Ko tono Ua 'o te 'Ipiseli 'a Paula ki te Kakai
Tesalonaiká
Ko te talateú
Hili ange tana fu'aki 'ipiselí, ne hoko atu 'ia te puputu'u mo te uesia 'ia te siasi 'i Tesalonaiká kote'uhí ko te 'amanaki 'e toe hā'ele mai 'ia Kalaisí. Ko te taumu'a 'o Tono Ua 'o te 'Ipiseli 'a Paula ki te Kakai Tesalonaiká ke fakatonutonu 'ia te fakakaukau hala 'oku pehē, ko te 'aho 'o te toe hā'ele mai 'a te 'Alikí kua 'osi hoko ia. Ne'e fakamahino'i 'e Paula 'e kei tuai 'ia te toe hā'ele mai 'a Kalaisí, kua a'ua'u 'ia te koví mo te fakalialiá 'i tono tataki 'e te toko taha 'oku ui ko te “tangata 'o te angahalá”, 'a ia ko te toko taha 'oku kailoa 'ilo'i pau pē ko ai 'ia ia, kā 'e fakafili ia kiā Kalaisi.
'Oku fakamamafa'i 'e te 'apōsetoló ke tu'u ma'u 'ia te siasí 'i te notou tuí, neongo te faingata'á mo te mamahí, ke notou taki taha feinga'i tono tauhi pē 'o'oná, hangē ko Paula mo tono kaungā ngāué, mo vivili atu 'i te faileleí.
Ko te kakano 'o te tohí
Ko te talateú (1:1-2)
Ko te fakamālō mo te fakaongoongolelei (1:3-12)
Ko te 'ū fakahinohino fekau'aki mo te tē hā'ele mai 'a Kalaisí (2:1-17)
Ko te langa'i ake 'o te tō'onga ma'uli faka-Kalisitiané (3:1-15)
Ko te tātukú (3:16-18)
1
Ko te fakafe'iloakí
1 Ko au Paula mo Silivenusi mo Tīmote, ko te motou tohi ki te siasi 'o te kakai Tesalonaiká, 'a ia 'oku 'i te 'Atuá ko te tou Tamai pea mo te 'Alikí ko Sīsū Kalaisi.*1:1 Ngā 17:1
2 'Ofa ke kotou ma'u kelesi mo te fiamālie mei te 'Atuá ko te tou Tamai, mo te 'Alikí ko Sīsū Kalaisi.
Ko te fakamaau 'e fai 'e Kalaisí 'o kā liuaki mai
3 'Oku taau ke motou fakafeta'i ma'u pē ki te 'Atuá kote'uhí ko kōtou, 'e kāinga, he ko tono taaú ia, kote'uhí ko te fu'u tupulakina te kotou tuí, pea mo te fakalahi te kotou 'ofá, ko te 'ofa 'a te taha ki te taha. 4 Ko ia, na'a mo mātou 'oku motou pōlepole 'iā kōtou 'i te 'ū siasi 'o te 'Atuá, kote'uhí ko te kotou kātakí mo te kotou tuí; neongo te 'ū fu'u fakatanga 'o kōtoú, mo te 'ū mamahi 'oku kotou fa'a kātaki'í.
5 Ko te 'ū fakamo'oni 'eni 'o te fakamaau totonu 'a te 'Atuá, ke faifaí pea fakahaa'i ai te kotou taau mo te Pule'anga 'o te 'Atuá, 'a ia 'oku kotou mamahi aí foki. 6 He ko te me'a totonu pē ia ki te 'Atuá ke totongi 'aki te mamahí kiā nātou 'oku fakamamahi'i 'ia kōtoú; 7 kae kiā kōtou kua fakamamahi'í, 'aki he mālōlō, 'a ia 'e kotou ma'u fakataha mo mātou, 'o kā fakahā mai 'ia te 'Aliki ko Sīsuú mei te langí mo Tana kau 'āngelo mālohi, 8 'i te ulo'i afi mo Tana fai sāuni ki te kau ta'e'ilo 'Atuá, pea 'oku kailoa talangafua ki te ongoongolelei 'o te tou 'Aliki ko Sīsuú. 9 'E tautea 'ia nātou 'aki 'ia te faka'auha ta'engata mei te 'ao 'o te 'Alikí, pea mei te lāngilangi 'o Tana māfimafí,*1:9 'Ais 2:10 10 'o kā hoko mai Ia ke hā Tono lāngilangí 'i Tono kau mā'oni'oní, pea mo fakatumutumu ai, 'i te 'aho ko iá, 'iā nātou fuli pē 'oku tuí; he ne'e kotou tui ki te motou fakamo'oni ne fai kiā kōtoú.
11 Pea kote'uhí ke lava 'ia te me'a ko iá, ko ia 'oku motou hūfia 'ia kōtou ma'u ai pē, kote'uhí ke finangalo lelei 'e te tou 'Atuá 'oku kotou taau mo te lakanga ne'e ui kōtou ki aí; ke fakakakato 'e Ia te finangalo lelei kotoa pē 'o Tana anga-leleí, mo te ngāue 'a te tuí 'aki te mālohi; 12 kae faifaí pea lāngilangi'ina te huafa 'o te tou 'Aliki ko Sīsuú 'iā kōtou, pea ke hā te kotou lāngilangí 'iā Ia, 'o fakatatau ki te kelesi 'a te tou 'Atuá, mo te 'Aliki*1:12 te tou 'Atuá, mo te 'Aliki, ko ia pe te tou 'Atua mo 'Aliki. ko Sīsū Kalaisí.