti-ya tarrka mirripirinypa nyinarra. Tjiinya-ya watjalpayi, ‘Wiya, ngurra kutjupangka-latju kurltjirr-kurltjirrpa nyinarra. Tjiinya-latju tarrka mirripirinytju purtu kulira walykumunu nyinakitjalu. Nyaarriku-latju?’ Palunyapirinypa-ya watjalpayi. 12 Nyangka-tjananya watjala tjiinya-ya mirripirinypa ngarrirra pirtingka. Nyangka-tjananyarna pakaltjingara marlakulu katiku ngurra Yitjurayiltakutu. Nyangka-ya nyinama ngurra yungarrangka. 13 Palunyalu-rniya nintilu kulilku tjiinya-rna ngayulu Mama Kuurrnga Puurrpa Purlkanya nyinarra. 14 Tjiinya-tjananyarna ngayuku kuurti tjarrpatjunku. Nyangka-ya wankarringkula marlaku yanku ngurra yungarrangka nyinama. Palunyalu-rniya nintilu kulilku ngayulu-rna Puurrpa Purlkanya nyinarranyangka. Palunyalu-ya mularrkulilku tjiinya-rna kalkurnu wantitjatjanulu mularrpartu palyarnu.”
Yuwa, palunya.