7
Ko te toko 144,000 kua sila'i ma'a te 'Atuá
1 Hili ange te me'a ko iá, ne au vakai he 'āngelo 'e toko fā, ne'e notou tu'u 'i te tuliki 'e fā 'o māmaní, 'o notou puke te matangi 'e fā 'o māmaní, ke 'aua na'a angi he matangi ki te fanuá, pe ki te taí, pe ki te 'akaú.*7:1 Sel 49:36; Tān 7:2; Sāk 6:5 2 Pea ne au vakai te 'āngelo 'e taha ne ina 'alu ake mei te hahaké, 'oku 'iā ia te sila 'a te 'Atua ma'ulí. Pea ne'e kalanga le'o lahi ia ki te 'āngelo 'e toko fā, 'a ia kua tuku kiā nātou ke maumau'i te fanuá mo te taí, 3 'o pehē, “'Aua 'e kotou mama'i maumau'i te fanuá, pe ko te taí, pe ko te 'ū 'akaú, kae'aua ke 'osi te motou sila'i 'ia te kau tamaio'aliki 'a te tou 'Atuá 'i te notou la'é.”*7:3 'Isi 9:4, 6 4 Pea u fanongo ki te lau 'o te kakai ne'e sila'í, ko te toko taha kilu mā toko fā mano mā toko fā afe (144,000) ne'e sila'i mei te matakali kotoa pē 'o te ha'a 'Isileli.
5 Ne sila'i meiā Siuta he toko taha mano mā toko ua afe,
meiā Lūpeni, he toko taha mano mā toko ua afe,
meiā Kata, he toko taha mano mā toko ua afe,
6 meiā 'Āseli, he toko taha mano mā toko ua afe,
meiā Nafitalai, he toko taha mano mā toko ua afe,
meiā Manase, he toko taha mano mā toko ua afe,
7 meiā Simione, he toko taha mano mā toko ua afe,
meiā Līvai, he toko taha mano mā toko ua afe,
meiā 'Īsaka, he toko taha mano mā toko ua afe,
8 meiā Sepulone, he toko taha mano mā toko ua afe,
meiā Siosifa, he toko taha mano mā toko ua afe,
pea ne sila'i meiā Penisimani he toko taha mano mā toko ua afe.
Ko te kakai ta'efa'alaua mei te fanua kotoa pē
9 Hili iá ne au vakai, pea tā ko te fu'u kakai lahi, 'a ia 'e kailoa lava he taha tono lau, mei te 'ū pule'anga, mo te 'ū matakali, mo te 'ū fa'ahinga, mo te 'ū lea kotoa pē, ne'e notou tutu'u 'i te 'ao 'o te taloní pea 'i te 'ao 'o te Lamí, kua notou kofu 'aki te 'ū kofu tōtōlofa hinahina, pea 'oku notou to'o te 'ū va'a paame; 10 pea ne'e notou kalanga le'o lahi, 'o pehē,
“Ko te tou fakama'ulí 'oku mei te tou 'Atuá,
'a ia 'oku 'afio 'i te taloní,
pea mei te Lamí.”
11 Pea ko te kau 'āngelo kotoa pē ne'e notou tu'u takatakai ki te taloní, pea ki te kau mātu'á, pea ki te me'a ma'uli 'e faá; pea ne'e notou tō fo'oifo leva 'i te 'ao 'o te taloní, pea notou hū ki he 'Atuá, 'o pehē,
12 “'Ēmeni.
Ko te tāpuakí, mo te kolōliá, mo te potó,
mo te fakafeta'í, mo te faka'apa'apá,
mo te mafaí, mo te mālohí,
'e lau ia ki te tou 'Atuá,
'o lauikuonga pea ta'engata. 'Ēmeni.”
13 Pea ne'e tali he taha 'o te kau mātu'á, 'o pehē mai, “Ko ai 'ia nātou ko 'ena 'oku kofu hinahina? Pea ko te notou ha'u mei fea?”
14 Pea u pehē kiā ia, “'Aliki, ko koe pē 'oku mea'í.”
Pea me'a mai ia, “Ko 'eni ia 'ia nātou 'oku ha'u mei te mamahi lahi, pea ne'e notou fō te notou kofú, 'o fakahinahina 'i te ta'ata'a 'o te Lamí.*7:14 Tān 12:1; Māt 24:21; Ma'ake 13:19 15 Ko te 'uhinga ia 'o te notou 'i mu'a 'i te taloni 'o te 'Atuá, pea 'oku notou tauhi kiā Ia 'i Tono temipalé 'i te 'aho mo te pō. Pea ko Ia 'oku 'afio 'i te taloní 'e Ina fokotu'u Tono tēnití 'o fakamalumalu 'ia nātou. 16 'E kala notou toe fiakaia, 'uma'ā he notou toe fiainua, 'uma'ā he mama'i lave kiā nātou 'ia te la'aá, pe ko te 'ū me'a fakavelehiá.*7:16 'Ais 49:10 17 He ko te Lami 'oku 'i te loto taloní, 'e Ina tauhi 'ia nātou hangē ko he fanga sipí, pea 'e Ina tataki 'ia nātou ki te 'ū matavai 'o te ma'ulí. Pea 'e holoholo'i 'e te 'Atuá 'ia te lo'imata fuli pē mei te notou matá.”*7:17 Saame 23:1-2; 'Isi 34:23; 'Ais 49:10; 25:8