12
Olvz Kc Tqngi Israel X Doa Nede Kc Tqngi Mevalu
Zbz kzdq rkx kxmatq prpxm mz bongavz. X mcx kc olvz kq lrpz kx apule nepi, x tuo-ngrmle temz x ngrlelvzle narde vri nzpnu-esz'-nrade-li (12) apule kraon ngr narde. Olvz lc yr x tangqgx mz nzetqtikr drtqde nzrmika-krde.
Zbz kzdq rkx kxmatq prpx-mop mz bongavz. Krlcde mepwz kxpc kxetu, narde rlimz, taplxsr kraon kxtopwzting, x scde dxpa' kxetu nzpnu-esz'. Daniel 7:7 Mepwz lcde nqglqde iplro-ngrmle vri ngr bongavz kxnzkqlung mrka mz drtc'. X vzbz mz olvz kc, sc tqtu-pz'litrpebzle doa kc namikale, murde nangqde. Daniel 8:10 Olvz kc rmika x nede doa ncblo. A' doa ne olvz kc trngqu Mepwz kc murde nzglqlz-rlrubz mz Gct mrkc tqwxbu-ngrde mz tron. Nide kc na-aclvele leplzng amrlx mz zmatq kx xplr-esz'ngr, na-apule bz kc tqrniglc botol. Sam 2:9; Asaea 66:7 X olvz kc sc tqdwatrpe lzke, me oliqtibz Gct mz nzmncpx-krmle elr mz yiz kcng tq x ncte kc. Nzaelwapxngr 11:2
Enjrl Nzaovxiolr Drka' Neng Setzn
X vea kxetu kc tqprtzpe Heven, Narenjrl Maekol badr enjrl nedeng nzvecng badr Mepwz. X Mepwz badr enjrl nedeng nzotang badr. Daniel 10:13, 21; 12:1; Jud 9 8-9 Mepwz kxetu kc tqngi kz ningidoe ngr nrlanc kc bqnc, tzrpi-kzpz ‘Nar Drka'’ x ‘Setzn.’ Nide enqmi r leplz murde tqpibqle leplz x tqesabrtile leplz ngr nrlc atwrnrngr. Nzvecng x Mepwz badr enjrl nedeng sc tzaovxiopeng Maekol badr enjrl nedeng. X trnzrlrpe-ngrpwzu nzmnc-krdr mou Heven. Nzrtcmipxngr enjrl nedeng Heven x nztaomqng mz nrlc, mz nzngini-krdr drka'. Nou 3:1; Luk 10:18
10-12 Mz nibrde, xlrx kc natq kxetu Heven, rpile kx, Job 1:9-11; Sekaraea 3:1
“Gct rgu sa na-arlapxle
Leplz nedeng mzli ka.
Sa natwzpele zmatq ngrde,
X nangipe King mz nrlc.
Kxnzmcpx nede twzpele zmatq ngrde,
X Setzn kc tqpibqtitr-
Zvzbzle kztegung
Mz mz Gct rgu,
Nzrtcpxpengr Heven.
 
“A' kztegung nzaovxiopelr
Nide mz zmatq ngr mepyr
Ngr Nei Sip. X nimu lr Heven
Na-abrtz-zlwzamu.
A' nimu lr nrlc ka
Na-aclvetioamu.
Nar Drka' vzopebz bamu.
Drtwrde ngya zlwz murde nzmnc-krde
Mrla mzli trnaboiu.”
Mepwz Nzotang Badr Olvz Kc X Doa Nedeng Amrlx
13 Kx glxpe Mepwz kc nzrtco-ngrm nide mz nrlc, sc tqmaneutinepele lxede doa kc. 14 A' olvz kc lvctr-ngrde mrnyzde mrkc lzke nabx lr kxetu li kx nzkabz bade. X namncpx-ngrmle mrkc nakrlzbzle yiz kxtq x ncte kcng, murde namnc-rlrubz mz Mepwz kc. Daniel 7:25; 12:7 15 Zbz Mepwz kc sc tqbyape-ngrbzle lue kxkqlu mz nibr olvz kc, murde natwz nubla ngrde x trpnzngr nzrlapx-krde. 16 A' drtc' okatrle olvz kc. Amzpxle naode x mnqle nubla ngr lue kc tqbyapxngr Mepwz kc yrkrtxo. 17 Zbz Mepwz kc sc tqngyatipe drtwrde olvz kc, x sc tqvzpe mz nzvec-krdr badr kzdung kz doa nedeng, kcng tzvz-nqblqlr Loukxtr sc Gct, x tzlxngitilr natq angidr kcng tqpipx Jiszs.

12:3 Daniel 7:7

12:4 Daniel 8:10

12:5 Sam 2:9; Asaea 66:7

12:6 Nzaelwapxngr 11:2

12:7 Daniel 10:13, 21; 12:1; Jud 9

12:8-9 Nou 3:1; Luk 10:18

12:10-12 Job 1:9-11; Sekaraea 3:1

12:14 Daniel 7:25; 12:7