3
Yesu ahira Musa eŋono
1 Ale baluganda, enywe aba Hatonda galanga musune omugabo gwʼobulamu obwomwigulu, muŋeegenga hu Yesu Omuhwenda era Omuhulu wʼabasengi ba Hatonda oyu hufugiirira. 2 Niye gaali mwesigwa eyiri Hatonda owamutobola ohuhola omulimo gugwe, ngʼolu Musa gaali mwesigwa mu nyumba ya Hatonda.*3:2 Hub 12:7 3 Cooka ngʼolu omutongoli aba nʼeŋono erihira enyumba eyi atongola, ni Yesu asaniira ohuba nʼeŋono erihira erya Musa. 4 Hiri hiityo olwohuba hiisi nyumba ebaaho owayitongola aye owatongola hiisi hiitu nje Hatonda. 5 Musa gaali muŋeeresa mwesigwa mu nyumba ya Hatonda era gaaloma hu biitu ebi Yesu gaali nʼaja hulomaho mu biseera ebyomu moni. 6 Aye Kurisito ngʼomwana, mwesigwa mu nyumba ya Hatonda. Ndiife enyumba ya Hatonda singa husigala ni huli bagumu era ni huli nʼesuubi eryo eri hwebonehesyamo.
Mwegenderese ohutaleheraŋo ohufugiirira
7 Ngʼolu Omwoyo Omutukuvu aloma ati,
“Olwa leero ni munaŋulire ejanjaasi lirye,*3:7 Zab 95:7-11
8 mutahahanyasa myoyo jenywe,
hyʼabasehulu benywe olu bajeema
hu ludaalo olu bahemeraho Hatonda mu lulafu,
9 eyo eyi basehulu benywe baakema,
era ohuhena emyaha amahumi ane baabona ebinabahola.
10 Cʼehyagira naluŋira abaatu abo,
era nʼaloma ti, ‘Habuhyabuhya emyoyo jaawe jiŋaba,
era sibaŋamba magambi gange.’
11 Ni naluŋa nalayira ti,
‘Sibalyola mu hifo omu naali nʼohubaŋeramo ehiŋuumulo.’ ”*3:11 Zab 95:7
12 Olwʼehyo, aboluganda, mweŋomehe ŋatabaŋo kadi mulala hu enywe aba nʼomwoyo oguŋemba ohuhola ebibi era ogutafugiirira, gaaŋwa hu Hatonda omulamu. 13 Aye hiisi muutu agumyenga owahye hiisi ludaalo, ni huhiiri mu “Olwa leero” ko ŋatabaŋo wayire mulala hu enywe oyu hibi hidulinga gahahanyasa omwoyo gugwe. 14 Hiri hiityo olwohuba hwafuuha abaloma ehirala mu Kurisito kasita hugumihisya erala owesigwa weefe obu hwatandiha ni nawo ohwola olu huliŋwa hu hyalo huno. 15 Ebyaŋandihiwa biroma biiti,
Olwa leero ni munaŋulire ejanjaasi lirye,
mutahahanyasa myoyo jenywe,
hyʼabasehulu benywe olu bajeema.*3:15 Zab 95:7-8
16 Mbaba ani abaŋulira ejanjaasi lya Hatonda bamujeemera? Mbabo bosibosi aba Musa gaatusa e Misiri.*3:16-18 Hub 14:1-35 17 Era mbaba ani aba Hatonda galuŋira ohuhena emyaha amahumi ane? Mbabo abonoona, baafa era emirambo jaawe jasigala mu lulafu. 18 Era mbaba ani aba Hatonda galayirira ati sibalingira mu hiŋuumulo hihye? Mbabo abamujeemera. 19 Olwʼehyo, hubona ti sibengira mu hiŋuumulo hihye olwʼohutafugiirira hwawe.