Ko te 'Ipiseli 'a Paula ki te Kakai
Kolosé
Ko te talateú
Ko te 'Ipiseli 'a Paula ki te Kakai Kolosé ne'e fai ia ki te siasi 'i Kolose, ko te kolo 'i 'Ēsia Minu 'i te fakahahake 'o 'Efesoó. Ne'e kailoa fokotu'u te siasi ko 'ení 'e Paula, ka ne'e tu'u 'i te feitu'u ne'e ongo'i ai 'e Paula ko tono fatongia ke tokanga'i, hē ne ina fekau atu te kau ngāue mei 'Efesō, 'ia te kolomu'a 'o te vahefanua Loma ko 'Ēsiá. Ne 'ilo'i 'e Paula 'oku 'i ai 'i te siasi 'i Kolosé he kau fai akonaki hala, 'a ia ne'e notou taukave'i takua ke lotu 'ia te kakaí ki te “kau pule mo te kau ma'u tu'unga fakalaumālié” ke notou 'ilo'i lelei ai 'ia te 'Atuá mo ma'u ai te notou fakama'uli kakató. Pea kailoa ngata ai, kae toe taukave'i 'e te kau faiako ko 'ení, kua pau ke kita tali ke fai he 'ū ouau makehe, 'o hangē ko te kamú, mo tauhi te 'ū tapu 'i te me'akaí mo te 'ū me'a kehe.
Ko te taumu'a 'o te tohi 'a Paulá ke fakafepaki'i 'ia te 'ū akonaki hala ko 'ení 'aki te 'ū akonaki faka-Kalisitiane totonú. Ko te 'elito 'o tana talí ko te pehē 'oku meiā Sīsū Kalaisi 'ia te fakama'uli kakató, pea ko te 'ū tui kehé mo te 'ū ouau kehé ko te notou takihee'i meiā Ia. Ne'e tafito 'iā Kalaisi tono fakatupu 'e te 'Atuá 'ia māmaní pea 'oku Ina fakafoki ai pē 'ia māmani kiā Ia 'iā Kalaisi. Ko te 'amanaki'anga pē taha ki tono fakama'uli 'o māmaní, ko te taha 'ia māmani mo Kalaisi. Ne'e toki fakaikiiki mai leva 'e Paula 'i tana 'ipiseli ko 'ení 'ia te anga 'o te felāve'i 'ia te taha'i mo'oni ko iá mo te ma'uli 'a te kakai 'oku tuí.
'Oku tou fakatokanga'i te me'a lelei 'i te tohi nei: ko tono 'ave 'ona ki Kolose 'e Tikiko, fakataha mo 'Onesema, ko te tama pōpula ne'e fai tohi ai 'ia Paula kiā Filimoné.
Ko te kakano 'o te tohí
Ko te talateú (1:1-8)
Ko te anga 'o Kalaisí mo Tana ngāué (1:9—2:19)
Ko te ma'uli fo'ou 'iā Kalaisí (2:20—4:6)
Ko te tātukú (4:7-18)
1
Ko te fakafe'iloakí
1 Ko au Paula, ko te 'apōsetolo 'a Kalaisi Sīsū 'i te finangalo 'o te 'Atuá, mo toku kāinga ko Tīmoté, 2 ko te mā tohi ki te kakai lotu 'i Kolosé, ko te kau tui 'oku kāinga 'iā Kalaisi.
'Ofa ke kotou ma'u kelesi mo te fiamālie mei te 'Atuá ko te tou Tamai.
Ko te lotu fakafeta'i
3 'Oku mā fakafeta'i ki te 'Atuá, ko te Tamai 'a te tou 'Alikí ko Sīsū Kalaisi, mo te hūfia ma'u pē 'ia kōtou, 4 talu te mā fanongo ki te kotou tui kiā Kalaisi Sīsuú, mo te kotou 'ofa ki te kāinga lotu kotoa pē; 5 'a ia 'oku tupu mei te kotou 'amanaki ki te me'a kua tuku tauhi ma'a kōtou 'i hēvani, 'a ia ne kotou fanongo ki ai 'i mu'a 'i te lea 'o te mo'oni 'o te ongoongoleleí, 6 'a ia ne'e a'u atu kiā kōtou, pea pehē foki ki māmani fuli pē; pea 'oku fakatupu fua, 'o hangē ko tana fai 'iā kōtoú, talu te 'aho ne kotou fanongo ai 'o 'ilo'i mo'oni te kelesi 'a te 'Atuá. 7 Ne'e kotou ako 'iā 'Epafasi ko te mā kaungā tamaio'aliki 'ofaina, 'a ia ko te faifekau anga-tonu 'a Kalaisi kiā kōtou;*1:7 Kol 4:12; Filim 1:23 8 pea ko ia foki ne ina fakahā mai te kotou 'ofá 'i te Laumālié.
9 Ko ia, ko māua foki, talu te 'aho ne'e mā fanongo ki aí, 'oku kailoa tuku te mā hūfia 'ia kōtoú, mo te mā kole ke kotou potopōto'i 'i te 'ilo ki Tono finangaló 'aki te poto kehekehe 'oku mei te Laumālié; 10 kote'uhí ke taau te kotou laká pea mo te 'Alikí 'o fakafiamālie 'i te me'a kotoa pē, ke kotou fua lahi 'i te ngāue lelei kotoa pē, mo tupulakina 'i te 'ilo ki te 'Atuá. 11 'Ofa ke fakamālohi'i 'ia kōtou 'aki te mafai kotoa pē, 'o fakatatau mo Tono mālohi lahi 'aupitó, ke kotou lava ai ke kotou fa'a kātaki mo loto fiafia 'i te me'a kotoa pē, 12 mo fakafeta'i ki te Tamaí, 'a ia kua Ina ngaahi 'ia kōtou ke kotou taau ke 'inasi 'i te tofi'a 'o te kau mā'oni'oni 'a ia 'oku 'i te maamá. 13 He kua Ina hamusi 'ia tātou mei te pule 'a te pō'ulí, pea kua Ina hiki 'ia tātou ki te pule'anga 'o tono 'Alo 'Ofa'angá; 14 pea 'i te tou tu'u 'iā Iá kua tou ma'u te huhu'í 'i Tono ta'ata'á, ko te fakamolemole 'o te tou 'ū angahalá.*1:14 'Efe 1:7
Ko Kalaisi mo Tana ngāué
15 Ko Kalaisí ko te 'ata totonu Ia 'o te 'Atua ko te Ta'ehāmaí, ko te 'uluaki Ia ne'e fakatupú, ko te 'Uluaki 'i te me'a kotoa pē kua ngaahí, 16 kote'uhí ne'e tafito kiā Ia tono ngaahi 'o te me'a kotoa pē, 'ia te me'a 'i hēvaní mo te me'a 'i māmaní, 'ia te me'a hā maí mo te me'a ta'e hā maí, pe ko he fa'ahinga ma'u taloni, pe ko te fa'ahinga hau'aliki, pe ko he fa'ahinga pule, pe ko he fa'ahinga ma'u tu'unga; 'io, kua ngaahi 'ia te me'a kotoa pē 'iā Ia pea Ma'ana, 17 pea ko te ki mu'a Tana 'Afió kae ki muli 'ia te me'a kotoa pē, pea 'oku fema'uma'utaki 'iā Ia 'ia te me'a kotoa pē. 18 Pea ko Tana 'Afió ko te 'Ulu 'o te sinó 'a ia ko te siasí; he ko te kamatá Ia, ko te 'Uluaki ne'e fakatupu mei te kau pekiá, kote'uhí ke mā'olunga taha pē Ia 'i te me'a kotoa pē.*1:18 'Efe 1:22-23 19 He ne'e finangalo lelei 'e te 'Atuá ke nofo'ina 'e Tono fonu kotoa pē 'i te 'Aló, 20 pea 'iā Kalaisí ne finangalo 'e te 'Atuá ke fakalelei 'ia te me'a fuli pē ki Tana 'Afió, pe ko te me'a 'i hēvani pē 'i māmani, pea ne'e fai te fakamelinó 'aki te ta'ata'á*1:20 ta'ata'á, ko ia pe pekia fakafeilaulaú. 'i te kolosi 'O'oná.*1:20 'Efe 2:16
21 Pea ko kōtoú foki ne'e fakahee'i 'i mu'a, pea kotou nofo ko te 'ū fili 'i loto, 'o hā 'i te kotou 'ū ngāue koví; 22 kā 'i te taimi nei kua Ina fakalelei'i 'ia kōtou 'aki te pekia 'o Tono sino kakanó, kote'uhí ke 'avatu 'ia kōtou 'oku mā'oni'oni mo ta'emele mo ta'elau'i 'i Tono 'aó; 23 kāpau 'e kotou nofo ma'u 'i te tuí, kua pulusi ki te tu'ungá, mo ma'uma'uluta, pea kala hiki mei te 'amanaki fakakōsipelí, 'a ia ne'e kotou fanongo ki aí, 'a ia ne'e malanga 'aki ki te me'a ma'uli kotoa pē 'i te lalo langí, 'a ia ne'e fakanofo 'ia au Paula ko tono faifekau.
Ko te fai fatongia 'a Paula ma'a te siasí
24 'Okou fiafia 'eni 'i taku 'ū mamahí kote'uhi ko kōtou, 'o fai 'i toku kakano nei te fakakakato 'o te 'ū mamahi 'a Kalaisi 'oku toe ke faí kote'uhí ko Tono sinó, ko te siasi. 25 Ne au hoko ko te faifekau ki ai, ke fai 'ia te lakanga ne'e tuku kiā au ma'a kōtoú, ke talaki kakato atu 'ia te Folafola 'a te 'Atuá — 26 'ia te misiteli 'a ia ne'e fufuu'i 'i te 'ū kuonga mo te 'ū to'utangata kua hilí, kā kua fakae'a 'eni ki Tono kakai tapú. 27 Ne'e finangalo 'e te 'Atuá ke faka'ilo kiā nātou tono lahi faufau 'o te lāngilangi'ina 'o te misiteli ko iá 'i te lotolotonga 'o te Senitailé; 'a ia ko 'eni: ko te 'iā kōtou 'ia Kalaisi, ko te faka'amanaki ki te lāngilangi'iná. 28 Pea 'oku motou ongoongoa Ia, 'i te motou valoki mo akonakina 'ia te tangata kotoa pē, 'aki te fa'ahinga poto fuli pē; kote'uhí ke motou 'avatu te tangata kotoa pē kua haohaoa 'iā Kalaisi Sīsū. 29 Pea 'okou fai ke ongosia foki 'ia kita, 'i te fefa'uhi ke lava 'ia te me'a ko iá, 'o fakatatau mo Tono iví, 'a ē 'oku fai mālohi 'aupito 'iā kita.