Ebbaluŋa eyi Pawulo gaŋandiihira
Abefeeso
Enyanjula
Pawulo njʼowaŋandihira Abefeeso ebbaluŋa yino mu mwaha ogwʼenkaaga oluvanyuma lwʼohusaaliwa hwa Kurisito. Abahugu mu byʼEbbayibbuli baloma baati wayire mu bbaluŋa yino, mubulamo obuheese hyʼobuli mu Bakolosaayi, Pawulo njʼowayiŋandiiha. Hamunga ebbaluŋa yino yali yahugenda mu bibbubbu byʼabafugiirira Kurisito mu twale eryo. Pawulo aloma ati gaali mu komera aŋa ŋandiihira ebbaluŋa yino (3:1; 4:1; 6:20). Pawulo gaŋindiha Tukikasi nʼebbaluŋa yino owaali hu lugendo ohuhyalira abafugiirira Kurisito mu hibuga Efeeso (6:21-22).
Efeeso hyali hibuga ehibbala mu twale lyʼAsiya mu buŋugi wʼAbarooma. Era ehibuga Efeeso hyali himanyihene olwa yekaalu yʼArutemi hatonda wʼAbayonaani (Bik 19:23-31). Mu hutandiha, abafugiirira Kurisito bʼEfeeso baali bʼamaani aye oluvanyuma banafuŋa mu hufugiirira hwawe (Hweh 2:1-7).
Mu hitundu ehidaayi ehyʼebbaluŋa yino, Pawulo anyonyola ngʼolu Hatonda gatobola abaatu babe era gahena gabanoŋola ohuŋwa mu bibi byawe era ehyo gahihola nʼabita mu Yesu Kurisito. Ageragerania abafugiirira Kurisito ohuba hyʼomubiri nga Kurisito njʼomutwe, era nohu nyumba nga Kurisito njʼebaale eryʼomusonda. Mu hitundu ehyohubiri, Pawulo ahubbirisa abafugiirira Kurisito ohuba nʼobulamu obusaanira omuutu atya Hatonda.
Ebiri mu bbaluŋa yino mu buupi
1. Pawulo geyanjula era aheesa Abefeeso (1:1-2)
2. Ekolagana ŋagati wa Kurisito nʼabafugiirira babe (1:3–3:21)
3. Obulamu wʼabafugiirira Kurisito (4:1–6:20)
4. Engohoba (6:21-24)
1
Enyanjula
1 Ndiise Pawulo omuhwenda wa Yesu Kurisito olwʼohusiima hwa Hatonda. Pandiihira enywe abagwalaafu, abesiga Yesu Kurisito abali mu hibuga Efeeso.*1:1 Ebyaŋandihiwa ebindi sibiroma biiti “mu hibuga Efeeso.” 2 Hatonda Seefe ni Musengwa Yesu Kurisito babaŋambire ehisasabirisi era babaŋe emiyaaya.
Ekabi ohubita mu Kurisito
3 Hujumirya Hatonda Semwana wa Musengwa weefe Yesu Kurisito owabitira mu Kurisito ohutuŋa hiisi kabi ejomwigulu. 4 Hatonda nʼahiiri hutonda ehyalo gaatutobola, nʼabita mu Kurisito, hube bagwalaafu ni huŋumaho hamogo mu moni jije. Olwʼohutwenda, 5 gasalaŋo ohuŋwa ahale nahale ohutufuula baana babe nʼabita mu Yesu Kurisito olwʼohusiima huhwe, 6 cʼehigira huli nʼohumujumirya olwʼehisasabirisi hihye ehi gatuŋa nʼabita mu Mwana wuwe oyo omuhoda. 7 Kurisito ni gafa, amafugi gage gatununula ngʼatusoniŋa ebibi. Ehisasabirisi hya Hatonda 8 ehi gatuyomboolera hyatuŋa amagesi ohufaania etegeha yiye. 9 Era gatuhwehulira ehyama ehi gaali nʼategehire ohwoheresa nʼabita mu Kurisito. 10 Etegeha yiye yiri yiiti ehiseera ni hyolire, aleete ŋalala ebiitu byosibyosi ebiri mwigulu nohu hyalo, ŋaasi wʼobuŋugi wa Kurisito.
11 Olwa Kurisito, Hatonda gatutobola gaahena gatwabula ohuba abaatu babe ngʼolu genda era ahola byosibyosi ni geema hu tegeha yiye yira eya halehale, 12 ko efe Abayudaaya abehereeye ohuba nʼesuubi mu Kurisito, humujumirye era humuŋe eŋono. 13 Era enywe Abatali Bayudaaya mwesi Hatonda gabafuula abaatu babe ni mwaŋulira amazima, njʼAmaŋuliro Amalaŋi agaŋamba hu hunoŋoha. Ni muhenire ohufugiirira Kurisito, gaabaŋa Omwoyo Omutukuvu oyu gabasuubisa ohuŋwa ahale nahale ohulaga ati muli babe.
14 Omwoyo oyo njʼahabonero ahahahasa haati Hatonda alituŋa ebi gasuubisa abaatu babe era ti aja hutununula, leha humujumirye olwʼeŋono lirye.
Ohweyaasa nʼohusaba hwa Pawulo
15 Olwʼehyo, ohuŋwa olu nʼaŋulira ti mufugiirira Yesu Musengwa era mwenda abagwaalafu bosibosi, 16 sindeherangaho ohweyaasa Hatonda hu lwenywe mu husaba hwange. 17 Mbasabira ti Hatonda wa Musengwa weefe Yesu Kurisito era Seefe oweŋono, abaŋe Omwoyo Omutukuvu ko mwahaba nʼamagesi mumutegeere bulaŋi. 18 Era saba ti emoni jenywe ejomu hida jirimbuhe mufaanie ebiitu ebyʼamaani ebi Hatonda gabalangira era mulindirire ni ŋaŋuma hubuusabuusa ebi gasuubisa abaatu babe. 19 Saba ti mutegeere amaani gage amabitiirifu ohuhira gosigosi era agatuyeeda efe abafugiirira.
20 Amaani ameene ago, njʼagalamusa Kurisito ngʼahena geehala mu hifo ehyʼeŋono hu lubega lwʼomuhono omulungi ogwa Hatonda mwigulu. 21 Kurisito oyo ali ŋamugulu wʼobuŋangi nʼabaŋugi era aŋuga abanamaani nʼabahombe bosibosi, siŋahani hyoŋene aye emirembe nʼemirembe. 22 Hatonda gaata ebiitu byosibyosi ŋaasi wʼobuŋangi wa Kurisito, ngʼamufuula Musengwa†1:22 Oba “omutwe.” era aŋuga hiisi hiitu olwʼabo abamufugiirira. 23 Abafugiirira abo, njʼomubiri gwa Kurisito era njʼaleetera hiisi hiitu ohuba nʼobulamu.