Ko te 'Uluaki 'Ipiseli 'a
Pitá
Ko te talateú
Ko te 'Uluaki 'Ipiseli 'a Pitá ne'e fai ki te kau Kalisitiane 'oku ui ko te “kakai fili” 'a te 'Atuá 'a ia kua notou mavetevete 'i te fakatokelau 'o 'Ēsia Minú. Ko te tafito'i kaveinga 'o te tohí ko tono fakalotolahi'i 'o te kakai ne'e fai ki ai te tohí, 'a ia kua notou fehangahangai mo te fakatanga mo te mamahi kote'uhí ko te notou tuí. Ne'e fai 'eni 'e Pita 'aki tana fakamanatu ki te kakai ko iá 'ia te ongoongolelei 'o Sīsū Kalaisí, 'a ia 'oku lava ke notou fakatu'amalie ki Tana pekiá mo Tana toetu'ú, pea mo Tana toe hā'ele maí. 'Oku totonu ke notou tali fiamālie ai mo kātakina te notou 'ū mamahí, 'a ia ko te sivi'anga ia 'o te notou tuí pē 'oku mo'oni pe kailoa, pea 'e fakapale'i 'ia nātou “'i te fakahā mai 'o Sīsū Kalaisí” (1:7).
Ne'e toe kouna'i 'e Pita 'ia te kakai ne'e fai ki ai tana tohí ke notou ma'uli 'aki te fa'ahinga ma'uli 'oku hoa mo te kakai kua notou 'o Kalaisí
Ko te kakano 'o te tohí
Ko te talateú (1:1-2)
Ko te fakamanatu 'o te fakama'uli 'a te 'Atuá (1:3-12)
Ko te kouna ki te ma'uli mā'oni'oni (1:13—2:10)
Ko te 'ū fatongia 'o te Kalisitiané 'i te 'aho 'o te mamahi (2:11—4:19)
Ko te anga-fakatōkilalo mo te fai fatongia te Kalisitiané (5:1-11)
Ko te tātukú (5:12-14)
1
Ko te fakafe'iloakí
1 Ko au Pita, ko he 'apōsetolo 'a Sīsū Kalaisi, ko taku tohi ki te kakai fili 'a ia 'oku notou nofo mavetevete 'i Ponitō, Kalētia, Kapatōsia, 'Ēsia, mo Pitinia, 2 kua fili 'o fakatatau ki te fu'aki 'afio'i 'e te 'Atua ko te Tamaí, 'i te kotou fakatāpui 'e te Laumālié ke iku ki te talangafua, mo te luluku 'aki te ta'ata'a 'o Sīsū Kalaisí.
'Ofa ke fakalahi kiā kōtou 'ia te kelesí mo te fiamālié.
Ko he 'amanaki 'oku ma'ulí
3 Fakafeta'i ki te 'Atuá ko te Tamai 'a te tou 'Aliki ko Sīsū Kalaisí; 'a ia, 'i te lahi 'o Tana meesí, ne Ina fakatupu fo'ou 'ia tātou ke ma'u he 'amanaki 'oku ma'ulí, ko te me'a 'i te toetu'u 'ia Sīsū mei te pekiá; 4 'io, ke tou ma'u he tofi'a 'oku ta'e'auha mo ta'emele mo ta'emae, 'a ia kua tokonaki 'i hēvani mo'o kōtou; 5 'ia kōtou 'oku malu'i 'e te māfimafi 'o te 'Atuá ko te me'a 'i te tuí, ke lava'i te fakama'uli 'a ia kua 'osi sāuni ke fakae'a mai 'i te kuonga fakamulí.
6 Pea 'oku kotou fiafia lahi 'i ai, neongo te kotou fakamamahi fuanounou 'i te taimi nei, 'i te kotou ma'ua 'i te 'ahi'ahi lahi, 'o kāpau ne'e kala ala ta'ofi; 7 kote'uhiā ke hā 'oku mo'oni te kotou tuí, pea 'oku mahu'inga ange te kotou tuí 'i te koula 'a ia ko te me'a 'auha, neongo kua 'ahi'ahi'i ia 'aki te afi. Pea 'e kotou ma'u leva 'ia te fakamālō mo te lāngilangi'ina mo te faka'apa'apa'iná 'i te fakahā mai 'o Sīsū Kalaisí. 8 Neongo kua he'iki ai kotou mamata kiā Ia, kā 'oku kotou 'ofa ki ai; neongo 'oku kala kotou mamata kiā Ia 'i te taimi nei, kā 'oku kotou tui kiā Ia, pea 'oku kotou fiafia 'aki te fiafia 'oku kala malea'aki, pea 'oku fungani tono leleí, 9 'i te kotou ma'u te taumu'a 'o te kotou tuí, 'a ia ko te fakama'uli 'o te kotou laumālié.
10 Pea ko te fakama'uli ko 'ení ne'e 'eke lahi mo fakatotolo lahi ki ai 'e te kau palōfitá, 'ia nātou ne'e notou kikite ki te kelesi ne'e ta'ofi ma'a kōtoú; 11 'o notou fakatotolo'i atu, pe ko fea ia 'ia te kuonga, pea fefe'aki tono angá,*1:11 pe ko fea ia 'ia te kuonga, pea fefe'aki tono angá, ko ia pe pe ko ai te toko taha ko iá, pea 'e hoko mai 'āfea. 'a ia ne'e lau ki ai 'e te Laumālie 'o Kalaisi ne'e 'iā nātoú, 'i Tana sinaki fakahā te 'ū mamahi 'e ma'ua ai 'ia Kalaisí, mo te 'ū lāngilangi 'e hoko 'i aí. 12 Ne'e fakahā 'eni kiā nātou, takua ne'e kala ma'a nātou, kae ma'a kōtou te notou tokonaki 'ia te 'ū me'a ko iá 'a ia kua fakahā 'i onopooni kiā kōtoú, 'e nātou kua notou malanga 'aki atu 'ia te ongoongoleleí 'aki te Laumālie Mā'oni'oní 'a ia ne'e fekau'i ifo mei te langí. Pea 'oku holi 'ia te kau 'āngeló ke fakasio ifo ki te 'ū me'a nei.
Ko toto ui ke ma'uli mā'oni'oní
13 Ko ia, kotou 'ai te no'o 'o te kotou lotó, mo laka faka'ehi'ehi, pea mātu'aki 'amanaki lelei, ki te kelesi 'e 'aumai kiā kōtou 'i te fakahā mai 'o Sīsū Kalaisí. 14 Fai 'o ngali mo he fānau talangafua, ke 'aua 'e fakatatau 'ia kōtou ki te kotou 'ū holi 'i mu'á, 'o fai 'i te ta'e'ilo; 15 kae kotou anga ki te Toko Taha Mā'oni'oni ne'e ui 'ia kōtoú, 'o kotou hoko 'ia kōtou foki ko te mā'oni'oni 'i te kotou tō'onga kotoa pē; 16 kote'uhí kua tohi 'o pehē, “'E kotou mā'oni'oni, he 'Okou mā'oni'oni.”*1:16 Lev 11:44-45; 19:2
17 Pea kāpau ā 'oku kotou tautapa ki te Tamaí, 'a ia 'oku fakamaau ta'efilifilimānakó, kae fakatatau ki te ngāue 'a te tangata taki taha, pea kotou fai manahē pē te kotou fakafeangaí lolotonga te kotou 'āunofo nei; 18 ko te kotou 'ilo'i, ne'e kala fai 'aki te 'ū me'a 'auha, he siliva pē he koula, te kotou huhu'i mei te anga-ta'e'aonga ne tukufakaholo mai mei te kotou mātu'á; 19 ka ne'e fai 'aki he ta'ata'a ma'onga'onga 'o Kalaisi, 'o hangē he lami ta'emele mo ta'e'ila. 20 Ne'e fu'aki fili Ia 'e te 'Atuá 'i te he'iki ai tanupou 'ia māmaní, ka ne'e fakae'a pē 'i te faka'osi 'o ono'ahó kote'uhí ko kōtou. 21 Fou 'iā Iá 'oku kotou tui pīkitai ki te 'Atuá, 'a ia ne'e fokotu'u 'Ona mei te pekiá, mo 'avange kiā Ia ke lāngilangi'ina, kote'uhí ke 'i te 'Atuá te kotou tuí mo te 'amanaki leleí.
22 Ko 'eni kua kotou fakama'a te kotou laumālié 'i te fai talangafua ki te mo'oní ke lava te fe'ofa'aki fakalotu 'oku ta'elohi, ko ia ke kotou tōtōivi 'i te kotou fe'ofa'akí, 'o fai mei te lotó.†1:22 lotó: 'oku pehē 'i tono 'ū hiki fualoa 'ihi, loto ma'a. 23 He kua fakatupu fo'ou 'ia kōtou, kae kailoa 'aki te tenga 'auha, kae 'aki te tenga ta'e'auha, 'o fou 'i te Folafola 'a te 'Atuá 'a ia 'oku ma'uli mo tolongá. 24 Kote'uhiā
“'Oku hangē ko te mahukú 'ia te kakano kotoa pē,
pea ko tono nāunau kotoa pē 'oku hangē ko te fisi'i mahukú.
Kua mae te mahukú,
pea ngangana tono fisí;
25 kā ko te Folafola 'a te 'Alikí 'oku tolonga 'o ta'engata.”*1:24-25 'Ais 40:6-8
Pea ko te Folafolá 'eni 'a ia ko te ongoongolelei ne'e malanga 'aki kiā kōtoú.