Ko te 'Ipiseli 'a
Sēmisí
Ko te talateú
Ko te 'Ipiseli 'a Sēmisí ko he 'ū akonaki ne'e fai ki te “matakali 'e hongofulu mā ua 'oku nofo mavetevete” (1:1). 'I te veesi 1:1 'oku hā ai ko Sēmisi ne'e 'a'ana 'ia te 'ipiseli ko 'ení. 'Oku ngalingali ko Sēmisi 'eni ko te tehina 'o Sīsuú pea ko te tokoua foki 'o Siutasi (Māt. 13:55). Ne'e ngāue 'aki 'e Sēmisi he 'ū lea fakatātā lahi mo mahino ki tono 'aumai tana 'ū akonakí, 'a ia 'oku kau ki te fakapotopotó mo te 'ū tō'onga ma'uli mo te tūkunga fakakaukau 'o te Kalisitiané. 'Oku fakamatala'i ai 'e Sēmisi 'ia te 'ulungāanga totonu 'o te Kalisitiané 'i te 'ū tafa'aki kehekehe hangē ko te koloa'iná, mo te masivá, mo te 'ahi'ahí, mo te 'ulungāanga leleí, mo te filifilimānakó, 'ia te tui mo te ngāué, mo tono ngāue 'aki 'o te 'aleló, mo te potó, feke'ike'í, 'ia te 'afungí mo te anga-fakatōkilaló, fakaangá, pōlepolé, kātakí, mo te fa'a lotú.
'Oku fakamamafa'i 'e te tohí 'ia te mahu'inga 'o te ngāué, 'o kala ko te tuí pē, 'i te ma'uli 'a te Kalisitiané.
Ko te kakano 'o te tohí
Ko te talateú (1:1)
Ko te tuí mo te potó (1:2-8)
Ko te masivá mo te koloa'iná (1:9-11)
Ko te 'ū faingata'á mo te 'ahi'ahí (1:12-18)
Ko te fanongó mo te talangafuá (1:19-27)
Ko te fakatokanga ki te filifilimānakó (2:1-13)
Ko te tuí mo te ngāué (2:14-26)
Ko te Kalisitiané mo tono 'aleló (3:1-18)
Ko te Kalisitiané mo māmani (4:1—5:6)
Ko te 'ū akonaki kehekehe (5:7-20)
1
Ko te fakafe'iloakí
1 Ko au Sēmisi, ko he tamaio'aliki 'a te 'Atuá mo te 'Alikí ko Sīsū Kalaisi, ko taku tohi ki te matakali 'e hongofulu mā ua 'oku nofo maveteveté: 'ofa atu.*1:1 Māt 13:55; Ma'ake 6:3; Ngā 15:13; Kal 1:19
Ko te tuí mo te potó
2 Si'aku kāinga, kotou lau ko te koto fakafiafia 'o kā kotou tō ki te 'ū 'ahi'ahi kehekehe; 3 ko te kotou 'ilo'i, ko te sivi 'o te kotou tuí 'oku fakatupu ai te kātakí. 4 Pea ko 'eni, tuku ke fai 'e kātaki tana ngāué ke haohaoa, kote'uhí ke kotou haohaoa, mo tu'u kakato, 'o ta'emasiva he me'a. 5 Kā 'i ai he kotou taha 'oku masiva 'i te potó, ke kole ia mei te 'Atuá, 'a ia 'oku Ina foaki 'ata'atā pē ki te kakai kotoa pē, pea 'oku kailoa valoki'i; pea 'e foaki ia kiā ia. 6 Kā ke ina kole mo tui, 'o 'aua tāla'a. He ko ia 'oku tāla'á 'oku hangē ia ko te peau 'o te taí 'oku fakateka 'o liaki holo 'e te matangí. 7 'Io, ke 'aua 'e mahalo te tangata ko iá 'e ina ma'u he me'a mei te 'Alikí. 8 Ko te tangata lotolotoua ia, 'oku ta'emaau ta'aná anga kotoa pē.
Ko te masivá mo te koloa'iná
9 Pea ko 'eni, ke vīkiviki si'i tokoua lotu 'oku mā'ulaló he kua hākeaki'i 'ona; 10 kā ko te koloa'iná 'i tono fakatōkilalo'í; he 'oku hangē ko te fisi'i mahukú tana mole 'a'aná.*1:10-11 'Ais 40:6-7 11 He ne'e hopo 'ia te la'aá mo tana faka'a'afu, pea ne fakamae 'ia te mahukú, pea ngangana tono fisí, pea mole tono matamataleleí. 'E pehē pē foki te 'auha 'ia te koloa'iná, 'o kā fai atu tono 'alunga ko iá.
Ko te 'ū faingata'á mo te 'ahi'ahí
12 Manū'ia ā ka ko te tangata 'oku ina kātaki'i he 'ahi'ahi; he kā 'osi tono siví, 'e ina ma'u ai te kalauni 'o te ma'ulí, 'a ē kua Ina tala'ofa kiā nātou 'oku 'ofa kiā Iá. 13 Ke 'aua na'a lau he toko taha 'o kā 'ahi'ahi'i, “'Oku mei te 'Atuá toku 'ahi'ahi'í.” He 'oku kala fa'a 'ahi'ahi'i te 'Atuá 'e te koví, pea 'oku kailoa 'ahi'ahi'i he taha 'e Tana 'Afió. 14 Kā 'oku 'ahi'ahi'i te tangata taki taha 'i te tohoaki'i 'ona 'e tana holi 'a'aná, mo taki 'aki he mounu. 15 Faifaí pea tu'itu'ina te holi ko iá, 'o ina fanau'i he angahala; pea ko te angahala ko iá, 'o kā kakato, 'oku ina fā'ele'i 'ia te mate.
16 Si'aku kāinga 'ofa'anga, 'aua na'a kotou hē. 17 Ko te foaki lelei kotoa pē, mo te foaki haohaoa kotoa pē, ko te 'alu ifo pē ia mei te Tamai 'o te 'ū maamá, 'a ia 'oku kala 'i Tana 'Afió he feto'oaki, pe ko he 'ata 'o te liliú.*1:17 1 Sām 15:29 18 Kote'uhí ko Tono finangalo pē 'O'oná ne Ina fakatupu ai 'ia tātou 'aki te Folafola 'o te mo'oní, kote'uhí ke tou hoko ai ko te polopolo takua 'o te 'ū me'a kua Ina ngaahí.
Ko te fanongó mo te talangafuá
19 Ko ia ai, si'aku kāinga 'ofaina: ke fakavave te tangata fuli pē ki te fanongó, kae fakatuatuai ki te leá, pea fakatuatuai ki te 'itá. 20 He ko te 'ita 'a te tangatá 'oku kala ina fakatupu 'ia te mā'oni'oni 'o te 'Atuá. 21 Ko ia, kotou si'aki 'ia te 'uli kotoa pē, mo te lahi fau 'o te koví, 'o kotou tali anga-vaivai te Folafola kua toó, 'a ia 'oku mafai ke fakama'uli te kotou laumālié.
22 Kae kotou hoko ko te kau fai ki te Folafolá, 'o kala ko te kau fanongo pē, 'o kotou kākaa'i ai 'ia kōtou. 23 He kā 'i ai he taha, 'a ia ko he fanongo pē ki te Folafolá, kā ko he ta'efai ki ai, 'oku tatau ia mo he siana 'oku fakasio ki te fōtunga ne'e tupu mo iá he sio'ata; 24 he kua ina fakasio leva kiā ia, pea 'alu, pea ngalo leva pe 'oku fefe'aki tono fofongá. 25 Kā ko ia 'oku fakasio ifo ki te lao haohaoá, 'a ē 'oku fakatau'atāina'i ai 'ia kōtoú, 'o ina fai ma'u ai pē ki ai, kae'uma'ā 'oku kala ngalo 'iā ia te me'a 'oku fanongo ki aí, kā 'oku fai ngāue, 'ē, 'e manū'ia te toko taha ko iá 'i tana ngāué.
26 Kā 'i ai he taha 'oku lau ko te lotu ia, kā 'oku kala ina 'ai piti tono 'aleló, kā 'oku ina kākaa'i pē to'onó loto, 'ē, ko ta'aná lotu ko te launoa. 27 Ko 'eni ia 'ia te tō'onga lotu 'oku ma'a mo ta'emele 'i te 'afio 'a te 'Atuá ko te Tamai, ko te 'a'ahi ki te kau tamai maté mo te kau uitoú 'i te notou mamahí, pea faka'ehi'ehi mei te 'ū tō'onga 'oku fakamāmaní.