5
1 He ko te taula'aliki lahi kotoa pē, ko te me'a 'i tono to'o mei te kakaí, ko ia 'oku fakanofo ia mo'o te kakaí, ke tokanga ki te notou 'ū me'a mo te 'Atuá, ke 'avatu 'ia te 'ū me'a'ofa mo te 'ū feilaulau kote'uhí ko te angahalá. 2 Pea 'oku ina lava ke fai faka'atu'i ki te fai valé, mo te kakai kua heé, kote'uhí kua kāpui mo ia foki 'e te vaivai'angá. 3 Pea kote'uhí ko te me'a ko iá, kua pau ai ke ina 'avatu he feilaulau mo'o te angahala 'a'aná, 'o kala ko te angahala 'a te kakaí pē.*5:3 Lev 9:7 4 Kae'uma'ā 'oku kala to'o he taha 'ia te lakanga ko iá ma'ana, kā 'i tono ui 'ona ki ai 'e te 'Atuá, hangē foki ko 'Ēloné.*5:4 'Eki 28:1
5 Ko ia, na'a mo Kalaisi, ne'e kala Ina hākeaki'i 'e Ia 'Ona ke Taula'aliki Lahi, kā ko Ia pē ne'e folafola kiā Ia,
“Ko Toku 'Aló 'ia Koe;
kua U fakatupu 'Ou 'i te 'aho nei.”*5:5 Saame 2:7
6 Hangē foki ko Tana folafola 'i te potu 'e taha,
“Ko te taula'aliki 'ia Koe 'o ta'engata,
'i te lakanga 'o Melekisētekí.”*5:6 'i te lakanga 'o Melekisētekí, ko ia pe 'o hangē ko Melekisētekí, ko ia pe 'i te hohoko fakahangatonu mai meiā Melekisēteki.*5:6 Saame 110:4
7 Ko te Toko Taha ko iá 'i te 'ū 'aho 'o Tana nofo kakanó, ne'e 'avatu 'e Ia 'ia te 'ū lotu, mo te 'ū hū tōtōaki, kiā Ia ne'e mafai ke fakahaofi 'Ona mei te maté, 'o fai 'aki 'e Ia 'ia te fu'u kalanga, mo te tangi lo'imata; pea ne'e tali ko te me'a 'i Tana fai fakaongoongó.*5:7 Māt 26:36-46; Ma'ake 14:32-42; Luke 22:39-46 8 'Io, neongo ko te 'Aló Ia, kā ne Ina ako 'ia te talangafuá mei Tana 'ū mamahí. 9 Pea kua fakahaohaoa'í leva, ne Ina hoko ma'a nātou kotoa pē 'oku talangafua kiā Iá, ko te tupu'anga 'o he fakama'uli 'oku laui 'ītāniti; 10 'i tono ui 'Ona 'e te 'Atuá, ko te Taula'aliki Lahi 'i te lakanga 'o Melekisētekí.†5:10 'i te lakanga 'o Melekisētekí: vakai ki te 5:6.
Ko te fakatokanga ki te si'aki 'o tata tuí
11 'Oku lahi 'aupito te motou fakamatala ke fai ki aí, pea faingata'a tono faka'uhingá; kote'uhí ko te kotou hoko ko te kau ongongata'á. 12 He neongo ne'e totonu ke kotou faiako, kote'uhí ko te kotou fualoá, kā ko te kotou taaú 'eni ke toe ako'i kiā kōtou he taha 'o te 'ū tafito'i mo'oni 'o te 'ū Folafola 'a te 'Atuá. 'Io, kua kotou hoko ko he kakai 'oku tuha mo te hu'akau pē, 'o kala ko te me'akai mālohi.*5:12-13 1 Kol 3:2 13 He ko ia ko 'ē 'oku me'akai 'aki te hu'akaú, 'oku kailoa poto ia 'i te Folafola 'o te mā'oni'oní, he ko te valevale ia. 14 Kā ko te me'akai mālohí 'oku ma'a nātou pē 'oku matu'atu'á, 'ia nātou ko 'ē ko te me'a 'i te notou fa'a fai ki aí, kua ako'i te notou 'ū ongo'angá ke fakafaikehekehe'i 'ia te lelei mo te kovi.
*5:3 5:3 Lev 9:7
*5:4 5:4 'Eki 28:1
*5:5 5:5 Saame 2:7
*5:6 5:6 'i te lakanga 'o Melekisētekí, ko ia pe 'o hangē ko Melekisētekí, ko ia pe 'i te hohoko fakahangatonu mai meiā Melekisēteki.
*5:6 5:6 Saame 110:4
*5:7 5:7 Māt 26:36-46; Ma'ake 14:32-42; Luke 22:39-46
†5:10 5:10 'i te lakanga 'o Melekisētekí: vakai ki te 5:6.
*5:12 5:12-13 1 Kol 3:2