Sam Kranzpnu-nzlvqn-nrade-rpwxmz (59)
Kxdrka'-ngrng Nzapulr Kuli Kzpeto
Nabz ne Devet kx yrbzle mz kxrmailz ngr dzbe kxnzngrng,
mzli kc King Sol tqatwzlr-ngrde ncblo mz nzaukzti-krdr ma nyz Devet, murde nanibqlr nide.
Kuli Kzpeto
1 Gct rnge, arlapxbz ninge mz enqmi rngeng,
X tum mz nibrnge mzli kc naoti-ngrmlr ninge.
2 Arlapx ninge mz kxdrka'ngr lcng,
Tzkrlzlr nzrnibqngr leplz.
3 Yawe, obqm! Ncblo lcng tzyrlwr-lxblrng nanibqlr ninge.
A' trpnzngr da kxtrka kx alebo badr.
4 Kxmule-esz', a' se tzoliqtilr nztz-krdr ninge.
Tulzm x vzm mz nzokatr-krm ninge.
5 Yawe, nim Gct kc tqrninr, Gct r lr Israel. Dwalzm mz nzayrplapx-krm lr mrkzbleng.
X bzkq ycngr drtwrm krkcng tzryrlqng drtwr kxtrka.
6 Nzyzluti-zvzmlr mztea mzli kc milzpq,
Nzapulr kuli kzpeto kcng tzkclwzng mz nzvzne-krdr mztea.
7 Drtwrdr nzamqmqlr x natqdr nzapulr toki r vea kxmalc.
Mz drtwrdr nzrpilr trpnzngr kx rkrlztrpz x trpnzngr nzayrplapxngr nidr.
8 A' nim Yawe, yrpalelvzq kxnzmnc-mrbr lcng,
X xtrnga-ngrn nidr.
Temz Ngr Lomrgr
9 Gct rnge, abrtr-zvzbo drtwrnge mz nzxplr-krm,
Murde nim lrpalvc nyznge.
10 X krlzx kx sa na-aovxiox enqmi rngeng,
Murde naokatrq ninge mz nzaodu-zvz-krm.
11 Yawe, nim temz ngr lomrgr kc tqyrputrngr nipna.
Nibqti nidr, murde leplz nengeng nadcpx mz drtwrdr
Kx nim Gct kc tqayrplapxle kxnzaleng alwx.
Aodaliti nidr mz zmatq ngrm, murde nataong mz drtc'.
12 Batrpz mz nzglqpx-lzbq-krdr nzatao-mou-krde nidr.
Murde mz nzycmne-krdr natqdrng ngi dalr alwx, mz nzrpibqtingr x nzpokiangr.
13 Odati nidr mz nzmilxtxo-krm nidr mz zngya ngr drtwrm.
Murde leplz nakrlzlr kx nim Gct kc tqaclvele lr Israel x lr nrlc tulvzo.
14 Nzyzluti-zvzmlr mztea mzli kc milzpq,
Nzapulr kuli kzpeto kcng tzkclwzng mz nzvzne-krdr mztea.
15 Nzrtangrng nadr dakxnzng me yctxpqng,
X drtwrdr nzamqmqlr mz trnzkrlc-kru nelzdr.
Lrpalvc Nyznge
16 A' sa nangr-kato-zvzx mz nourla kang kqlu,
Mz nzpipx-krnge zmatq ngrm x nzaodu-zvz-krm.
Murde apu-zvzme bange lrpalvc nyznge
Kxrlakitrx mz mzli r nzkxpungr.
17 Sa na-angrlvz-zvzx nim, Gct kc tqaodu-zvzle ninge.
Murde nim lrpalvc nyznge kx xplr-esz'ngr.