1 “Tohi ki te 'āngelo 'o te siasi 'i 'Efesoó, 'o pehē:

Ko 'eni te Folafola 'a te Toko Taha 'a ia 'oku Ina puke 'ia te fetu'u 'e fitu 'i Tono nima to'omata'ú, 'a ia 'oku Ina hā'ele 'i te lotolotonga 'o te tu'unga maama koula 'e fitú.

2 'Okou 'ilo'i pē tau 'ū ngāué, mo tau fakaongosiá, mo tau kātakí; mo te kala ke makātaki'i te kau koví; mo tau sivi 'ia nātou 'oku taukave ko te 'apōsetolo 'ia nātoú, kā 'oku kailoa, 'o ke 'ilo'i tā ko te koto lohi. 3 Pea 'oku kei kātaki pē 'ia koe, pea kua ke fua kavenga kote'uhí ko Toku hingoá, 'o kala ke fiu.

4 Kā neongo iá, 'oku 'i ai he me'a 'Okou kovi'ina ai kiā koe; ko tau hiki mei tau fu'aki 'ofá. 5 Ko ia ai, fakamanatu ki te me'a kua ke hinga mei aí, pea fakatomala leva, 'o fai te 'ū fu'aki ngāué; kā kailoa, ko Taku 'alu atu 'eni kiā koe, pea 'e Au hiki tau tu'unga maamá mei tono tu'u'angá, 'o kāpau 'e kala ke fakatomala. 6 Kā 'oku 'i ai tau me'a ko 'ení, ko tau fihi'a ki te 'ū ngāue 'a te kau Nīkolaitaní, 'a ia 'Okou fihi'a ki ai foki mo Au.

7 Ko ia 'oku talingá, ke ina fakafanongo ki te me'a 'oku folafola 'aki 'e te Laumālié ki te 'ū siasí.*2:7 Sēn 2:9; Fkhā 22:2; 'Isi 28:13; 31:8

Ko ia ko 'ē 'e ikuná, 'e Au tuku kiā ia ke kai mei te 'akau 'o te ma'ulí, 'a ia 'oku tu'u 'i te Palataisi 'o te 'Atuá.

8 “Pea tohi ki te 'āngelo 'o te siasi 'i Sīmaná, 'o pehē:

Ko 'eni te Folafola 'a te 'uluakí mo te ki mulí, 'ia te Toko Taha 'a ia ne'e mate pea toe ma'ulí.*2:8 'Ais 44:6; 48:12; Fkhā 1:17; 22:13

9 'Okou 'ilo'i pē tau mamahi'iná, mo tau masivá, (kā 'oku koloa'ina pē 'ia koe,) pea 'Okou 'ilo'i te lau kovi 'oku fai 'e te fa'ahinga 'oku notou taukave ko te Siu 'ia nātoú, kā 'oku kailoa, kā ko te fakataha'anga 'o Sētane. 10 'Aua ke manahē ki te 'ū mamahi 'oku ene ke hoko kiā koé. Ko 'eni, 'oku teu sī 'e te tēvoló 'ia te kotou 'ihi ki te pilīsoné, ko te 'ahi'ahi'i 'o kōtou; pea 'e kotou ma'ua 'i te mamahí 'o 'aho hongofulu. Kā ke fai anga-tonu pē 'o a'u ki te mate, pea 'e Au 'avatu kiā koe te kalauni 'o te ma'ulí.

11 Ko ia 'oku talingá, ke ina fakafanongo ki te me'a 'oku folafola 'aki 'e te Laumālié ki te 'ū siasí.

Ko ia ko 'ē 'e ikuná, 'e kailoa 'aupito mama'i lavea ia 'i te mate 'angauá.*2:11 Fkhā 20:14; 21:8

12 “Pea tohi ki te 'āngelo 'o te siasi 'i Peakamosí, 'o pehē:

Ko 'eni 'ia te Folafola 'a te Toko Taha 'oku 'iā Ia 'ia te heletā fakatoumata 'oku māsila.

13 'Okou 'ilo'i pē te feitu'u*2:13 'Okou 'ilo'i pē te feitu'u: 'oku pehē 'i tono 'ū hiki fualoa 'ihi, 'Okou 'ilo'i tau 'ū ngāué, mo te feitu'u. 'oku ke nofo aí, 'a ia 'oku tu'u ai te taloni 'o Sētané; pea 'Okou 'ilo'i pē 'oku kuku 'e koe Toku hingoá, pea ne'e kala ke fakafisinga'i 'ia te tui kiā Aú, 'io, na'a mo te 'ū 'aho 'o 'Anitipasa ko Si'aku mā'atá, mo Si'aku fakamo'oni anga-tonu, 'a ia ne'e tāmate'i 'i te kotou lotolotongá — 'ia te potu 'oku nofo ai 'ia Sētané.

14 Kā 'oku 'i ai he me'a 'ihi 'Okou kovi'ina ai 'iā koe, ko tau ma'u 'i hena 'ia nātou 'oku notou puke ki te akonaki 'a Pēlamí, 'ā ē ne'e fale'i 'ia Pēlaki ke 'ai he tūkia'anga 'i te 'ao 'o te ha'a 'Isilelí, ke notou kai te me'a ne'e feilaulau ki te 'aitolí, pea ke notou fe'auaki.*2:14 Nōm 22:5, 7; 31:16; Teu 23:4; Nōm 25:1-3; Siuta 1:11 15 Pehē 'oku 'iā koe foki 'ia nātou 'oku notou puke ki te akonaki 'a te kau Nīkolaitaní, 'a ē 'oku hangē ko te fa'ahinga ko 'ē.†2:15 'a ē 'oku hangē ko te fa'ahinga ko 'ē: 'oku pehē 'i tono 'ū hiki fualoa 'ihi, 'a ia 'Okou fihi'a ki aí. 16 Ko ia, ke ke fakatomala leva; he kā kailoa, ko Taku 'alu atu leva kiā koé, 'e Au tau'i 'ia nātou 'aki te heletā 'o Toku ngutú.

17 Ko ia 'oku talingá, ke ina fakafanongo ki te me'a 'oku folafola 'aki 'e te Laumālié ki te 'ū siasí.

Ko ia ko 'ē 'e ikuná, 'e Au 'avatu kiā ia te mana ne'e fufū, pea 'e Au 'avatu kiā ia he maka hinahina, pea mo he hingoa fo'ou kua tohi ki te maká, 'a ia 'oku kala 'ilo ki ai he taha, kā ko ia pē 'oku ina ma'ú.*2:17 'Eki 16:14-15; 16:33-34; Sione 6:48-50; 'Ais 62:2; 65:15

18 “Pea tohi ki te 'āngelo 'o te siasi 'i Taiatailá 'o pehē:

Ko 'eni 'ia te Folafola 'a te 'Alo 'o te 'Atuá, 'ia te Toko Taha ko 'ē ko Tono ongo matá 'oku hangē he ulo'i afí, pea ko Tono va'é 'oku hangē ko he palasa ngingilá.

19 'Okou 'ilo'i pē tau 'ū ngāué, tau 'ofá, mo tau tuí, mo tau tokoní, mo tau kātakí, mo te lahi ake tau ngāue ki mulí 'i tau ngāue mu'á.

20 Kā neongo iá, 'oku 'i ai he me'a 'Okou kovi'ina ai kiā koe, ko tau kātaki'i te fafine ko Sisipelí,‡2:20 te fafine ko Sisipelí: 'oku pehē 'i tono 'ū hiki fualoa 'ihi, tou 'unoho ko Sisipelí. 'a ē 'oku taukave ko te palōfita ia, mo ina akonakina mo takihee'i Taku kau tamaio'alikí, ke notou fe'auaki mo kai te me'a ne'e feilaulau ki te 'aitolí.*2:20 1 Tu'i 16:31; 2 Tu'i 9:22, 30 21 Pea ne Au tuku hana taimi ke fakatomala; kā 'oku kailoa loto ia ke fakatomala 'o tafoki mei tana fe'auakí. 22 Vakai, 'e Au sii'i 'ona ki te moengá, pea 'e Au sī 'ia nātou 'oku kau mo ia 'i te fe'auakí ki te mamahi lahi, 'o kāpau 'e kala notou fakatomala 'o tafoki mei te 'ū ngāue 'a'aná. 23 Pea 'e Au tāmate'i tana fānaú 'aki te mahaki faka'auha; pea 'e 'ilo'i 'e te 'ū siasi kotoa pē, ko Au ia 'oku hakule 'ia te 'ū holí mo te lotó. Pea 'e Au 'avatu kiā kōtou taki taha 'o fakatatau ki te kotou ngāué.*2:23 Saame 7:9; Sel 17:10; Saame 62:12

24 Kā ko Taku lea ki tono toe 'o te kakai 'o Taiatailá, 'ia nātou 'oku kala mulimuli ki te akonaki ko 'ení, 'ia te fa'ahinga kua kala notou 'ilo'i te 'ū akonaki loloto 'o Sētané, 'o hangē ko te lau 'e nātou ko 'ená: ko 'eni 'oku kala U hilifaki kiā kōtou mo he kavenga. 25 Ko 'eni pē, ko te me'a 'oku kotou ma'ú, kuku pē kae'aua ke Au 'alu atu. 26 Pea ko ia ko 'ē 'e ikuná, mo ina tauhi Taku ngāué 'o a'u ki te ngata'angá, 'e Au tuku kiā ia 'ia te pule ki te 'ū kakai, 27 pea 'e ina pule'i 'ia nātou 'aki he tokotoko ukamea; 'o hangē ko te laiki ke lailai 'ia te 'ū ipu 'umeá, hangē ko ia foki ne Au ma'u 'e Au mei Taku Tamaí.*2:26-27 Saame 2:8-9 28 Pea 'e Au tuku kiā ia 'ia te Fetu'u Pongipongí.

29 Ko ia 'oku talingá, ke ina fakafanongo ki te me'a 'oku folafola 'aki 'e te Laumālié ki te 'ū siasí.