3
Ko te kau faifekau pulé
1 'Oku mo'oni 'ia te leá: kā feinga he taha ke ma'u 'ia te lakanga 'o te faifekau pulé, ko tana holi ia ki te ngāue lelei. 2 Ko ia, 'oku totonu ki te faifekau pulé ke ta'emele, ko te 'unoho 'o he fafine pē taha,*3:2 ko te 'unoho 'o he fafine pē taha, ko ia pe ke mali tu'a taha pē. ko te toko taha 'oku kala konā, 'oku anga-fakama'uma'u, 'oku maau tana tō'ongá, 'oku fa'a fakaafe 'āunofo, 'oku poto 'i te faiakó.*3:2-7 Tait 1:6-9 3 Ko te toko taha 'oku kala fa'a inu uaine; 'oku kala fa'a tā, kā 'oku anga-lelei; 'oku kala fia fakakikihi, 'oku kala mānumanu; 4 ko te toko taha 'oku pule lelei ki tono fale 'o'oná, 'oku mapule'i tana fānaú ke ma'uli talangafua mo anga-faka'apa'apa ma'u pē; 5 (kae kāpau 'oku kailoa lava he tangata 'o mapule'i tono fale 'o'oná, pea fefe'aki ai ha'aná tauhi 'ia te siasi 'o te 'Atuá?) 6 ko te toko taha 'oku kala ko te toki liliu, na'a 'ao'aofia tono lotó 'i te 'afungí, 'o tō ai ia ki te tautea 'o te tēvoló. 7 Kae'uma'ā ko tono totonú ke ongoongolelei 'ia ia mei te kakai 'o tua'aá, na'a tō ia ki te manukí, pea mo te tauhele 'a te tēvoló.
Ko te kau tokoní
8 Pehē foki ko tono tonu 'o te kau tokoní ke notou fakamātoato, 'o 'aua 'e ngutungutuua, 'aua 'e fa'a inu uaine, 'aua 'e havala ki te pa'anga 'uli; 9 ko te kakai 'oku notou tauhi 'ia te misiteli 'o te tuí 'aki he konisēnisi ma'a. 10 Pea 'aua leva ke sivi'i foki 'ia nātou; pea kāpau 'oku notou ta'emele, pea notou toki fai te ngāue 'o te kau tokoní. 11 Pehē foki ko te notou 'unohó†3:11 te notou 'unohó, ko ia pe te kau (tokoni) fafiné. ke notou fai fakamātoato, 'o 'aua ko te kau fakakovi; pea faka'ehi'ehi mei te konaá, pea falala'anga 'i te me'a kotoa pē. 12 Ke ma'u 'e te kau tokoní he 'unoho pē taha,‡3:12 Ke ma'u … taha, ko ia pe Ke mali tu'a taha pē. 'o notou pule'i lelei te notou fānaú, mo te notou fale 'o nātoú. 13 Hē ko nātou ne'e notou lava'i lelei 'ia te ngāue 'o te tokoní, 'oku notou ma'u ai ma'a nātou he tu'unga lelei, mo te fu'u loto mālohi 'i te notou tui kiā Kalaisi Sīsuú.
Ko te misiteli 'o te tou lotú
14 'Okou tohi atu 'ia te 'ū me'a nei, neongo taku 'amanaki 'e vave taku 'alu atú, 15 kote'uhí, kāpau 'e au tuai atu, ke ke 'ilo'i te anga 'oku totonú ke fai 'aki 'i te Fale 'o te 'Atuá, 'a ia ko te siasi 'o te 'Atua ma'ulí, ko te pou mo te tu'unga 'o te mo'oní. 16 'Io, ko te mo'oni 'aupito, ko te me'a lahi 'ia te misiteli 'o te lotú:
Ko te Toko Taha§3:16 Ko te Toko Taha: 'oku pehē 'i tono 'ū hiki fualoa 'ihi, ko te 'Atuá. ne'e fakahā 'i te kakanó,
ne'e fakahaa'i 'e te Laumālié,*3:16 ne'e fakahaa'i 'e te Laumālié, ko ia pe ne'e fakatonuhia 'e te Laumālié.
ne'e mātā 'e te kau 'āngelo,
ne'e malanga 'aki ki te Senitailé,
ne'e tui ki Ai 'i māmani,
ne'e 'avake 'o 'afio 'i te lāngilangi.
*3:2 3:2 ko te 'unoho 'o he fafine pē taha, ko ia pe ke mali tu'a taha pē.
*3:2 3:2-7 Tait 1:6-9
†3:11 3:11 te notou 'unohó, ko ia pe te kau (tokoni) fafiné.
‡3:12 3:12 Ke ma'u … taha, ko ia pe Ke mali tu'a taha pē.
§3:16 3:16 Ko te Toko Taha: 'oku pehē 'i tono 'ū hiki fualoa 'ihi, ko te 'Atuá.
*3:16 3:16 ne'e fakahaa'i 'e te Laumālié, ko ia pe ne'e fakatonuhia 'e te Laumālié.