2
Kurisito ngʼehyohuboneraho
1 Ohuba bulala ni Kurisito hibaŋa amaani? Olwohuba abenda sihibasangaasa? Muli bulala nʼOmwoyo Omutukuvu? Muŋambanira ehisasabirisi era hiisi muutu asaasira owahye? 2 Olwʼehyo, mbahubbirisa ohusangaasa ni muŋeega hirala, ni mwendana era ni muli nʼomwoyo mulala. 3 Muteyendesanga ebiraŋi mweŋene oba olwʼohwepaahapaaha aye mu hweŋomeha muŋirenga abaatu abandi ohuba nʼeŋono ohubahiraho. 4 Simufanga hu byenywe byoŋene aye mufenga nohu byʼabandi boosi. 5 Mubenga nʼepeega hyʼeyi Yesu Kurisito gaali ni nayo,
6 Wayire Kurisito gaali Hatonda,
sigasigala
mu hifo ehyo.
7 Aye getusaho eŋono lirye,
gafugiirira ohufuuha omuŋeeresa
gasaaliwa ngʼomuutu.
8 Era mu huba omuutu,
gaali mugondi
nʼohwola erala olu gafa hu musalabba.
9 Olwʼehyo Hatonda gaamuŋa obubbala,
nʼobuŋangi nʼesiina
erihira amasiina gosigosi obuŋangi,
10 ebitonde byosibyosi ebiri mwigulu nohu hyalo,
era ni nʼebyo ebiri ŋaasi wehyalo
bihubbirenga Yesu oyo amafuha,*2:10 Yis 45:23
11 era abaatu bosibosi baŋe
Hatonda Bbaabba eŋono
ni babbutula baati
Yesu Kurisito nje Musengwa.
Ohumasamasa hyʼemunyeenye mu hyalo
12 Olwʼehyo, balebe bange abahoda, ngʼolu mubaayenga ni mugondera Hatonda sosi ni ndi eyo ni nenywe hyoŋene aye hu nyanga yino ni mbulayo, mweyongere ohuhola ebiitu ebisaanira abaatu aba Hatonda ganoŋola. Muhole hino nʼohuteetema olwʼohumuŋa eŋono 13 olwohuba Hatonda njʼabayeeda ohwenda ohuhola ebigenda muhole era gaabaŋa nʼamaani ohubihola.
14 Ebiitu byosibyosi ebi muhola, mubiholenga ni mutemulugunya oba ni mutaŋahana nʼabahyenywe. 15 Ni muhola muutyo, eriŋuma muutu yesiyesi aliboloobya era mumenye mu bulamu obulaŋi ngʼabaana ba Hatonda mu hyalo hino ehyagodama era ehijuuye abaatu abahola ebibi. Mu hyalo hino, mube hyʼemunyeenye ejihosya egulu.*2:15 Mag 32:5 16 Mwegumye ohulomera abaatu ehibono hya Hatonda, ehibaleetera ohusuna obulamu obutaŋwaŋo. Singa muhola muutyo, muja hundeetera ohuba nʼohwenyumiirisa hu ludaalo olwʼekomerero olu Kurisito aligoboleraho, ohufabiina hwange eyo sihwali hufuuŋa muuya mu hisero. 17 Singa banjita, amafugi gange galiba hyʼehyohunywa*2:17 Mu biseera ebyo, Abayudaaya bajuhanga envinyo ohwongera hu ŋongo. ehibalitufuula ohwongera hu ŋongo nʼobuŋeeresa wenywe olwʼohufugiirira Kurisito era ehyo hindeetera ohusangaalira ŋalala ni nenywe mwesimwesi.*2:17 Hub 15:1-12 18 Era mwesi musangaalire ŋalala ni nange.
Temuseewo nʼEpafuladito
19 Musengwa Yesu Kurisito nʼalisiima, suubira ohubatumira Temuseewo mangu, ahene agobole gandomere ebibafaho nahagobolamo amaani. 20 Puma wundi yesiyesi abalumirwa bugali hya niye. 21 Olwohuba abahira obungi beyendulira byawe, sibafayo hu ebi Yesu Kurisito genda. 22 Aye mumanyire muuti Temuseewo abaaye mwesigwa olwohuba ngʼomwana ni semwana, huholeeye ŋalala omulimo ogwʼohubuulira Amaŋuliro Amalaŋi. 23 Suubira ohumuŋindiha eyo oluvanyuma lwʼohumanya ebiitu ngʼolu bitiina eno. 24 Era kahasa ti Musengwa anahaganye bandehula, nga niija eyo mu hiseera ehitali hyaŋale.
25 Aye ni kiiri huuja eyo, mbwene ti hiraŋi ohubaŋindihira omuŋeeresa wahyange era owoluganda Epafuladito oyu mwatumira ohunjeedanga. 26 Olwohuba genda bugali mumuhubbeho emoni ko weyite olwʼohunyolwa ohu ali ni nahwo olwʼohumanya ati mwaŋulira ngʼolu galwala. 27 Hituufu galwala era ŋatono afe aye Hatonda gamuŋambira ehisa, sigasaasira niye yeŋene aye ni nange keesi, gaaponia obutahi. 28 Cʼehigira nenda bugali ohumutuma eyo, ko mwahasangaala ni mumuweneho era keesi ndeheraŋo ohweŋendeherera. 29 Mumusangaalire mu kola eyʼabaatu ba Musengwa. Era muŋenga abaatu hyʼabo eŋono, 30 olwohuba gaŋonera hu haala ohufa ni ganjeeda mu mulimo gwa Kurisito hu lwenywe.