1 Ŋaahani ewe osalira owahyo omusango olwʼehibi ehi aholire obula hyahweŋambya, olwohuba esambo eyi omusaliramo weesi oba ogwesalira, nange ti ebi omusalira omusango weesi mbebi ohola.*2:1 Yis 52:5 2 Ŋaahani humanyire huuti Hatonda nʼasalira abaatu hyʼabo omusango guba guboola. 3 Aye ewe omuutu obuutu onabasalira omusango ate nga ko weesi ebi bahola mbebi ohola, oŋeega oti oliŋunuha Hatonda ohuguhusalira? 4 Aŋo sooba nʼotala ohwehaliriha nʼehyere hya Hatonda ehibitiirifu? Somanyire oti Hatonda ahuŋambira ehisasabirisi wahehubba mu hifuba wacuusa omwoyo gugwo? 5 Aye olwʼobuhahadafu wʼomwoyo gugwo nʼotenda hwebbwaga, wehumbaanihisyaho ehiruŋi hya Hatonda ehyohu ludaalo olwʼekomerero olu alisaliraho emisango nʼatehubbira. 6 Hu ludaalo olwo “Hatonda aliŋa hiisi muutu omuhemba ogwolana nʼebigahola.”*2:6 Zab 62:12 7 Era abo abegumya ohuhola ebiraŋi olwʼohwenda Hatonda abambase eŋono nʼobulamu obutaŋwaŋo, aja hubibaŋa. 8 Aye abo abahola ebyawe hu waawe ni banyumirwa ebyʼobudulingi mu hifo hyʼamazima, Hatonda aja hubagudya nʼehiruŋi ehyʼamaani. 9 Ebiitu biriba bibi eyiri hiisi muutu ahola ebibi, ni bitandihira hu Muyudaaya ko ogoboseho Atali Muyudaaya. 10 Aye Hatonda alyambasa hiisi muutu ahola ebiraŋi eŋono era gaamuŋa nʼemiyaaya nʼatagihira hu Muyudaaya nga ko aloosaho Atali Muyudaaya. 11 Hatonda alihola atyo olwohuba paaŋo muutu oyu aboola.*2:11 Mag 10:17

12 Wayire Abatali Bayudaaya baŋuma magambi aga Hatonda gaŋa Musa aye balibasalira omusango ni bateema hu magambi ago. Ne nibo Abayudaaya abahola ebibi, balibasalira omusango ni beema hu magambi olwohuba bagamanyire. 13 Bino mbiroma olwohuba abaatu aba Hatonda abala ohuba abagwalaafu simbaabo abaŋulira huŋulira ebi magambi galoma aye abahola ebi galagira. 14 Abatali Bayudaaya baŋuma magambi aga Hatonda gaŋa Musa. Aye banahola ebiri mu magambi mu hutegeera hwawe ohwʼobusaale, ehyo hiba egambi eyi bali. 15 Ebi bahola biraga biiti Hatonda gaŋandiiha amagambi hu myoyo jaawe. Era hireetera emyoyo jaawe ohubaloma jiiti hino oholire hiraŋi oba hibi. 16 Bino biryolerera hu ludaalo olu Hatonda alisalira abaatu emisango nʼabita mu Yesu Kurisito, ejʼebyo ebi baholanga mu ngiso era buno njʼobuhwenda obu ndomera abaatu.

17 Mwepaahapaaha olwohuba mbo muli Bayudaaya, abamanyire amagambi era mweginiha olwohuba mbo muli baatu ba Hatonda olwʼekolagana eyʼenjabulo eriŋo ŋagati wenywe ni naye. 18 Era mweginiha olwohuba mbo mumanyire ebi Hatonda genda abaatu bahole olwohuba mubisoma mu magambi. 19 Era mweŋira ohuba ndinywe abaŋambira abaŋofu omuhoomero era muli enjase eyiri abo abahiiri mu hiirema. 20 Mweŋira ohuba abasomesa bʼabaŋubeebe era baabo abali hyabaŋere abatamanyire ehi bahola. Ehyo muhiroma olwohuba mbo muli nʼamagambi era mumanyire amazima. 21 Ale ŋaahani enywe aberanga abahaŋunye, ni mundomere! Enywe abasomesa abandi, lwahiina simwesomesa mwabeene? Musomesa muuti abaatu bataba nʼomuhono omuleeŋi aye enywe muguŋuma? 22 Muloma muuti abaatu bataba nʼemoni enyangu, enywe muyiŋuma? Muduhirira abajumirya ebifaananyi, ebitali Hatonda, aye simuŋuuna mu bifo ebi bajumirihisyamo ohunyagulula ebyamo? 23 Enywe abepaaha mbo mugendera mu magambi ga Hatonda, simuhubba Hatonda esoni ni mugabbwaga? 24 Olwʼebyo ebi muhola, cʼehigima hyaŋandiihiwa hiiti, “Mugira Abatali Bayudaaya ni bafodogola Hatonda.”

25 Ohuhomola olwʼohulaga oti oli muutu wa Hatonda, huba hwamahulu singa oŋamba amagambi gage, aye onagabbwaga soobaho njabulo nʼatali muhomole. 26 Singa Atali Muyudaaya gooheresa ebi magambi galoma, Hatonda saaja humuŋira hyʼAbayudaaya abahomola? 27 Atali Muyudaaya owooheresa ebi magambi galagira alihusalira ewe Omuyudaaya endiho omusango nʼoba nʼotagendera mu magambi wayire nga wahomola.

28 Omuutu saaba Muyudaaya endiho olwʼohwoheresa obulombolombo bwʼEhiyudaaya oba olwʼohuhomola. 29 Aye Omuyudaaya endiho njʼoyo ahola ebi Hatonda asiima era ohuhomola ohutuufu njʼohwebbwaga wacuusa omwoyo sosi ohuŋamba buŋambe amagambi agabaŋandiiha. Omuutu hyʼoyo wayire abaatu sibamusiima, aye Hatonda niye amusiima.