Ko te 'Uluaki 'Ipiseli 'a Paula ki te Kakai
Tesalonaiká
Ko te talateú
Ko Tesalonaiká ko te kolomu'a ia 'o te vahefanua Loma ko Masitōnia. Ne'e fokotu'u ai 'e Paula he siasi 'i te hili tana mavahe mei Filipaí. Kā neongo iá, ne matavave pē 'ia te kamata te fakafepaki mei te kakai Siu 'a ia ne'e loto meheka 'i tono malanga'i 'e Paula 'ia te mo'oni faka-Kalisitiané ki te kakai Senitaile, 'a ē kua notou kamata mahu'inga'ina foki 'i te lotu faka-Siú. Ne'e iku ai ke mavahe 'ia Paula mei Tesalonaika ki Pēlea. Pea faifaí pea a'u mai ia ki Kolinitō, pea fakahaa'i mai ai kiā ia 'e tono kaume'a ko Tīmoté 'o fekau'aki mo te 'ū me'a kua hoko 'i te siasi 'i Tesalonaiká.
Ne'e fai leva 'e Paula tana 'Uluaki 'Ipiseli ki te Kakai Tesalonaiká ke fakalotolahi'i mo fakatu'uma'u 'ia te kau Kalisitiane 'i aí. Ne'e fai tana fakamālō 'i te 'ipiseli nei kote'uhí ko te 'ū ongoongo lelei kua fai 'o kau ki te notou tuí mo te notou 'ofá. Pea ne ina fakamanatu foki kiā nātou 'ia te anga 'o tana ma'ulí 'i tana kei nofo mo nātoú. Pea ne ina tali foki te notou 'ū fehu'i felāve'i mo te toe hā'ele mai 'ia Sīsū Kalaisí: 'e toe 'inasi nai he Kalisitiane ne'e mate ki mu'a 'i te toe hā'ele mai 'ia Kalaisí 'i te ma'uli ta'engata 'e foaki 'i Tana toe hā'ele maí? 'E foki mai 'āfea 'ia Kalaisí? Ne iange leva 'e Paula kiā nātou ke fai atu pē te notou 'amanaki ki Tana toe hā'ele maí mo hokohoko atu ta'e toe ue'ina te notou ngāué.
Ko te kakano 'o te tohí
Ko te talateú (1:1)
Ko te hounga mo te fakamāloó (1:2—3:13)
Ko te langa'i ake te tō'onga ma'uli faka-Kalisitiané (4:1-12)
Ko te toe hā'ele mai 'ia Kalaisí (4:13—5:11)
Ko te 'ū akonaki faka'osí (5:12-22)
Ko te tātukú (5:23-28)
1
Ko te fakafe'iloakí
1 Ko au Paula, mo Silivenusi mo Tīmote, ko te motou tohi ki te siasi 'o te kakai Tesalonaiká, 'a ia 'oku 'i te 'Atuá ko te Tamai, pea mo te 'Aliki ko Sīsū Kalaisí.
'Ofa ke kotou ma'u kelesi mo te fiamālie.*1:1 Ngā 17:1
Ko te ma'uli mo te tui 'i te siasi 'o Tesalonaiká
2 'Oku motou fakafeta'i ma'u ai pē ki te 'Atuá kote'uhí ko kōtou kotoa pē, 'o motou takua 'ia kōtou 'i te motou 'ū lotú; 3 'o manatu ma'u ai pē ki te kotou ngāue 'i te tuí, mo te kotou fai mālohi 'i te 'ofá, mo te kātaki 'i te 'amanaki lelei 'i te tou 'Aliki ko Sīsū Kalaisí, 'i te 'ao 'o te 'Atua ko te tou Tamaí.
4 He 'oku motou 'ilo'i, si'i kāinga 'ofaina, te kotou fili 'e te 'Atuá. 5 He ne'e kailoa hoko atu te motou ongoongoleleí kiā kōtou 'i te lea pē, kā 'i te mālohi foki, pea 'i te Laumālie Mā'oni'oní pea mo te fakamo'oni lahi. Seuke, 'oku kotou 'ilo'i 'ia te anga ne'e motou anga'aki 'i te kotou lotolotongá, kote'uhiā ko kōtou. 6 Kae'uma'ā foki, ne'e kotou hoko ko te kau fa'ifa'itaki kiā mātou mo te 'Alikí; he neongo ne'e kotou mamahi lahi, ka ne'e kotou tali lelei te Folafolá mo te fiafia 'i te Laumālie Mā'oni'oní.*1:6 Ngā 17:5-9 7 Ko ia kua kotou hoko ai ko te fa'ifa'itaki'anga ki te kakai tui kotoa pē 'i Masitōnia mo 'Ākeia. 8 'Io, ko kōtoú kua ongo mei ai 'ia te Folafola 'a te 'Alikí ki Masitōnia mo 'Ākeia, 'o kailoa ngata 'i ai, kā kua mafola te kotou tui ki te 'Atuá ki te feitu'u kotoa pē; ko ia 'oku kala 'aonga ke motou tē lea ki ai, 9 he 'oku fai 'e te kakaí te ongoongoa 'o mātoú ki te anga te motou hoko atu kiā kōtoú, mo te kotou tafoki ki te 'Atuá; 'o fulitu'a ki te 'ū 'aitolí, kā ke tauhi ki te 'Atuá 'a ia 'oku ma'uli mo mo'oní, 10 pea ke nofo'aki tali ki te ha'u mei hēvani 'ia Sīsū ko Tono 'Aló, 'a ia ne'e fokotu'u mei te kau pekiá, 'a ia 'oku Ina fakahaofi 'ia tātou mei te houhau 'oku tu'unuku maí.