Ebbaluŋa eyi Pawulo gaŋandiihira
Abakolosaayi
Enyanjula
Pawulo njʼowaŋandihira Abakolosaayi ebbaluŋa yino mu mwaha ogwʼenkaaga namulala oluvanyuma lwʼohusaaliwa hwa Kurisito. Pawulo gaŋandiiha ebbaluŋa yino, nʼali mu komera era abahugu mu byʼEbbayibbuli bateberesa baati gaali e Rooma. Ebbaluŋa ja Pawulo eyiri Abakolosaayi nʼAbefeeso ni Filimooni ko nʼejindi, bajiranga baati jomu komera olwohuba gajiŋandiiha nʼali mu komera. Ebbaluŋa yino gayiŋandiihira abafugiirira Kurisito abomu hibuga hyʼe Kolose. Pawulo sinje owatandiha ehibbubbu hyʼabafugiirira Kurisito ehyʼe Kolose (2:1). Hiboneha oti Epafuraasi njʼowatandiha ehibbubbu hyʼabafugiirira Kurisito ehyo olwohuba gaali musaale wʼe Kolose.
Pawulo gaŋandiihira ehibbubbu hyʼabafugiirira Kurisito ehyʼe Kolose olwʼabasomesa abʼobudulingi abaali ni bababbaamya. Abasomesa abo baali basomesa baati omuutu ohunoŋoha, ali nʼohuhuuma amagambi gʼEhiyudaaya ngʼolu Ndagaano Ekayire yiroma. Pawulo gaŋandiiha nʼaloma ati abafugiirira Kurisito betaaga nje Yesu Kurisito yeŋene, Hatonda ohubabala bagwalaafu (1:15-20) era ati esomesa eyo yaali peega yʼomuutu buutu. Olwʼehyo, eŋuma mahulu (2:8).
Ebiri mu bbaluŋa yino mu buupi
1. Obuheese (1:1-2)
2. Owegingihiriri wa Kurisito (1:3–3:4)
3. Obulamu obu bafugiirira Kurisito bali nʼohubamo (3:5–4:6)
4. Obuheese nʼohulabbira abafugiirira Kurisito (4:7-18)
1
Obuheese
1 Ndiise Pawulo omuhwenda wa Yesu Kurisito olwʼohusiima hwa Hatonda. Ndi nʼomulebe yeefe Temuseewo, 2 mbaŋandiihira enywe abaatu ba Hatonda abesigwa era abafugiirira Kurisito abali mu hibuga ehyʼe Kolosaayi. Hatonda Seefe abaŋambire ehisasabirisi era abaŋe nʼemiyaaya.
Ohusaba nʼohweyaasa hwa Pawulo
3 Habuhyabuhya ni hubasabira, hweyaasa Hatonda Semwana wa Yesu Kurisito Musengwa weefe, 4 olwohuba hwaŋulira ngʼolu mufugiirira Yesu Kurisito era ngʼolu mwenda abagwaalafu bosibosi. 5 Ohufugiirira Yesu Kurisito nʼohwenda abaatu ba Hatonda ohumuli ni nahwo, bisimuha mu esuubi eri muli ni nalyo eryohusuna ebiraŋi ebi gabategehera mwigulu. Esuubi eryo, mwalisuna olu mwaŋulira Amaŋuliro Amalaŋi agʼamazima. 6 Amaŋuliro ago gatiina ni gahwana ehyalo hyosihyosi ni galeetera abaatu ekabi ngʼolu gaholire mu enywe, ohuŋwera erala hu ludaalo olu mweheerera ohuŋulira amazima agaŋamba hu hisasabirisi hya Hatonda mwahifaania. 7 Epafuraasi omutambi wahyefe, omuhoda, omwesigwa era omuŋeeresa wa Kurisito njʼowabasomesa Amaŋuliro Amalaŋi ago hu lwefe. 8 Era gatuŋayira nohu ngeri eyi mwendamo abaatu ba Hatonda ngʼOmwoyo Omutukuvu njʼabatangirira.
9 Olwʼehyo, ohuŋwa olu hwaŋulira huuti mufugiirira Yesu, habuhyabuhya sihuleherangaho hubasabira, Hatonda abaŋe ohumanya ohuŋwa ewʼOmwoyo Omutukuvu, mufaanie ebi genda. 10 Husaba huutyo muŋange ohwebisya mu sambo esaana era esangaasa Musengwa mu hiisi ngeri ni muhola ebiraŋi era mweyongere ohumanya Hatonda, 11 abaŋe amaani ko muŋange ohwehaliiriha hiisi higosi ni muli basangaafu, 12 ni mweyaasa Hatonda Seefe agira ni muli bagwalaafu, abali mu njase yiye era mulisuna ekabi jije josijosi. 13 Olwohuba gaatutusa mu wahabaha wa Sitaani owʼehiirema gatuŋira mu buŋugi wʼOmwana wuwe omuhoda, 14 era ohubita mu Mwana oyo, Hatonda gatununula ngʼatusoniŋa ebibi.
1 Owegingihiriri wa Kurisito
15 Kurisito oyo pomu Hatonda ataboneha abonehera, njʼOmwana wuwe ahira obuŋangi era aŋuga hiisi hiitu. 16 Hatonda gaabita mu Kurisito oyo ohutonda ebiitu byosibyosi mwigulu nohu hyalo, ebyo ebiboneha nʼebitaboneha, abahabaha nʼabanamaani nʼobuŋangi wosiwosi. Ebiitu byosibyosi bibye era njʼagira byabaŋo. 17 Kurisito gaaliŋo ni ŋahiiri hubaŋo ehiitu hyosihyosi era njʼaŋambirira byosibyosi. 18 Kurisito njʼomutwe gwʼomubiri gugwe, ko mbabamufugiirira era njʼesimuho yʼobulamu waawe. Njʼomudaayi ohuŋwa mu bafu ko aŋuge hiisi hiitu. 19 Hatonda gasalaŋo ati ehyo ehi ali mu wiijufu hibe mu Kurisito, 20 era nʼabita mu Mwana wuwe oyo, galeetaŋo omuhago ŋagati wuwe nʼebiitu byosibyosi ebiri mwigulu nohu hyalo. Mu ngeri eyo, Kurisito gataŋo emiyaaya olwʼamafugi gage olu gafa hu musalabba.
21 Ni mwali ni mu hiri hufugiirira Kurisito, mwali basigu mu ebiŋeego nʼebikolwa byenywe ebibi era ni muŋuma ekolagana endaŋi ni Hatonda. 22 Aye ŋaahani Hatonda gafaaŋana ni nenywe nʼabita mu mubiri gwa Kurisito olu gaafa hu musalabba ko mube bagwalaafu ni muŋumaho hamogo wayire omusango gwosigwosi mu moni jije. 23 Mutiine mu moni ni muli bagumu mu hufugiirira Kurisito era mutadanya esuubi eri mwasuna olu mwaŋulira Amaŋuliro Amalaŋi. Amaŋuliro ago, njʼagababuulira hiisi muutu hu hyalo era keesi Pawulo nafuuha mulala hu bagabuulira.
Obuŋeeresa wa Pawulo eyiri abafugiirira Kurisito
24 Sifayo wayire ndi hugada kasita ohugada huno ohu ngada, ngada hu lwenywe ni nongerera hu ohwo ohu Kurisito gagada hu lwʼabo abamufugiirira. 25 Hatonda gaafuula omuŋeeresa wʼabafugiirira Kurisito era gaapa omulimo ogwʼohubalomera ehibono hihye mu wiijufu.
26 Amaŋuliro Amalaŋi ago, njʼehyama ehi gaali nʼagihise abaatu aye ŋaahani ahihwehuliiye ababe. 27 Hatonda gabahwehulira ehyama ehyo olwohuba gendiire enywe Abatali Bayudaaya mwesi muhitegeere ngʼolu hiri ehyʼomugaso bugali weene era ehyʼeŋono. Ehyama ehyo cʼehino ti Kurisito ali mu enywe, njʼesuubi lyenywe eryohusuna eŋono lya Hatonda. 28 Olwʼehyo, hulomera hiisi muutu ebiŋamba hu Kurisito oyo ni hubatebusa era ni hubasomesa nʼamagesi aga Hatonda atuŋa, ko hiretere hiisi muutu ohuŋuma ehyaŋumiraho mu hufugiirira Kurisito. 29 Ehyo cʼehigira ni fululuhana bugali weene olwʼamaani ga Kurisito amabitirifu agabonehera mu ese ni kola emirimo jije.