Ko tono Ua 'o te 'Ipiseli 'a Paula kiā
Tīmoté
Ko te talateú
Ko te konga lahi 'o Tono Ua 'o te 'Ipiseli 'a Paula Kiā Tīmoté ko tana 'ū akonaki fakahangatonu kiā Tīmote, ko te kaungā ngāue kei si'i ange 'iā Paula pea ko tono tokoni. Ko te tafito'i kaveingá ko te fa'a kātaki. Ne'e fale'i mo fakalotolahi'i 'e Paula 'ia Tīmote ke tu'u ma'u ai pē ia 'i tana malanga'i 'o Sīsū Kalaisí, ke pipiki ai pē 'ia ia ki te akonaki mo'oni 'o te Folafola 'a te 'Atuá, mo fai tono fatongia fakafaiakó mo faka'evangelioó, neongo te 'ū faingata'á mo te 'ū fakafepakí.
Ne'e fakatokanga makehe 'e Paula kiā Tīmote 'i te fakatu'utāmaki kiā ia ha'aná 'efihia 'i te “fehu'i vale mo launoa” (2:23), 'a ia 'oku kailoa 'i ai he lelei, kā 'oku holoki ifo ai 'ia te ma'uli 'o te kakai 'oku fanongo ki aí.
Ne'e fakamanatu ange ai pē 'e Paula kiā Tīmote 'ia te ma'uli mo te taumu'a 'a Paulá: ko tana tuí, mo tana 'ofá, mo tana fakama'uma'ú, mo tana fa'a kātaki 'i te fakatangá.
Ko te kakano 'o te tohí
Ko te talateú (1:1-2)
Ko te fakamālō mo te enginakí (1:3—2:13)
Ko te fale'i mo te fakatokangá (2:14—4:5)
Ko te anga 'o te ma'uli 'a Paulá (4:6-18)
Ko te tātukú (4:19-22)
1
Ko te fakafe'iloakí
1 Ko au 'eni Paula, ko he 'apōsetolo 'a Kalaisi Sīsū 'i te finangalo 'o te 'Atuá, kote'uhiā ko te palōmesi 'o te ma'ulí 'oku 'iā Kalaisi Sīsuú.
2 Ko taku tohi kiā Tīmote, ko toku foha 'ofa'anga.*1:2, 5 Ngā 16:1
'Ofa ke ke ma'u kelesi mo te meesi mo te fiamālie, mei te 'Atua ko te Tamaí, mo Kalaisi Sīsū ko te tou 'Alikí.
Ko te fakamālō mo te na'ina'i
3 'Okou fakafeta'i ki te 'Atuá, 'a ia 'okou tauhi ki Ai, 'o hangē ko te tou kau mātu'á 'i mu'a, 'i te fai 'aki te konisēnisi 'ata'atā — ki te ta'emotu taku manatu'i 'ou 'i taku 'ū huú 'i te pō mo te 'aho, 4 mo taku holi ke tā fe'iloaki, ko taku manatu ki tou lo'imatá, kae au fonu 'i te fiafia. 5 'Io, 'okou fakafeta'i 'i taku manatu ki te tui ta'elohi 'oku 'iā koé; 'ia te tui ne'e fua nofo 'i tau kuí ko Loisi, pea mo tau fa'eé ko 'Iunisi; pea 'okou falala 'oku 'iā koe foki. 6 Ko ia, 'okou fakamanatu ai kiā koe, ke ke ngāue 'aonga 'aki tou mafai mei te 'Atuá, 'a ia 'oku 'iā koe 'i te hilifaki toku nimá. 7 He ko te Laumālie ne'e foaki 'e te 'Atuá kiā tāuá, ne'e kala ko te Laumālie anga fo'i, kā ko te anga-mālohi mo te 'ofa, mo te loto fakama'uma'u.
8 Ko ia, 'aua 'e ke mā 'i te fakamo'oni ma'a te tou 'Alikí, pē ke maa'i 'oku ko Tana pōpula; kaikehe, ke ke kau mo au 'i te kai mamahi kote'uhí ko te ongoongoleleí 'i te funga 'o te māfimafi 'o te 'Atuá, 9 'a ia ne Ina fakama'uli 'ia tātou, mo Ina ui tātou ki te lakanga tapú; 'o kailoa kote'uhí ko he ngāue 'a tātou, kā ke fakatatau ki Tana taumu'a 'A'aná, pea kote'uhí ko te kelesi ne'e foaki mai 'iā Kalaisi Sīsū mei te 'ū kuonga 'o 'ītānití, 10 kā kua fakae'a 'eni 'i te fakahā mai 'o te tou fakama'ulí ko Sīsū Kalaisi; 'a ia ne Ina fakaka'anga 'ia te maté, kā ne Ina fakahā 'ia te ma'ulí mo te ta'e'auhá 'aki te ongoongoleleí. 11 Pea ko te me'a ne'e fokotu'u 'oku ki aí, ko te malanga mo te 'apōsetolo mo te faiako.*1:11 'Oku tānaki mai 'i te 'ū hiki fualoa 'ihi 'ia te pehē: 'o te kakai Senitailé.*1:11 1 Tīm 2:7 12 Ko tono 'uhinga foki ia 'okou ma'ua ai 'i te 'ū mamahi nei; kā 'oku kailoa ke au mā ai, he 'okou 'ilo'i pē 'ia Ia kua u tui ki aí, pea 'okou 'ilo'i pau 'oku Ina mafai ke tauhi taku me'a kua u tuku kiā Iá,†1:12 taku me'a kua u tuku kiā Iá, ko ia pe 'ia te me'a kua Ne tuku kiā aú. 'o a'u ki te 'aho ko iá.
13 Ko te anga ē 'o te 'ū lea ma'uli ne ke fanongo ai meiā aú, 'ia te tui mo te 'ofa 'oku 'iā Kalaisi Sīsuú. 14 Ko te me'a lelei ko iá kua tuku kiā koe, 'ē, ke ke tauhi 'i te Laumālie Mā'oni'oní, 'a ia 'oku nofo'i 'ia tātoú.
15 Kua ke 'osi 'ilo'i foki ne'e si'aki 'oku 'e nātou kotoa pē 'i 'Ēsiá; 'a ia 'oku kau ai 'ia Faikelo mo Heamokena. 16 'Ofa ke meesi ange 'e te 'Alikí ki te fāmili 'o 'Onesifoló, he ne'e tu'a lahi tana tokoni'i 'okú, pea ne'e kala maa'i 'e ia toku kii'í. 17 Kā 'i tana 'i Lomá, ne'e fai mālohi ia 'i toku kumí 'o ma'u 'e ia 'oku. 18 'Ofa ange te 'Alikí ke ma'u meesi 'e ia mei Tana 'Afió 'i te 'aho ko 'ē, pea ko tana 'ū fu'u tokoni ne'e fai 'i 'Efesoó 'oku 'ilo'i lelei ki ai 'e koe.