Ko te 'Uluaki 'Ipiseli 'a
Sioné
Ko te talateú
Ko te 'Uluaki 'Ipiseli 'a Sioné 'oku ua tono tafito'i kaveingá: (1) ke fakalotolahi'i te kakai ne'e fai ki ai te tohí ke ma'uli 'i te feohi mo te 'Atuá mo Tono 'Aló, ko Sīsū Kalaisi, pea (2) ke fakatokanga kiā nātou ke 'aua na'a notou tali te akonaki hala 'e maumau ai te notou feohi ko iá. Ko te akonaki hala ko 'ení ne'e tafito ia 'i te fakakaukau 'oku tupu te koví mei te fetu'utaki mo te matelié, pea takua ko Sīsū, 'ia te 'Alo 'o te 'Atuá, ne'e kailoa lava ke tangata mo'oni 'ia Ia. Ne'e taukave'i 'e te kau fai akonaki hala ko 'ení ko to'otó fakama'ulí ko toku vete ange ia mei te hoha'a ki taku nofo 'i te maama ko 'ení; pea notou toe akonaki 'o pehē, ko te fakama'ulí 'oku kailoa takua ha'aná fekau'aki mo te 'ulungāangá pe ko te 'ofa ki te kakai kehé.
Ne'e fakafepaki'i 'e Sione 'ia te akonaki ko 'ení 'aki tana pehē ko Sīsū Kalaisí ko te tangata mo'oni Ia, pea toe ina fakamamafa'i 'o pehē, ko nātou kotoa 'oku notou tui kiā Sīsū mo 'ofa ki te 'Atuá kua pau ke notou fe'ofa'aki foki.
Ko te kakano 'o te tohí
Ko te talateú (1:1-4)
Ko te maamá mo te fakapō'ulí (1:5—2:29)
Ko te fānau 'a te 'Atuá mo te fānau 'a te tēvoló (3:1-24)
Ko te mo'oní mo te halá (4:1-6)
Ko te fatongia ke fe'ofa'akí (4:7-21)
Ko te tui 'oku ikuná (5:1-21)
1
Ko te Folafola 'o te ma'ulí
1 'Oku motou fakahaa'i atu kiā kōtou 'ia te 'ū me'a ne'e 'i ai mei te kamata'angá, ko te 'ū me'a kua motou fanongoa, ko te 'ū me'a kua motou mamata ki ai 'aki te motou matá, ko te 'ū me'a ne'e motou siofia, pea fā ki ai 'e te motou nimá, 'o kau ki te Folafola 'o te ma'ulí.*1:1 Sione 1:1 2 (He ne'e fakae'a mo'oni 'ia te ma'ulí, pea kua motou mamata ki ai, pea 'oku motou fakamo'oni ki ai, pea 'oku motou fakahaa'i atu 'ia te ma'uli ta'engata ko iá, 'ā ē ne feangai mo te Tamaí, pea ne'e fakae'a kiā mātoú.)*1:2 Sione 1:14 3 'Io, ko te 'ū me'a kua motou mamata mo fanongo ki aí, 'oku motou fakahaa'i kiā kōtou foki, kote'uhí ke kotou ma'u 'e kōtou foki 'ia te feohi mo mātoú: pea ko te feohi foki 'a mātoú ko te feohi mo te Tamaí, pea mo Tono 'Alo ko Sīsū Kalaisí. 4 Pea 'oku motou tohi te 'ū me'a ko iá kote'uhí ke kakato te tou*1:4 te tou: 'oku pehē 'i tono 'ū hiki fualoa 'ihi, te kotou. fiafiá.
Ko te 'Atuá ko te maama
5 Ko 'eni ia 'ia te me'a ne'e motou fanongo meiā Ia, 'o tala kiā kōtoú, 'a 'eni: ko te 'Atuá ko te maama, pea 'oku kala he mama'i fakapō'uli 'i Tana 'Afió. 6 Kāpau 'oku tou pehē, 'oku tou feohi mo Ia, kae tou fou 'i te pō'ulí; tā 'oku tou lohi, pea 'oku kala tou fai ki te mo'oní. 7 Kae kāpau 'oku tou fou 'i te maamá, 'o hangē ko Tana 'afio 'e Ia 'i te maamá, pea tā 'oku tou feohi 'ia te taha mo te taha, pea ko te ta'ata'a 'o Sīsū ko Tono 'Aló 'oku Ina fakama'a 'ia tātou mei te angahala fuli pē.
8 Kāpau 'oku tou pehē 'oku kala he tou angahala, tā 'oku tou kākaa'i 'ia tātou, pea 'oku kala 'iā tātou 'ia te mo'oní. 9 Kāpau 'oku tou vete te tou 'ū angahalá, ko Tana anga fakamo'oni tala'ofá, mo Tana anga-faitotonú, 'oku nā kau ke fakamolemole te tou 'ū angahalá, pea ke Ina fakama'a 'ia tātou mei te faihala fuli pē. 10 Kāpau 'oku tou pehē kua kala tou fai angahala, tā 'oku tou pehē ko te lohi Tana 'Afió, pea 'oku kala 'iā tātou Tana Folafolá.