24
Nzkotq-krbz Pol Mz Gavzna Filiks
1 Zbq nzlvqn mz nibrde, Ananaeas lc tqngi Nardr Pris badr kzdung lrtzlvzng, x kzdq loyz drtqde Tertzlzs, nzvzong mz taon kxetu Sisaria. Nzvz-ngrdr nzpipx-krdr nzvz-rbrkr Pol mz kot mrkc Gavzna Filiks tqngini-ngrde majzstret. 2 Pol nzkqle, x Tertzlzs sc tqpipxpele nzvz-rbr-krdeng. Rpibzle kx, “Kxetu Filiks, abrtzlvzpekr mzli kxboi kx nzmncngr mz nrwx, murde nzmnclz-ngrbz bam. X mrlzm bagr da kx tekqtrq mz nzokatr-krm nrlarnrlc nyzgr ka. 3 Zvz mz taon nyzgrng amrlx nzmc-krgrle brngz x awi-zlwzbzkr bam, kx kxetu Filiks. 4 A' trsutiu drtwrnge nzrtwz-ngrbz mzli nyzm kxkqlu. A' rlxtibo bam mz zmrlz ngrm, kx lalztqm ena mzli kxpipz.
5 “Mcpekr kx ncblo lc nide ncblo kx atrka da. Tqabzo-zvzle nzotablrngr mz mzlir lr Jiu mz nrlc talvzpx. X mailzle ncblo kcng tzvz-nqblqlr Jiszs kc Naszret. 6 Tqabz-kzle nzatrkatingr nztrkr Mangr-nzangiongr Yawe, x sc tqlolvzpekr nide. {Murde napipxkr nztubq-krde o trtingr mz nzvz-nqblq-krde lou scgr. 7 A' kamadz kc Lisizs vzm x katxpxmle bagr mz nzrtwz-krmle vea. 8 Zbz Lisizs rka natq kx krkcng tzpipxlr kx vz-rbrtile navzmqng bam.} Nzmu na-aveatrq ncblo lc, sc tqkrlzpeq mz nim esz'-krm nzvz-rbr-krdeng amrlx kcng tqpipxkr.” 9 Lr Jiu kcng nzprtrpzng mz nzpipx-krdr da kx vz-rbrtile x nzrpi-kzlr kx da lcng ngi da zpwx. * 24:5 Lou sc lr Rom yrlq-kaile nzrlxngitingr amrlx kx takitrde leplz kcng tzmnclzbzngr badr nzvz-nqblq-krdr. Kx trnzrvz-nqblqung lou nznibq. Lr Jiu lcng nzrpilr kx dzbede mz ncblo kcng Naszret ngi nzrlxngitingr kx trtakitrdeu mz gzpman ngr Rom. A' mz ngalrdeng 14-16, Pol aopxbzle kx leplz kcng tzvz-nqblqlr Kxnzmcpx nzprtr-kzng mz nzrlxngitikr lr Jiu, kc tqtakitrde mz gzpman ngr Rom. 24:8 Mz kzdung nzryr-ngrng kcng pnz, mrkc tqycngr maki kxmule lc { }, trnzycpxpqng elr.
10 Gavzna kc aycngrlrbzle narde mz Pol kx naycmne ye. X sc tqrpipebz Pol kx, “Krlzx kx ngini-pnzm majzstret mrka twztiqle yiz kqlupe. X abrtzx mz nzycmne-krnge mz nzaclve-lzbq-krnge. 11 Tr-rblxu nzrtangrti-krm da angidr, murde vz-ngrne Jerusalem mz nzangiongr x zbq kx nzpnu-esz'-nrade-li (12) kc ate. 12 Lr Jiu kcng trnzmclru nztalwz-krgr badr kzdq ncblo mz Mangr-nzangiongr Yawe. Trnzmc-kzlru nzrtrngztio-krnge nelz leplz, mz mangr-nzkrka'ngr nyzgrng o mz kzdq nrlc mz nabz mzteadau. 13 Rblx-kzpz badr nzpipx-krbzlr da kx ngi da angidr mz nzvz-rbr-krngeng. 14 A' naplzpxbo da lc. Angiox Gct ngr melrmqgrng mz nzvz-nqblq-krnge ‘Lrpzki r Kxetu.’ A' tzrpilr kx dzbede lc nzvz-rbrng. A' lxngiti-kzx da kcng amrlx tzyro mz buk ngr Lou x Profet. 15 X obqtipxx da kcpwz tzaenzlilr ncblo lcng, krlc kx leplz amrlx sa natulzmqng mz nzbzngr, kxmule-esz' kxnzmrlzng x kxnztrkang. 16 Mz nzmu-krde lcde, nabztq-ngrde etum bange kx narnge naopx-zvzbz mz Gct x leplz.
17 “Mz nibr nzprpx-krnge Jerusalem mz kzdung yiz, yzlu-moux mz nzrtwz-krbo trau kx nakabo mz Gct x kzdung trau kcng tzatakqti mz nzrka-ngrbz mz lr Jiu kcng trpnzngr scdr da. ✡Aposol 11:27-30; Rom 15:25-28; 1 Korint 16:1-4; 2 Korint 8—9 18 Mzli kc tqale-ngrne da lc, dekcpwz tzmc-ngrdr ninge mz Mangr-nzangiongr, mz nibr nzayrkrpx-krnge nzalqngi-lzbqngr mz nzangiongr. Trpnzngr zbo ngr ncblo kx nigr badr x trprtrwxu mz nztutilz-lzbqngr lc. 19 A' kzdung lr Jiu kx nzvzkimlr Esia Provins nzmncng mrkc. Nzmu kzdq da kx tqavz-rbrbole, navzmqng bam mz nzpipx-krdrle. 20 O kx tqmule leplz lcng mrlc napilr da kznike nzmclr vz-rbr-ngrne, mzli kc tqtu-ngrne mz Kansrl kc. 21 A' da esz'txupwz nemipxx mzli kc tqtu-ngrbo badr. Murde rpibo badr kx, ‘Rpiamu kx vz-rbrx mzbq ka murde lxngitix kx leplz kxnzbzpeng nalu-moung.’ ”
22 Zbz Filiks kc tqkrlz-angidrpele ‘Lrpzki r Kxetu,’ sc tqayrkrpxpebzle nzycmnengr kc. X sc tqrpipebzle badr kx, “Mzli kc kamadz Lisizs nakaputr-ngrmle, sc tqobqtrpebo elr.” †Opx-angidrbz mz leplz amrlx kx Pol trvz-rbru mz lou scdr lr Rom x vz-nqblq-angidrle lou scdr lr Jiu. Mz nzmu-krde lcde, mz nzprtr-krde mz dzbede kc tqmyapxbz, takitrde nzrlrpxpengr nide. Kxmule-esz', a' Filiks na-ale-kzle da kx mrlzbz mz lr Jiu.
23 Pibzle mz kxetu r dzbe ncblo ngr vea kc kx Pol namncpwz, a' narlr-kz-ngrbzle nzoprtane-krde x bzkq rpwa'-ngrbzle kztedeng nztwz-krmlr nikeng suti drtwrde.
Pol Alvztr-ngrde Filiks Mz Jiszs
24 Mz nibr kzdung zbq Gavzna Filiks nzvzmqng mz olvz rde Drusila, nide lr Jiu. Aveatipele Pol mz presin, x lalztqbz mz nzryapwx-daliti-krbzle Jiszs Kxnzmcpx. 25 Zbz Pol sc tqryapwxtrpe-ngrde da kxtubq mz nzobqkr Gct, nzaclve-lzbqngr, x nzayrplapxkr Gct kc navzm. Filiks kc tqmwxlrpe x sc tqrpipebzle kx, “Mrlzpe! Krlzpeq ye nzvzngr mzli ka. Na-aveati-krlz-mopwc' nim kx tqrngiscnge mzli.” 26 Mzli lc tqobqtipxle kx kzdq mzli Pol narkabz trau, murde na-avzpx-ngrmle nide mz presin. X mz drtwr lc, sc tqaveati-zvzle mz nzryapwx-krdr badr.
27 Yiz li kaputxpx. X mz nibrde Posizs Festzs sc tqtekqtrpele Filiks nzngini-krde gavzna. Filiks rpile namrlzti lr Jiu kcng, murde ma tzota-zvzng. X sc tqrlaszpebzle Pol mz presin. ‡Mz nzvz-nqblq-krde lou sc lr Rom, kzdq leplz na-avzpxm mz presin nzmu kx trkotqleu mz nabz yiz kxli. Kxmule-esz', mzli kc Pol na-avzpx-ngrmle, lr Jiu kcng drtwrdr ngyabz mz Filiks mz da kxkqlu. Filiks krlzle kx mzli trnaboiu, narmcti-lzbqng badr mz kot mz nzatubqtingr da lcdeng. Mz nzmu-krde lcde, rlaszpele Pol mz presin mz nzayc-nrwx-krbzle drtwrdr kx ngya. Gzpman ngr Rom aprpxle Filiks mz nzwz-krde murde leplz trnzmnc-lrpi-ngrdru mz nzrmailz-krde.
*24:9 24:5 Lou sc lr Rom yrlq-kaile nzrlxngitingr amrlx kx takitrde leplz kcng tzmnclzbzngr badr nzvz-nqblq-krdr. Kx trnzrvz-nqblqung lou nznibq. Lr Jiu lcng nzrpilr kx dzbede mz ncblo kcng Naszret ngi nzrlxngitingr kx trtakitrdeu mz gzpman ngr Rom. A' mz ngalrdeng 14-16, Pol aopxbzle kx leplz kcng tzvz-nqblqlr Kxnzmcpx nzprtr-kzng mz nzrlxngitikr lr Jiu, kc tqtakitrde mz gzpman ngr Rom. 24:8 Mz kzdung nzryr-ngrng kcng pnz, mrkc tqycngr maki kxmule lc { }, trnzycpxpqng elr.
✡24:17 Aposol 11:27-30; Rom 15:25-28; 1 Korint 16:1-4; 2 Korint 8—9
†24:22 Opx-angidrbz mz leplz amrlx kx Pol trvz-rbru mz lou scdr lr Rom x vz-nqblq-angidrle lou scdr lr Jiu. Mz nzmu-krde lcde, mz nzprtr-krde mz dzbede kc tqmyapxbz, takitrde nzrlrpxpengr nide. Kxmule-esz', a' Filiks na-ale-kzle da kx mrlzbz mz lr Jiu.
‡24:27 Mz nzvz-nqblq-krde lou sc lr Rom, kzdq leplz na-avzpxm mz presin nzmu kx trkotqleu mz nabz yiz kxli. Kxmule-esz', mzli kc Pol na-avzpx-ngrmle, lr Jiu kcng drtwrdr ngyabz mz Filiks mz da kxkqlu. Filiks krlzle kx mzli trnaboiu, narmcti-lzbqng badr mz kot mz nzatubqtingr da lcdeng. Mz nzmu-krde lcde, rlaszpele Pol mz presin mz nzayc-nrwx-krbzle drtwrdr kx ngya. Gzpman ngr Rom aprpxle Filiks mz nzwz-krde murde leplz trnzmnc-lrpi-ngrdru mz nzrmailz-krde.