Ebbaluŋa endaayi eyi Pawulo gaŋandiihira
Abasesalonika
Enyanjula
Pawulo omuhwenda wa Yesu njʼowaŋandihira Abasesalonika ebbaluŋa endaayi yino. (1:1) Abahugu mu byʼEbbayibbuli baŋeega baati Pawulo gaŋandiiha ebbaluŋa yino mu mwaha ogwʼataanu namulala oluvanyuma lwʼohusaaliwa hwa Kurisito. Era gayiŋandiihira abafugiirira Kurisito abʼe Sesalonika nʼali e Koriiso. Pawulo gatandiha ehibbubbu hyʼabafugiirira Kurisito ehyo nʼali hu lugendo lulwe olwohubiri mu hubuulira Amaŋuliro Amalaŋi aga Yesu Kurisito (Bik 17:1-10). Ehibbubbu hyʼabafugiirira Kurisito ehyo, hyalimo Abayudaaya nʼAbayonaani.
Oluvanyuma lwʼohwegulaŋo ehibbubbu hyʼabafugiirira Kurisito ehyo, Pawulo sigamenya e Sesalonika ehiseera hireeŋi. Olwʼehyo, gaŋandiiha ebbaluŋa yino ohubagumya. Ebbaluŋa yino yirimo bingi, ohuhirira erala eroma hu engeri eyi bafugiirira Kurisito bali nʼohwebisyamo. Era yiroma hu hugobola hwa Kurisito. Hamunga abafugiirira Kurisito abʼe Sesalonika baali basinga hwenda ohuŋulira hu hiitu hyehyo. Olwʼehyo Pawulo atambisa ohugobola hwa Kurisito ngʼehiitu ehiri nʼohutuŋa amaani ohuba nʼobulamu obusangaasa Hatonda (5:6-8).
Ebiri mu bbaluŋa yino mu buupi
1. Obuheese nʼohweyaasa Hatonda (1:1-8)
2. Amaŋuliro agagobosamo amaani (2–3)
3. Obulamu wʼabafugiirira Kurisito nʼengeri eyi Yesu Kurisito aligobola (4:1–5:15)
4. Obuheese nʼengohoba (5:16-28)
1
Obuheese
1 Ese Pawulo nʼabahyange Siluvaano ni Temuseewo, hubaŋandiihira enywe abaatu ba Hatonda Seefe ni Yesu Kurisito Musengwa, ehibbubbu hyʼabafugiirira Kurisito mu hibuga hyʼe Sesalonika. Hubendesa ekabi nʼemiyaaya.
Obulamu nʼohufugiirira hwʼabaatu bomu Sesalonika
2 Hweyaasa Hatonda habuhyabuhya olwenywe mwesimwesi, era hiisi olu husaba, sihuhaya hubaŋaayo eyiri Hatonda mu saala jeefe. 3 Habuhyabuhya hiisi olu hweŋomeha mu moni ja Seefe era Hatonda weefe ohusaba, huhebulira ebi muhola ohulaga ohufugiirira hwenywe nʼohwenda ohu muli ni nahwo ohweraga mu ngeri eyi muhatabaanamo olwa abahyenywe. Era huhebulira nʼohugumikiriza ohu muli ni nahwo olwʼesuubi eri muli ni nalyo mu hugobola hwa Musengwa weefe Yesu Kurisito.
4 Aboluganda, humanyire huuti muli bahoda eyiri Hatonda, era ngʼolu gabatobola mube baatu babe. 5 Hino huhihahasa olwohuba mwesi hwababuulira Amaŋuliro Amalaŋi, agataali mu bibono bubono aye ni galiho nʼohuhola hwʼamaani gʼOmwoyo Omutukuvu, ohuhahasa ti ebi hwali ni huloma, bituufu. Era ngʼolu mumanyire, ni hwali eyo ni nenywe, mwabona engeri eyi hwebisyangamo olwʼohwenda ohubayeeda mutwegereho.
6 Mwalonderera esambo jeefe neja Musengwa weefe Yesu, olwohuba wayire ngʼabaatu babagudya olwʼobuhwenda obu hwabaleetera, cooka mwawufugiirira nʼesangaalo eryʼOmwoyo Omutukuvu.*1:6: Bik 17:5-9 7 Mu ngeri eyo mwafuuha hyahuboneraho eyiri abafugiirira bosibosi abomu twale lyʼe Makedoniya nʼerya Akaya. 8 Olwʼehyo, ŋaahani obuhwenda wa Yesu Musengwa busaseene, simu Makedoniya nʼAkaya mwoŋene, aye efuma yʼohufugiirira hwenywe, yoolire hiisi ŋaatu. Efe nindi hino ŋabula ehi hitwetagisa ohuhiromaho, 9 olwohuba abaatu abeene baloosa engeri eyi mwatuhuumamo ni hwaja ewenywe. Era baloosa ngʼolu mwafuluha mwaleha emigaami mwagobola eyiri Hatonda Omulamu era omutuufu, mumuŋeerese 10 era ngʼolu mulindirira Omwana wuwe Yesu ohugobola ohuŋwa mwigulu, oyu galamusa era ngʼomwene oyo njʼatuŋonia ehiruŋi hya Hatonda.