Ko te 'Ipiseli 'a Paula ki te Kakai
Filipaí
Ko te talateú
Ko te 'Ipiseli 'a Paula ki te Kakai Filipaí ne'e fai ia ki te fu'aki siasi ne fokotu'u 'e Paula 'i te kelekele 'o 'Iulopé 'i te vahefanua Loma ne'e ui ko Masitōnia. Ne fai te 'ipiseli ko 'ení 'oku lolotonga nofo pōpula te 'apōsetoló. Pea 'i te taimi ko iá ne'e faingata'a'ina ai kote'uhí ko te fakafepaki ne'e fai 'e te kau ngāue Kalisitiane kehe kiā ia, pea ne'e mafasia ai tono lotó kote'uhí ko te akonaki hala kua fai 'i te siasi 'i Filipaí. Kā neongo ia, ko te 'ipiseli 'eni 'oku hā mata'ala'ala ai 'ia te fiafia mo te fakatu'amalie 'a Paulá 'a ia ko tono tupu'angá pē ko tana mātu'aki tui falala kiā Sīsū Kalaisí.
Ko te 'uhinga ne fu'aki fakakaukau ai 'e Paula ke fai tana 'ipiseli ko 'ení, ko tana fia fakamālō ki te kau Kalisitiane Filipaí kote'uhí ko te me'a'ofa ne notou fakamoimoi mai kiā ia 'i te tu'unga ne'e fia ma'u ai 'e ia 'ia te tokoni ko iá. Ne fai foki 'e Paula tana tohí ko te faingamālie ke poupou ai kiā nātou ke notou lototo'a mo loto falala, neongo tono 'ū faingata'a'iná mo te 'ū faingata'a'ina 'o nātoú. Ne ina kole foki kiā nātou ke notou loto fakatōkilalo 'o hangē ko Sīsuú, pea 'aua na'a notou 'efihia 'i te loto siokitá mo te 'afungí. Ne fakamanatu 'e Paula kiā nātou ko te notou ma'uli 'iā Kalaisí ko te me'a'ofa ia mei te 'ofa tu'unga'a 'a te 'Atuá. 'Oku notou ma'u te me'a'ofa nei 'i te notou tuí, 'o kailoa ko te notou tauhi 'ia te 'ū ouau 'o te Lao Faka-Siú.
'Oku 'ilonga 'ia te 'ipiseli ko 'ení tono fakamamafa'i te fiafiá, mo te loto falalá, mo te fāitahá, mo te vilitaki atu 'i te ma'uli faka-Kalisitiané. 'Oku hā ai pē foki mei te tohí 'ia te fu'u 'ofa lahi 'ia Paula ki te siasi 'o Filipaí.
Ko te kakano 'o te tohí
Ko te talateú (1:1-11)
Ko te 'ū me'a ne hoko 'i te ma'uli 'a Paulá (1:12-26)
Ko te ma'uli 'i te taha mo Kalaisí (1:27—2:18)
Ko te 'ū palani kiā Tīmote mo 'Epafalataitó (2:19-30)
Ko te 'ū fakatokanga fekau'aki mo te 'ū filí mo te 'ū fakatu'utāmakí (3:1—4:9)
Ko Paula mo tono 'ū kaume'a 'i Filipaí (4:10-20)
Ko te tātukú (4:21-23)
1
Ko te fakafe'iloakí
1 Ko māua Paula mo Tīmote, ko he ongo tamaio'aliki 'a Kalaisi Sīsū, ko te mā tohi ki te kāinga lotu kotoa pē 'oku 'iā Kalaisi Sīsū, 'oku nofo 'i Filipaí, pea mo te kau faifekau pulé mo te kau akonakí.*1:1 Ngā 16:12
2 'Ofa ke kotou ma'u kelesi mo te fiamālie mei te 'Atua ko te tou Tamaí mo te 'Aliki ko Sīsū Kalaisí.
Ko te lotu 'a Paula ma'a te kakai Filipaí
3 Ko taku manatu ma'u pē kiā kōtou pea u fakafeta'i ai ki toku 'Atuá. 4 Pea 'oku fai fiafia ma'u pē taku taimi lotú 'i tono hūfia 'o kōtoú kotoa pē, 5 kote'uhiā ko te kotou kau fakataha mo au 'i te ongoongoleleí, talu mei te fu'aki 'ahó 'o a'u mai ki te taimi nei. 6 'Okou 'ilo'i pau 'ia te me'a ko 'ení, kote'uhí ko Ia kua Ina kamata 'i te kotou lotó he ngāue leleí, 'e fai ai pē Ia Tono fakahaohaoa'í, 'o a'u ki te 'aho 'o Sīsū Kalaisí. 7 He 'oku totonu ke pehē taku 'amanakí 'iā kōtou kotoa pē, pea 'okou tauhi ma'u kōtou 'i toku lotó; pea 'i taku nofo ha'isiá, pea 'i taku taukapo'i mo fakamo'oni ki te ongoongoleleí, 'oku kotou kau kotoa pē mo au 'i te kelesi 'oku 'aumaí. 8 Seuke, ko te 'Atuá ē ko toku fakamo'oni ki te lahi 'o taku tokanga kiā kōtou 'i te mānava 'o Kalaisi Sīsuú.
9 Pea ko taku lotú 'eni, ke toe tupulakina 'o lahi ake 'aupito te kotou 'ofá, mo te 'iló mo te fakapotopoto 'i te me'a kotoa pē; 10 kote'uhí ke kotou sivi'i 'o 'ilo te 'ū me'a 'oku lelei lahí, kae kotou nofo anga-tonu mo ta'emele, 'o a'u ki te 'aho 'o Kalaisí; 11 kua kotou fonu ngutungutu 'i te fua 'o te mā'oni'oní, 'a ia 'oku fou 'iā Sīsū Kalaisí, ke lāngilangi'ina mo fakamālō'ina ai 'ia te 'Atuá.
Ko te tāpuaki 'o te tuku pōpula 'o Paulá
12 Pea 'okou loto, kāinga, ke mahino 'eni kiā kōtou, ko te 'ū me'a kua hoko kiā aú, kua notou iku ki te fakamafola 'o te ongoongoleleí. 13 Ko ia, kua 'iloa ai toku 'ū ha'í 'i te palasí kātoa, pea ki te kakai kotoa pē, 'o hā ko te tupu mei taku kau kiā Kalaisí.*1:13 Ngā 28:30 14 Pea mo te tokolahi 'o te kāinga lotú, kua langa'i ake te notou falala ki te 'Alikí kote'uhí ko toku 'ū ha'í, pea kua fakautuutu ai te notou lototo'a 'o lea 'aki te Folafola 'a te 'Atuá*1:14 te Folafola 'a te 'Atuá: 'oku pehē 'i tono 'ū hiki fualoa 'ihi, te Folafolá. 'o ta'emanahē.
15 Ko te mo'oni 'oku 'i ai he 'ihi 'oku malanga 'aki 'ia Kalaisí ko te meheka, mo te fakafekāke'i; kā 'oku fai foki te 'ihi ko te notou loto lelei mai. 16 Ko te ha'a 'ofá, 'oku notou faí ko te notou 'ilo'i ko toku nafá ko te taukapo'i 'o te ongoongoleleí; 17 kā ko te 'ihi 'oku notou ongoongoa 'ia Kalaisí, ko te siokita ke fakalahi 'aki te mamahi ki toku 'ū ha'í.
18 Kā ko te toe 'aí ke fefe'aki? Ko ia ai pē tono angá: pe ko te kofu 'o he me'a, pe ko te fai mo'oni, kehe pē 'oku ongoongoa ai 'ia Kalaisi, pea 'okou fiafia ai au. 'Io, pea 'e au fiafia ai foki, 19 he 'okou 'ilo'i 'e iku te me'a ko iá ki toku fakama'uli, 'i te kotou hūfiá mo te tokonaki 'a te Laumālie 'o Sīsū Kalaisí. 20 Pea 'okou 'amanaki 'eni mo falala, 'e kailoa fakamaa'i 'oku he me'a; kaikehe, hangē ko ia 'i mu'á, 'e pehē foki 'i onopooni, 'e au mālohi noa pē 'i te fakahīkihiki'i 'o Kalaisi 'aki toku sinó, pe 'i te ma'ulí, pe 'i te maté. 21 He ko te me'a kiā kitá, ko taku ma'ulí ko Kalaisi 'atā, pea ko taku pekiá ko te 'āsili to'okú fakakoloa. 22 Kae kāpau ko taku ma'uli atu 'i te kakanó, ko te me'a ia 'oku tu'u ai taku ma'u fua 'i te ngāué, pea tā 'oku kala u 'ilo'i pe ko te ā 'e au fili ki aí. 23 Kā 'oku fefūsiaki 'oku 'e te me'a ko iá 'e ua: 'oku holi toku lotó ke tuku folau atu, 'o nonofo mo Kalaisi, he 'oku lelei lahi ake noa pē ia; 24 kā ko te nofo pē 'i te sinó 'oku 'aonga ange kiā au kote'uhí ko kōtou. 25 Pea 'i taku ongo'i peheé, 'okou 'ilo'i 'e au nofo pē 'o ma'uli atu ma'a kōtou fuli pē, ke tupulakina ai te kotou tuí, pea fai mo te fiafia; 26 kae tupulakina 'aupito ai te kotou fiafiá 'iā Kalaisi Sīsū kote'uhí ko au, 'i taku toe 'a'ahi atu kiā kōtoú.
27 Ko te me'á pē, ke hoa te kotou feangaí mo te ongoongolelei 'o Kalaisí, kote'uhí, pe 'e au 'alu atu 'o mamata, pe 'e au mama'o pē 'o fanongo ki te kotou 'ū me'á, ke hā 'oku kotou tu'u ma'u, 'o laumālie taha, 'o kotou loto uauangataha pē 'i te fakafitafīta'a 'i te tui ki te ongoongoleleí. 28 Pea 'oku kala kotou 'ilifia he me'a 'e taha 'oku fai atu 'e te kotou 'ū filí. He ko te faka'ilonga mala'ia ia kiā nātou, kā ko te fakama'uli ia kiā kōtou, pea ko te faka'ilonga foki ia mei te 'Atuá. 29 He kua 'avatu 'eni kiā kōtou, 'o kala ko te tui pē kiā Kalaisi pea ngata ai, kā ke kātaki mamahi foki kote'uhí ko Ia, 30 pea 'oku kotou fekuki mo te faingata'a tatau, hangē ko ia ne kotou sio mu'a ai 'iā aú, pea 'oku kotou fanongo 'eni 'oku 'iā aú foki.*1:30 Ngā 16:19-40