Ebbaluŋa eyohubiri eyi Pawulo gaŋandiihira
Abasesalonika
Enyanjula
Ebbaluŋa ya Pawulo eyiri Abasesalonika gayiŋandiiha mu mwaha ogwʼataanu namulala oluvanyuma lwʼohusaaliwa hwa Kurisito. Era mu hiseera ehyo, Pawulo gaali ahiiri e Koriiso (Bik 17:1-10). Mu hibuga Sesalonika, mwalimo abafugiirira Kurisito Abayudaaya nʼAbayonaani.
Mu bbaluŋa yino, Pawulo aloma hu biŋamba hu biseera byʼekomerero nʼohugobola hwa Kurisito. Era alabula abafugiirira Kurisito ohutalera ngalo. Ahubbirisa hiisi muutu ohutambanga ohusuna ehyohulya (3:6-10).
Ebiri mu bbaluŋa yino mu buupi
1. Ohweyanjula (1:1-2)
2. Ohweyaasa Hatonda nʼohulombera abafugiirira Kurisito (1:3-12)
3. Ebiseera byʼekomerero (2)
4. Hiisi muutu ali nʼohutamba (3:1-15)
5. Agohoba nʼobuheese (3:16-18)
1
Ese Pawulo nʼabahyange Siluvaano ni Temuseewo, hubaŋandiihira enywe ehibbubbu hyʼabafugiirira Kurisito mu hibuga hyʼe Sesalonika. Muli baatu ba Hatonda Seefe ko ni Musengwa Yesu Kurisito. Hatonda era Seefe ko ni Musengwa Yesu Kurisito babaŋambire ehisasabirisi era babaŋe emiyaaya.
Ohugumya abafugiirira
Aboluganda, efe huli nʼohweyaasa Hatonda habuhyabuhya olwenywe. Ehyo husaniiye ohuhihola olwohuba ohufugiirira hwenywe huli hweyongera hweyongera ohuŋangala, era ohwenda ohu hiisi mulala hu nywe gendamo owahye, hweyongera. Ehyo hwesi hituŋa obugumu ni huba nʼebibbubbu ebindi ebyʼabafugiirira Kurisito, ohwenyumiirisa olwenywe. Hwenyumiirisa olwenywe olwohuba mugumiikiriza ohuhiyaania ohu babahiyaania era mugumira ohugada olwʼohufugiirira Kurisito.
Ebyo byosibyosi bujulizi obulaga ngʼolu Hatonda atehubbira mu hulamula huhwe, era hu komerero ngʼolu mulisaanira ohwingira obuŋugi wa Hatonda obugira ni mugada. Hatonda saalyaha, aliboneresa ababahiyaania, ate enywe aba bahiyaania ŋalala ni neefe gaatuŋa obuŋeerero. Ebyo biribaaŋo Musengwa weefe Yesu nʼalyeyeyula* 1:7 Oba nʼalyehwehula. nʼaŋwa mwigulu ohugobola hu hyalo, abamalayika babe abʼamaani ni bamuŋerehera. Yesu aliijira mu himyaso hyʼomuliro abonerese abatamanyire Hatonda, ni nʼabo abagaana ohufugiirira Amaŋuliro Amalaŋi aga Musengwa. Abaatu abo begula mubiri. Balisasula olwʼebibi ebibahola. Hatonda alibaŋa ehiguudyo ehyʼohubabbinga ohuŋwa mu moni ja Musengwa weefe nomu ŋono lirye eryʼamaani, era baliba mu hugada emirembe nʼemirembe.* 1:9 Yis 2:10
10 Ebyo biriboolaho hu ludaalo olu Yesu Musengwa aligoboleraho, abafugiirira bosibosi bamuŋe eŋono olwʼebyo ebi aliba nʼaholeeye abaatu babe. Era mwesi muliba balala hu baatu abo olwohuba mwafugiirira obuhwenda obu hwabaleetera.
11 Olwohuba muja huŋeesa Musengwa eŋono, habuhyabuhya hubasabira, Hatonda weefe ababone ngʼabasaanira ehyo ehi gabalangira, era mu buŋangi buwe goheerese emirimo emiraŋi josijosi eji muhola nʼeji muluubirira ohuhola olwʼohufugiirira hwenywe. 12 Husaba ehyo hyolerere ko abaatu baŋe Musengwa weefe Yesu eŋono olwʼohubanoŋola era mwesi hu lulwe babaŋe eŋono olwʼehisasabirisi hya Hatonda weefe, ni Musengwa Yesu Kurisito.

*1:7 1:7 Oba nʼalyehwehula.

*1:9 1:9 Yis 2:10