Ebikolwa byʼabahwenda ba Yesu
Ebikolwa
Enyanjula
Ehitabo EBIKOLWA BYʼABAHWENDA BA YESU hiroma hu ngeri eyi hibbubbu hyʼabafugiirira Kurisito hyatandihamo era nʼengeri eyi hyasasaana ohuŋwa mu Yerusaalemu hyatiina mu twale lyʼe Buyudaaya nʼe Samaliya ko nʼebitundu ebindi. Ehyo hyaliŋo ngʼolu Yesu galoma abahwenda babe ko gatiina mwigulu (1:8). Luka njʼowaŋandiiha ehitabo hino. Luka oyo gaali musaŋu era gegenderesa mu pandiiha yiye. Amaŋuliro Amalaŋi nʼEbikolwa byʼAbahwenda ba Yesu, gabiŋandiihira nje Tefiiro owaali Omuyonaani (1:1).
Hiboneha hiiti ehitabo Ebikolwa byʼAbahwenda ba Yesu bahiŋandiiha ŋagati wʼomwaha gwʼenkaaga nʼenkaaga neene oluvanyuma lwʼohusaaliwa hwa Kurisito olwohuba hiheneresa ni bahiiri hulehula Pawulo ohuŋwa mu komera. Luka gagendanga ni Pawulo era hiboneha oti gahiŋandiihira mu hibuga Atiyokiya. Ehitabo Ebikolwa byʼAbahwenda ba Yesu hitandihira aŋa bahomya Amaŋuliro Amalaŋi aga Yesu Kurisito ngʼolu Luka gagaŋandiiha era hitandiha ni hiroma hu huŋiriwa hwa Yesu mwigulu.
Luka mu huŋandiiha ehitabo hino gaali nʼehigendererwa cʼehyene hyʼehi gaali ni nahyo nʼaŋandiiha Amaŋuliro Amalaŋi aga Yesu Kurisito. Luka gendire Tefiiro, nʼabafugiirira Kurisito abaali ni beyongera obungi habuhyabuhya ohugumya ebyo ebi baali ni babegirisa. Olwʼehyo gaŋandiiha bulaŋi bugali nʼanyonyola ebiŋamba hu bulamu wa Yesu nʼengeri eyi Maŋuliro Amalaŋi gasasaana mu hyalo.
Ehitabo Ebikolwa byʼAbahwenda ba Yesu, hituŋa ehyʼohuboneraho ngʼolu ehibbubbu hyʼabafugiirira Kurisito ehidaayi hyagumira mu hufugiirira Kurisito. Abahwenda ba Yesu beesiga Omwoyo Omutukuvu gabaŋa amaani, babuulira abaatu abeene abangi.
Ebiri mu hitabo hino mu buupi
1. Omwoyo Omutukuvu geeha hu bahwenda (1:1–8:1)
2. Bahiyaania abafugiirira Kurisito era Amaŋuliro Amalaŋi gasasaana mu bitundu ebindi (8:2–12:23)
3. Olugendo oludaayi olwa Pawulo ohutiina ohubuulira (12:24–14:28)
4. Oluhiiho lwihala mu Yerusaalemu (15:1-35)
5. Olugendo olwohubiri olwa Pawulo ohutiina ohubuulira (15:36–18:22)
6. Olugendo olwohudatu olwa Pawulo ohutiina ohubuulira (18:23–20:38)
7. Pawulo bamuŋambira mu Yerusaalemu (21–26)
8. Baŋira Pawulo e Rooma (27–28)
1
Owʼeŋono Tefiiro, mu hitabo hyange ehidaayi nahuŋandiihira ni kuloohesa ebyo ebi Yesu gatiina nʼahola era nʼasomesa ohuŋwa olu gatandiha ohuhola omulimo gugwe,* 1:1 Luk 1:1-4 ohwolera erala hu ludaalo olu gatiina mwigulu nʼahenire ohulaabbira abahwenda babe abagatobola, Omwoyo Omutukuvu nʼamutangirira. Abanamaani ni bamuhomerera hu musalabba, gafa bamusiiha aye ngʼalamuha. Ni galamuha gahena endaalo amahumi ane nʼatiina nʼabonehera abahwenda babe abo ŋano ni naŋala ohuhahasa ati dala gaali mulamu era gabalomeranga ebiŋamba hu Hatonda nʼobuŋugi buwe mu bulamu bwʼabo abamufugiirira. Lulala ni gaali ni nabo ni bali hu hiiŋulo gabaloma ati, “Simuŋwanga mu Yerusaalemu ohwola olu Bbaabba alibaŋeeresa ehirabo ehyʼOmwoyo Omutukuvu oyu gabasuubisa ngʼolu mbayenga ni mbalomera.* 1:4 Luk 24:49 Yowaane omubatiza gabatizanga abaatu nʼamaaji aye enywe mu ndaalo ejitali jaŋaleeŋi muja hubatiziwa mu Omwoyo Omutukuvu.”* 1:5 Luk 3:16; Yow 1:33
Yesu atiina mwigulu
(Mar 16:19-20; Luk 24:50-53)
Nindi olundi ni baali ni bahumbeene, abahwenda babuusa Yesu baati, “Olwo Musengwa, mu hiseera ehyene ehyo kehi olibbingiramo Abarooma abatuŋuga ewe waŋuga Yisirayiri hya Dawudi omuhalehale olu gaŋuganga?” Nga Yesu abagobolamo ati, “Sihyenywe ohumanya ebiseera oba oludaalo lwʼebyo ebiri mu tegeha nʼobuŋangi wa Bbaabba.”
Wabula ehi muli nʼohumanya hiri hiiti Omwoyo Omutukuvu nʼanahabeheho anahabaleetere ohuba nʼobuŋangi mwalomera abaatu bomu hibuga Yerusaalemu, abomu twale eryʼe Buyudaaya nʼerye Samaliya ko nʼabomu hyalo hyosihyosi ebipambaho.
Ni gagwisa ebibono ebyo, nga Hatonda amuŋira mwigulu. Gatiina bosibosi ni bamutaayeho emoni ohwola olu ehireri hyamuwiiha gaabagotaho.* 1:9 Mar 16:19; Luk 24:50-51 10 Baali bahirengereeye engira eyamuŋira ŋa mugulu, ngʼaŋo ni naaŋo ŋabaaŋo abasinde babiri abaali ni bambaaye engoye ekosa abaaja bemeerera aŋa baali. 11 Ngʼabasinde abo bababuusa baati, “Enywe abasinde bʼe Galilaaya, hiina ehibemeerehise ŋano ni mulengereeye ŋamugulu? Yesu oyo oyu muweene nʼatiina mwigulu po aligobola atyo ngʼolu mumuweene nʼatiina.”
Matiya agobola mu hifo hya Yuda
(Mat 27:3-10)
12 Ngʼaŋo abahwenda baŋwa aŋa baali hu lusozi olwʼemisaala ejibalanga baati Emizayiti baagamayo mu hibuga Yerusaalemu. Olusozi olwo lwali suulu nʼomunwa ohuŋwa mu hibuga ehyo.* 1:12 Ebbayibbuli ejindi jiroma jiiti, olugendo olu amagambi gafugiiriranga omuutu ohugenda hu ludaalo lwa Sabbaato. 13 Ni boola mu Yerusaalemu nga bengira mu nyumba omu bamenyanga, baniina mu hisenge hyawe ehyali ŋamugulu. Abaatu bano baali nje Peetero ni Yowaane ni Yakobbo nʼAndereya ni Filipo ni Tomasi ni Bbatulumaayo ni Matayo ni Yakobbo omwana wʼAlufaayo ni Simooni omuzelote ni Yuda omwana wa Yakobbo. 14 Abaatu bano bosibosi ko nʼabahasi abagenderanga ŋalala ni Yesu nga pomuli abaganda babe ni nyina Malyamu bahumbaananga aŋa ni naŋa ohusaba.
15 Lulala mu biseera ebyene ebyo, Peetero gemeerera ŋagati mu bahye abaali ni bafugiirira Kurisito abaali ni baŋera abaatu nga cikumi nʼabiri ngʼabaloma ati, 16 “Aboluganda, Ehyaŋandiihiwa ehi Omwoyo Omutukuvu gawihulira habaha Dawudi hyali nʼohwolerera. Ehyaŋandiihiwa ehyo hiŋamba hu Yuda owatangirira abaja ohuŋamba Yesu 17 ate nga gaali wahyefe, yeesi oyu Yesu gangala hyefe huhole obuŋeeresa buno.”
18 (Ebbeesa eji baamuŋa olwʼehikolwa hihye ehyo ehibi bajigulamo ehisugu era mu weene omwo ni geetuga, gaŋanuha hu musaala ohu geetugira gagwa ngʼehida hyosuha nʼebyomuhida nga bijofumuha.* 1:18 Mat 27:3-8 19 Hiisi muutu mu hibuga Yerusaalemu gaŋulira ehiitu ehyo era baguliha nʼehifo ehyo esiina mu lulimi lwawe baati Akeludama amahulu galyo ti, “Ehisugu hyʼamafugi.”)
20 Ngʼaŋo Peetero atiina mu moni abaloma ati, “Dawudi gaŋandiiha mu hitabo hya Zabbuli ati,
“ ‘Leha ehibbwe hyembere mu gunda lirye,
ŋaŋume amenyamo.’
“Era ati,
“ ‘Ehifo hihye bahiŋe omuutu owundi.’* 1:20 Zab 69:25; 109:8
21 “Olwʼehyo hyenda mwangale omuutu owundi agendire ni neefe ehiseera hyosihyosi ehi hubaaye ni Yesu Musengwa, 22 ohwemera erala mu biseera bya Yowaane omubatiza ohwola olu Yesu gatiina mwigulu, agobole mu hifo hya Yuda atweŋimbeho mu hulomera abaatu ngʼolu Yesu galamuha.”* 1:22 Luk 3:21; 24:51
23 Ngʼaŋo baleeta amasiina gʼabaatu babiri, Yosefu oyu balanganga baati Barusabba ko nʼerindi baati Yusito ko nʼowundi ni bamulanga baati Matiya. 24 Nga basaba baati, “Musengwa ndiiwe omanyire ebiri mu myoyo jʼabaatu bosibosi. Olwʼehyo husunga otulage oyu ewe omwene otobooye hu bano bombi, 25 agobole mu hifo hya Yuda mu mulimo gwʼobuhwenda ogu niye galeha gaaja emusaanira.” 26 Ni bahubba ahalulu, hagwa hu nje Matiya era nga geŋimba hu bahwenda bala ehumi namulala.

*1:1 1:1 Luk 1:1-4

*1:4 1:4 Luk 24:49

*1:5 1:5 Luk 3:16; Yow 1:33

*1:9 1:9 Mar 16:19; Luk 24:50-51

*1:12 1:12 Ebbayibbuli ejindi jiroma jiiti, olugendo olu amagambi gafugiiriranga omuutu ohugenda hu ludaalo lwa Sabbaato.

*1:18 1:18 Mat 27:3-8

*1:20 1:20 Zab 69:25; 109:8

*1:22 1:22 Luk 3:21; 24:51