1 Ni ŋabitaŋo endaalo etaanu, ngʼomuhulu wʼabasengi oyu balanga baati Ananiya nʼabalala hu baatu abahulu mu diini yʼAbayudaaya ko ni puliida waawe oyu balanganga baati Terutuulo batiina e Kayisaaliya ohuŋaŋabira Pawulo mu kooti yʼomuŋugi ola oyu balanga baati Filikisi. 2 Filikisi ni galagira baaleeta Pawulo mu kooti nga Terutuulo ganja esonga ati,

“Oweŋono Filikisi, obutangirisi buwo nʼohulengera huhwo aŋale bituleeteeye emiyaaya nʼekulakulana mu gwanga lino.

3 “Olwʼehyo mubbala Filikisi, mu buli ngeri husiima bugali weene ebi otuholera mu hiisi hifo. 4 Aye ohutahudembya bugali, leha salire ni kulomba olwʼehyere hihyo wutegere ohutwi oŋulirise mu buupi ehi huhaabya omusinde ono.

5 “Huhyageene huuti Pawulo ono musinde wa mutawaana, era ajeemesa Abayudaaya bosibosi hiisi ŋaatu mu hyalo. Nʼehindi njʼomutangirisi wʼehibbubbu hyʼabaatu abasomesa ebyʼobudulingi aba balanga baati, ‘Abaloobera bʼOmunazaleesi.’ 6 Era nʼohugesya gagesyaho ohuhola ehiitu ehyʼembiho mu Yekaalu, ehifo hyefe ehyawufu, nga ko humuŋamba ni hwenda ohumusalira omusango. 7 Aye omudumisi wʼabasirikale oyu balanga baati Lusiya nga gaaja amutusaŋo lwa mbaha, ngʼalagira abamuŋaŋabira baaje oyi oli.*24:7 Ebyaŋandihiwa ebindi ebyahale biŋuma bibono ebyʼolunyiriri luno. 8 Ewe wamwene oluvanyuma lwʼohwendulirisa hu songa jino oja hunafaania oti ebyo byosibyosi ebi humuhaabya bituufu.” 9 Ni gagwisa ebibono ebyo, ngʼabatangirisi bʼAbayudaaya bosibosi nga bamusemba ni bahahasa baati ebi pulida galoma hu Pawulo byali bituufu.

10 Bala ni bahena ohwanja ebyawe, nga Filikisi agesya nʼomuhono ohuŋa Pawulo ehiyale ohweŋosyaho. Nga Pawulo aloma ati, “Mubbala, manyire ngʼolu ohenire emyaha mingi nʼolamula abaatu bʼegwanga lino. Olwʼehyo ndi nʼesangaalo ohweŋosyaho mu moni jijo.

11 “Ewe omwene oŋanga ohwendulirisa era wahihahasa oti endaalo ejitatuma ehumi nʼebiri egongo natiina e Yerusaalemu ohujumirya Hatonda. 12 Abo abapaŋabira sibanjageeneho ni ŋaliŋo oyu pahana ni naye oba ni sasamasa abaatu mu Yekaalu oba mu humbaaniro lyʼAbayudaaya oba mu hifo hyosihyosi mu hibuga ehyo. 13 Era sibaŋanga huŋa buhahafu eyi oli hu ebyo byosibyosi ebi bandumiirisa hu esaawa yino. 14 Ohutusaho hituufu era nihirisa ti njumirya Hatonda oyu basehulu beefe bajumiryanga, ni nonderera Engira ya Yesu eyi bo balanga mbo yabudulingi. Era fugiirira ebyo byosibyosi ebiri mu magambi aga Hatonda gaŋa Musa nʼebi banaabbi baŋandiiha. 15 Era keesi ndi nʼesuubi hya nibo ti hu ludaalo olwʼekomerero, Hatonda aliramusa abagwalaafu nʼababi. 16 Ehyo cʼehigira habuhyabuhya ni fuba bugali ohugendera mu bulamu obugwalaafu mu moni ja Hatonda nʼejabaatu.

17 “Oluvanyuma lwohuba ebulafu ohuhena emyaha ejiŋera, naagamayo e Yerusaalemu ohuŋirira abalebe bange Abayudaaya obuyeedi obwʼohugabira abahyawe abagadi nʼohuŋayo eŋongo eyiri Hatonda. 18 Mu hiseera ehyo ni banjagaana mu Yekaalu, naali kenire ohuhola omukolo ogʼohwegwalaasa ngʼolu efugiirira mu diini yeefe yiri. Sinaali nʼehiŋindi hyʼabaatu era ŋaŋuma hutabulatabula ohu neŋimbamo. 19 Aye ŋaaliŋo Abayudaaya abandi abaŋwa mu twale lyʼAsiya njʼabaleetera abaatu ohutabuha. Abo hani mbabahabaaye mu moni jijo bandumirise hanye hituufu ndi nʼehibi ehi nʼahola. 20 Ni hitaba hiityo, bano abali ŋano balome esobi eyi bapamba ni nayo olu neŋosyaho mu Luhiiho lwʼAbayudaaya Oluhulu. 21 Hamunga baloma baati bakaabya ehi nahayaana mu moni jaawe ni ndoma ti, ‘Posya mu moni jenywe olwohuba fugiirira ti Hatonda aliramusa abafu ohuŋwa e magombe.’ ”

22 Ngʼaŋo Filikisi gemeeresa ohuŋulirisa omusango ogwo olwohuba gaali amanyire bulaŋi ehi abaatu abagendera mu Ngira ya Musengwa bafugiiriramo. Ngʼabaloma ati, “Kulawudiyo Lusyasi omudumisi wamaŋe nʼaliija nga ko sala omusango gwenywe.” 23 Ngʼalagira omudumisi wʼehibbubbu hyʼabasirikale ecikumi ohuhuuma Pawulo aye nʼamuleheraho edembe era afugiirire abameeri babe bamuŋirirengaho obuyeedi.

24 Ni ŋabitaŋo endaalo ejiŋeraho, nga Filikisi atiina nʼomuhasi wuwe Omuyudaaya oyu balanga baati Durusila. Ni goola ngʼatumiisa Pawulo, ngʼaŋulirisa nʼamulomera hu byʼohufugiirira mu Yesu Kurisito. 25 Aye Pawulo ni gaali nʼahimunyonyola hubi muutu ali nʼohuhola ko asangaase Hatonda, omuutu ngʼolu ali nʼohuba nʼebbulegi mu ngeri eyi gebisyamo, nʼehya Hatonda ohusalira abaatu omusango ni geema hubi hiisi muutu ahola, ngʼobuti bumuŋamba aloma Pawulo ati, “Ebi wundomeeyeho bikena! Oŋanga ohwagamayo. Ni ndisunaŋo ahamanga ahalaŋi nindi ndihulanga.” 26 Nʼehindi, Filikisi gamulomanga ebyo mula nʼasuubira ati Pawulo aŋanga ohumuŋaamo ahaatu amulehule. Hino hyaleetera Filikisi ohutumisanga Pawulo emigigi nʼemigigi aŋayeho ni naye.

27 Ni ŋabitaŋo emyaha ebiri, Porukiyo Fesito ngʼasikira Filikisi mu tebe oyʼobuŋugi. Cooka olwʼohwenda ohusangaasa Abayudaaya, Filikisi galeha Pawulo nʼali muboŋe mu komera.