8
Omuhulu wʼabasengi owʼendagaano epyaha
1 Ehihulu ehi huli hulomaho cʼehino ti, huli nʼOmuhulu wʼabasengi ba Hatonda era gehaaye mwigulu hu lubega lwʼomuhono omulungi ogwa Hatonda Omwene Buŋangi.*8:1 Zab 110:1 2 Omuhulu wʼabasengi oyo aŋeeresa mu Hifo Ehihirira erala Owabufu mu weema eyi Hatonda Musengwa omwene gabbota, sosi abaatu.
3 Hatonda gataŋo hiisi muhulu wʼabasengi ohuŋangayo ebirabo nʼeŋongo. Olwʼehyo, ni Yesu yeesi gaali nʼohuba nʼehi aŋayo. 4 Abanga nʼahiiri hu hyalo, sigahali musengi wa Hatonda kadi naŋadiidiri olwohuba eriyo abasengi abaŋaayo ebirabo ngʼolu magambi galagira. 5 Ebi abasengi abo bahola bifaana bufaane hyʼebyo ebiri mwigulu. Era Musa ni gaali nʼaja hubbota eweema, Hatonda gamulagira ati, “Hola byosibyosi nʼolonderera endagiriro eyi wasuna ni waali hu lusozi Sinaayi.”*8:5 Huŋ 25:40 6 Aye obuŋeeresa wa Yesu buhira owʼabasengi abadaayi ngʼolu endagaano epyaha eyi gahola nʼafaaŋania abaatu ni Hatonda yihira endaayi olwohuba yediiye hu bisuubiso ebisinga obulaŋi.
7 Endagaano endaayi yibanga ni yaali nʼeŋuma ehiŋumiraho, Hatonda sigahaholire eyohubiri. 8 Aye Hatonda Musengwa galoma ni goloobya abaatu babe ati,
Hatonda Musengwa aloma ati:
Ehiseera hinahoole,
nʼahola endagaano epyaha
nʼabaatu ba Yisirayiri,
ko nʼabaatu abomu hiha hya Yuda.
9 Siyiriba hyʼendagaano
eyi nahola nʼabasehulu baawe,
olu nabaŋamba hu muhono
nabatusa e Misiri.
Aye olwohuba sibagumya ndagaano eyo,
keesi nalehayo ohubaŋulirisa.
10 Yino njʼendagaano eyi ndihola nʼAbayisirayiri
mu hiseera ehiija.
Ndiŋandiiha amagambi gange
hu myoyo jaawe.
Banahanjumirye nga Hatonda waawe,
era boosi baliba baatu bange.
11 Ŋaliŋuma alisomesa omulebe wuwe oba muliranwawe,
nʼamuloma ati, “Osaana ohumanya Musengwa.”
Olwohuba ohuŋwera erala hu baŋere ohwola hu bahulu,
bosibosi baliimanya nga Musengwa yaawe.
12 Olwohuba ndisoniŋa ebibi byawe
era sindibihebulira kadi naŋadiidiri.*8:12 Yer 31:31-34
13 Hatonda nʼaloma hu ndagaano epyaha, endaayi aba ayidibisye. Era ehiitu banahidibya hiba hiŋuma mugaso.