3
Ko te lahi 'ia Sīsū 'iā Mōsesé
1 Ko ia ai, 'e kāinga mā'oni'oni, si'i kau 'i te ui mei langi, kotou tokanga'i 'ia te 'Apōsetolo mo te Taula'aliki Lahi 'o te lotu 'oku tou tu'uakí, 'io, 'ia Sīsū. 2 Ne Ina anga-tonu kiā Ia ne'e fakanofo Iá, hangē ko te anga-tonu 'a Mōsese 'i te 'api kotoa 'o Tana 'Afió.*3:2 Nōm 12:7 3 He kua lau 'ia Sīsū ko 'ení kua taau mo te fakahīkihiki lahi ange 'iā Mōsese, ke hoa mo te lahi ake te mahu'inga 'O'ona ne'e langa te 'apí, 'i te mahu'inga 'o te 'apí. 4 He ko te fale kotoa pē ne'e langa he tangata; kā ko te 'Atuá ko Ia ne'e langa 'ia te me'a kotoa pē. 5 Pea ne'e anga-tonu mo'oni 'ia Mōsese 'i te fale kotoa 'o Tana 'Afió; ko te tamaio'aliki pē, mo'o fakamo'oni ki te 'ū me'a kā folafola 'aki 'āmuli; 6 kā ko te anga-tonu 'a Kalaisí, ko te fai he 'Alo 'oku pule ki te fale 'o Tana 'Afió. Pea ko Tono falé 'ia tātou, 'o kāpau 'e tou kuku ma'u 'o a'u ki te ngata'angá 'ia te tou lotolahí, mo te fiafia 'i te fakatu'amalie kua tou ma'ú.
Ko te fiamālie mo'o te kakai 'a te 'Atuá
7 Ko ia, hangē ko te Folafola 'a te Laumālie Mā'oni'oní,
“Ko te 'ahó pē 'eni, kāpau 'e kotou fanongo ki Tono le'ó,
8 'aua na'a fakafefeka te kotou lotó,
hangē ko ia ne'e fai 'i te fakahouhaú,
'o tatau mo te 'aho 'o te 'ahi'ahi 'i te toafá;
9 'ā ē ne 'ahi'ahi'i ai 'Oku 'e te kotou mātu'á,
'i te notou ala'aki maí,
'o notou mamata ki Taku 'ū ngāué 'i te ta'u 'e fāngofulu.
10 Ko ia ne Au 'ita ki te to'utangata nei, pea U pehē,
‘'Oku notou hē 'i te notou lotó ma'u pē,
pea ne'e kala notou a'usia 'ia te 'ilo'i Toku 'ū foungá.’
11 Ko ia ne Au fuakava ai 'i Taku 'itá,
‘'E kailoa 'aupito notou hū ki Toku mālōlō'angá!’ ”*3:7-11 Saame 95:7-11
12 Ko ia, kotou vakai, 'e kāinga, na'a 'i ai 'i te kotou toko taha he loto kovi, he ta'etui, 'a ia 'oku mavahe mei te 'Atua 'oku ma'ulí. 13 Kae kotou feenginaki'aki pē, 'o hokohoko 'aho pē, lolotonga 'oku kei lau ko te “'Aho nei”, talia na'a fakafefeka he kotou taha 'i te kākā 'a te angahalá. 14 He kua tou hoko ko te kau 'inasi 'iā Kalaisi, kāpau 'oku tou kuku ma'u 'o a'u ki te ngata'angá 'ia te lotopau ne'e tou kamata 'akí. 15 Ko te lau 'eni 'a te Folafolá,
“Ko te 'aho nei, kāpau 'e kotou fanongo ki tono le'ó,
'aua na'a fakafefeka te kotou lotó,
hangē ko te fai 'i te fakahouhaú.”*3:15 Saame 95:7-8
16 He ko ai 'ia nātou ne'e fanongo kae fakatupu houhau pē? 'Ē, 'oku kala koā ko nātou kotoa pē ne'e 'alu atu mei 'Isipite 'iā Mōsesé?*3:16-18 Nōm 14:1-35 17 Pea ko ai ne Ina houhau ki ai 'o fāngofulu ta'ú? 'Oku kala koā ko nātou ko 'ē ne'e angahalá, 'a ē ne'e makulu te notou 'ū 'anga'angá 'i te toafá? 18 Pea ko ai 'ia nātou ne Ina fuakava ki ai, 'e kala notou hū ki Tono mālōlō'angá? 'Oku kala koā ko nātou ne'e talangata'á? 19 Pea 'oku tou 'ilo'i, ne'e kala notou lava ke huú, kote'uhí ko te ta'etuí.