Ko te 'Ipiseli ki te Kakai
Hepeluú
Ko te talateú
Ko te 'Ipiseli ki te Kakai Hepeluú ne'e fai ki te kau Kalisitiane kua fakautuutu te fakafe'ātungia'i 'o nātoú, pea tu'u mole ai te notou tui faka-Kalisitiané. 'Oku kala 'ilo'i pe ko ai ne ina hiki 'ia te 'ipiseli ko 'ení. Ko te tafito'i me'a ne'e fakalotolahi'i 'aki 'ia nātou 'e te fa'u tohí, ko tana fakahaa'i ko Sīsū Kalaisi 'ia te fakahā'anga mo'oni mo aofangatuku 'o te 'Atuá. Ne ina fakamamafa'i ai 'ia te 'ū fe'i mo'oni 'e tolu:
1. Ko Sīsuú ko te 'Alo ta'engata Ia 'o te 'Atuá, 'a ia ne Ina ako'i 'ia te talangafua mo'oni ki te Tamaí 'i te 'ū mamahi ne Ina kātaki'í. Kote'uhí ko te 'Alo 'o te 'Atuá 'ia Sīsū, 'oku mā'olunga Ia 'i te kau palōfita kotoa pē 'o te Fuakava Matu'á, mo te kau 'āngeló, pea mo Mōsese foki.
2. Kua 'osi fakahaa'i 'e te 'Atuá ko Sīsuú ko te Taula'aliki Lahi Ia, 'o mā'olunga Ia 'i te kau taula'aliki kotoa pē 'o te Fuakava Matu'á.
3. Ko te taha kotoa pē 'oku tui kiā Sīsū 'oku fakama'uli 'iā Ia mei te angahalá, mo te 'ilifiá, pea mo te maté. Pea 'i te tu'unga Taula'aliki Lahi 'o Sīsuú 'oku ma'u ai 'ia te fakama'uli mo'oní, 'a ia ko tono fakakakato pē 'o te 'ū ouau mo te 'ū feilaulau 'o te lotu faka-Siú.
Ne toe fakalau 'e te fa'u tohí he 'ū fa'ifa'itaki'anga 'o te tuí mei te ma'uli 'o te kakai 'iloa 'ihi 'i te hisitōlia 'o 'Isilelí (vahe 11), ko tana feinga ke tu'u ma'u 'ia te kakai ne'e fai ki ai tana tohí. Pea 'i te vahe 12 ne'e kouna'i 'e ia 'ia nātou ke notou tu'u ma'u ai pē 'o a'u ki te ngata'angá, kua sio fakamama'u te notou matá kiā Sīsū, mo kātakina te 'ū mamahi mo fakatanga 'e hoko mai kiā nātoú. 'Oku faka'osi 'aki te tohí he 'ū fale'i mo te fakatokanga.
Ko te kakano 'o te tohí
Ko te talateú: ko Kalaisí ko te fakahā'anga kakato 'o te 'Atuá (1:1-3)
Ko te mā'olunga ange 'ia Kalaisi 'i te kau 'āngeló (1:4—2:18)
Ko te mā'olunga ange 'ia Kalaisi 'iā Mōsese mo Siosiuá (3:1—4:13)
Ko te mā'olunga ange 'ia te tu'unga taula'aliki 'o Kalaisí (4:14—7:28)
Ko te mā'olunga ange 'ia te Fuakava Fo'ou 'a Kalaisí (8:1—9:22)
Ko te mā'olunga ange 'ia te feilaulau 'a Kalaisí (9:23—10:39)
Ko te mu'amu'a 'o te tuí (11:1—12:29)
Ko te me'a 'oku fakahōifua ki te 'Atuá (13:1-19)
Ko te lotu tukú (13:20-21)
Ko te tātukú (13:22-25)
1
Ko te folafola mai 'a te 'Atuá 'i Tono 'Aló
1 'I te kua hilí ne tu'a lahi mo founga kehekehe 'ia te Folafola mai 'ia te 'Atuá ki te tou mātu'á 'o fakafou mai 'i te kau palōfitá, 2 kā 'i te 'ū 'aho faka'osi ko 'ení kua Ina folafola mai kiā tātou 'i Tono 'Aló, 'a ia ne'e tu'utu'uni 'e 'O'ona 'ia te me'a kotoa pē, 'a ia foki ne'e fou ai Tana ngaahi 'ia te 'univeesí; 3 ko te Toko Taha 'a ia ko te ulo atu 'o Tono lāngilangí, mo te 'īmisi 'o Tana 'Afió mo'oni, pea 'oku Ina poupou'i ake 'ia te me'a kotoa pē 'aki Tana folafola mālohí, pea 'i te hili Tana feia 'ia te fakama'aangahalá, ne'e nofo ifo Ia mei te to'omata'u 'o Tana 'Afió 'i lunga. 4 Pea kua hoko Ia 'o fu'u mā'olunga 'i te kau 'āngeló, kote'uhí ko te fu'u lelei ange te huafa kua tō Mo'oná 'i to'o nātoú.
Ko te mā'olunga ange te 'Aló 'i te kau 'āngeló
5 He ko ai ia 'i te kau 'āngeló ne'e folafola ki ai he taimi, 'o pehē,
“Ko Toku 'Aló 'ia Koe,
kua U fakatupu 'Ou 'i te 'aho nei”?*1:5a Saame 2:7; 2 Sām 7:14; 1 Kal 17:13
Mo toe folafola 'e Ia,
“'E Au nofo ko Tana Tamai,
pea 'e nofo Ia ko Toku Foha.”*1:5b 2 Sām 7:14
6 Kae'uma'ā, 'i te 'aumai 'e Ia 'ia te Ta'oketé ki māmani, 'oku toe me'a Ia,
“Ke hū kiā Ia 'e te kau 'āngelo kotoa pē 'a te 'Atuá.”*1:6 Teu 32:43
7 Pea 'i Tana lau foki ki te kau 'āngeló, 'oku me'a Ia 'o pehē,
“'A ia 'oku Ina ngaahi Tana kau 'āngeló ko te 'ū matangi,
pea ko Tana kau ngāué ko te ulo'i afi.”*1:7 Saame 104:4
8 Kā ko Tana lau ki te 'Aló, 'oku pehē,
“'E 'Atua, ko Tou taloní 'oku lauikuonga pea ta'engata;
pea ko te tokotoko 'o Tou pule'angá
ko te tokotoko mā'oni'oni ia.
9 Kua Ke 'ofa ki te mā'oni'oní
kae fihi'a ki te maumau laó;
ko ia ko te 'Atuá, ko tou 'Atuá,
ne Ina pani 'aki 'Ou 'ia te lolo 'o te fiafiá,
'o lahi ake 'i Tou 'ū kaungāme'á.”*1:8-9 Saame 45:6-7
10 Mo 'eni,
“Ko Koe, 'Aliki, 'i te kamata'angá ne'e tanupou 'e Koe 'ia māmani;
pea ko te ngāue 'o Tou nimá 'ia te 'ū langí.
11 'E 'auha ia; kā 'e tu'u ai pē 'ia Koe;
'io, 'e notou faka'a'au kotoa pē ke matu'a 'o hangē ko te kofú.
12 Pea 'e Ke takatakai ia hangē ko te pulupulú;
'io, 'e fetongi ia hangē he kofú.
Kā ko Koe 'e pehē ai pē,
pea ko Tou 'ū ta'ú 'e kailoa ngata.”*1:10-12 Saame 102:25-27
13 Kae'uma'ā ko ai 'i te kau 'āngeló kua Ina folafola ki ai he taimi,
“Nofo 'ia koe mei Toku to'omata'ú,
kae'aua ke Au ngaahi tou 'ū filí ko tou tu'unga va'e”?*1:13 Saame 110:1
14 'Oku kala koā ko te 'ū laumālie ngāue 'ia nātou kotoa pē, 'oku fekau'i atu ke tauhi 'ia nātou 'e notou ma'u 'ia te fakama'ulí?