55
Mama Kuurrtu-tjananya Watjarnu Walykumunura Kanyilkitjalu
1 Nyangka Mama Kuurrtu-tjananya palunyaku katja yurntalpirti nyarra Papulanta nyinarranytjanya ngaapirinypa watjarnu,
“Kapitjirratja-munta-yan nyinarra?
Wiya, pitja-ya tjikila kapi purlkanya ngaanya ngarrirranyangka.
Tjinguru-yan tjimarri wiya nyinarra.
Wiya, pitja-ya mirrka pirninya mantjiralpi ngala.
Pitja-ya wayinpa, miilki mantjiralpi tjikila,
tjimarri nintintjamaaltu.
2 Nyaaku-yan tjimarri tirtu wiyara mirrka palyamunungka?
Waarka purlkanya-yan palyara.
Palunyalu parltjamaalpa tirtu nyinarra.
Pina yarlarringkulalpi-rniya kulila.
Palunyalu-yan mirrka walykumunu pukurltu ngalkuma.
3 Pina yarlarringkulalpi-rniya kulila.
Ngayulakutu-rniya pitja wanka nyinakitjalu.
Palunyalu-tjananyarnanta kalkulku wantiku
walykumunura tirtu kanyilkitjalu.
Tjiinya-rna puurrpa Tayipirrnga kutjulpirtu kalkurnu wantingu
walykumunura kanyilkitjalu, palunyapirinypa.
4 Tjiinya-rnalu Tayipirrnga puurrpa nyinatjunu wantingu
yarnangu kutjupa-kutjupa pirniku.
Nyangka-ya puurrpa palunyanya nyakulalpi
ngayukutarrartu-ya nintirringu.
5 Yuwa, tjiinya-yan yarnangu kutjupa-kutjupa maliki pirninya yarltiku.
Nyangka-ya kukurrpa pitja-pitjama lurrtjurringkukitja.
Ngayulu-rna Mama Kuurrnga tjukarurru nyinapayinya
tjiinya Yitjurayilku tjamupirti-yan pupakatirra marninypungkupayinya.
Palunyalu-tjananyarna wuyurrmanku nyuntulakutu-ya pitjatjaku.
Palunyalu-tjananyarnanta nyinatjunku puurrpirinypa-yan nyinarratjaku.”
Palunyapirinypa Mama Kuurrtu watjarnu.
Mama Kuurrku Wangka Walykumunu
6 Pinkurraala-ya Mama Kuurrtakutu pitja tjiinya-tjananyanta watjaranyangka.
Tjiinya ngamurringu ngaralanyangka-ya tjapila.
7 Kutjupa-kutjupa palyamunu-ya palyaranytjatjanu wanti.
Puru-ya kutjupa-kutjupa palyamunu kuliranytjalu wanti.
Palunyatjanu-ya marlaku pitja Mama Kuurrtakutu.
Nyangka-tjanampankuyi ngarltunytju purlkanya waarrpungkulalpi kalyparriwa.
8 Nyangka Mama Kuurrtu ngaapirinypa watjaranytja,
“Nyuntulu-yankun yungarralu kulilpayi.
Nyangka-rna ngayulu kutjupartu kulilpayi.
Nyuntulu-yankun yara yungarra wanalpayi.
Nyangka ngayuku-tju yara kutjupartu ngarala.
9 Tjiinya yilkari katu mularrpa ngarala.
Nyangka-yan parnangurulu purtu nyakula.
Palunyapirinytju-yan ngayuku yara purtu kulira.
Tjiinyamarntu nyuntuku yarangka munkarra ngarala.
10 Ngayuku-tju wangka kapipirinypa.
Tjiinyakurlu kapi yilkaringuru tjutima, palunyapirinypa.
Tjiinya yarlaku punkalkitjamunu.
Kapi punkalku wantinyangka mirrka pakalpayi.
Nyangka-ya yurninypa purlkanya yurralpayi
ngalkukitjalu puru mantangka tjunkukitjalu.
Tjiinya yarlaku punkalkitjamunu.
11 Nyangka-tju ngayuku wangka kapipirinypa ngarala.
Tjiinya-rna yarlaku watjalkitjamunu.
Tjiinya ngayulu-rna watjaranyangka kutjupa-kutjupa yartakarripayi.
12 Yuwa, nyuntulu-yan ngurra nyarra Papulannga wantirra
pukurlpa kutipitjaku ngurra yungarrakutu.
Nyangka-tjananyantaya kalypalu ma-wanarayilku wantiku kutipitjanyangka-yan.
Nyangka purli purlkalu puru purli kurluny-kurlunypa pirnilu-tjananyanta
nyakula pukurltu turlku yinkama.
Nyangka-ya warta pirnilu-tjananyanta nyakula-wanarayilku
pukurltu-yanku mara pungama.
13 Nyangka-ya warta walykumunu pirni paka-pakaralpi
tjultjulpa ngarama tjiinya tjilka-tjilka purlkanya ngarapayingka.
Nyangka-ya yarnangu pirnilu nyaku warta palunyanya tirtu ngaralanyangka
kulilku tjiinya-rna Mama Kuurrtu yayirninytjulu palyarnu.”
Palunyapirinypa Mama Kuurrtu watjarnu.