Ebbaluŋa eyiri
Ababbebbulaniya
Enyanjula
Ebbaluŋa yino eyiri Ababbebbulaniya bayiŋandiiha ohugobosa mu bafugiirira Kurisito amaani olwohuba eraga ngʼolu Yesu goheresa obunaabbi mu Ndagaano Ekayire. Emirundi nkaaga, ebbaluŋa yino yiraga ngʼolu Yesu goheresa emirimo ejʼOmusengi Omuhulu ngʼolu hiri mu Ndagaano Ekayire. Era olwohuba gajoheresa, sihyetagisa basengi ba Hatonda ohweyongera nʼohuŋonga. Yesu gaŋonga obulamu wuwe olwʼebibi byʼabaatu, lulala lwoŋene era ngʼehyo hiŋwa. Ebbaluŋa yino yihubbirisa abafugiirira Kurisito ohwesiga Hatonda olwʼehyo ehi Yesu gaahola (12:2).
Ŋaŋuma amanyire owaŋandiiha Ababbebbulaniya aye abahugu mu byʼEbbayibbuli baŋeega baati gaali nje Pawulo oba Luka oba Bbalunaba. Owaŋandiiha ebbaluŋa yino, aloma hu biŋamba hu hibuga Yerusaalemu ehi basihiirisa mu mwaha ogwʼesanvu oluvanyuma lwʼohusaaliwa hwa Kurisito. Ehyo hitegeesa hiiti ebbaluŋa yino, bayiŋandiiha Yerusaalemu ni yihiriŋo. Baŋandiiha ebbaluŋa yino eyiri Ababbebbulaniya mu hibuga hyʼe Rooma (13:24).
Ebiri mu bbaluŋa yino mu buupi
1. Yesu ahira abanaabbi nʼabamalayika (1:1–4:13)
2. Yesu ahira abasengi ba Hatonda abaŋeeresa mu Yekaalu mu Yerusaalemu (4:14–7:28)
3. Obuŋeeresa wa Yesu waŋamugulu hu buŋeeresa wʼendagaano eyʼamagambi aga baŋa Musa (8:1–10:31)
4. Yesu muhulu mu hiisi ngeri (10:32–13:17)
5. Ohugobosamo amaani ko nʼobuheese (13:18-25)
1
Hatonda aloma nʼabita mu Mwana wuwe
1 Halehale Hatonda galomanga nʼabasehulu beefe emirundi mingi nomu ngeri nyingi nʼabita mu banaabbi. 2 Aye mu ndaalo jino ejʼoluvanyuma, Hatonda aloma ni neefe nʼabita mu Mwana wuwe oyu gataŋo ohuba omusika wa hiisi hiitu era omwene oyo njʼoyu gabitamo ohutonda ehyalo. 3 Mwana wuwe oyo, njomu eŋono nʼehifaananyi hya Hatonda bibonehera era niye njʼaŋengerera ehyalo hyosihyosi nʼatambisa amaani gehibono hihye. Ni gahena ohuhola ehyo ehi Hatonda gemaho ohusoniŋa abaatu ebibi, gatiina geehala mwigulu hu lubega lwʼomuhono omulungi ogwa Hatonda omwene buŋangi.
Yesu ahira abamalayika eŋono
4 Hatonda gaŋa Omwana wuwe eŋono erihira eryʼabamalayika ko nʼesiina erihira agaawe. 5 Ale njʼani hu bamalayika oyu Hatonda gaaloma ati,
“Oli Mwana wange,
olwa leero kusaaye?”
Oba ati,
“Nja huba Semwana,
yeesi aja huba Mwana wange?”*1:5 Zab 2:7
6 Era Hatonda ni gaali nʼanatere ohutuma Omwana wuwe omudaayi hu hyalo, gaaloma ati,
“Abamalayika ba Hatonda bosibosi bamujumiryenga.”*1:6 Mag 32:43
7 Eyiri abamalayika, Ebyaŋandihiwa biroma biiti,
“Hatonda afuula abamalayika ohuba hyʼembeŋo,
nʼabaŋeeresa babe ohuba hyʼendimi jʼomuliro.”*1:7 Zab 104:4
8 Aye hu Mwana wuwe biroma biiti,
“O Hatonda, oja huŋuga emirembe nʼemirembe.
Era oja huŋuga nʼotehubbira,
9 Wenda abo abahola ebyolereeye, era ocaawa abaatu ohuhola ebibi.
Olwʼehyo, Hatonda wuwo ahutobooye mu bahyo
era gaahuta mu hifo ehyʼeŋono,
ehiitu ehija huhuŋweramo esangaalo
ohuhiraho abahyo.”*1:9 Zab 45:6-7
10 Era aloma ati,
“Ewe Musengwa, mu hutagiha watonda ehyalo,
era nʼegulu ndiiwe owalihola.*1:10 Zab 102:25-27
11 Egulu nʼehyalo biriŋwaŋo, aye ewe obeererera.
Byosibyosi birihayiriŋa hyʼolugoye,
12 Olibifumbaaho hyʼolugoye,
era biricucuha hyʼehyambalo.
Aye ewe osigala cʼehyene,
era obaŋo emirembe nʼemirembe.”
13 Njʼani hu bamalayika oyu Hatonda gaaloma ati,
“Yiihala hu lubega olwʼomuhono gwange omulungi,
ohwola olu ndifuula abasigu babo ekookolo eyʼohutaho amagulu gago?”*1:13 Zab 110:1
14 Abamalayika bosibosi si njʼemyoyo ejiŋeeresa Hatonda, era eji atuma ohuyeeda abo abalinoŋola?